HIBRU 2 - NITI GONTU N.T. (BSI)

Kaye Sangopyako

¹ Hopa ngunu taniiyala tagekendo niihna ngunu tapa tiinii, hiilamakoda ngunu hiikohokii ngokiñdo.

² Niimpalukoda puyu miidopopi atañka luniiñ matiirḛ jije koda ho kapane talemiile malo luniiñtamanii atañ miikhiiñ kokiñ dokoda,

³ niihtañpa ngunu hargii talyi ngunu matiirḛ sitañ kaye sangopyako mi mapa dokoda? Siimi kapyopa Attoh lukone, ho siimi ngunumi jije lutiiku hiika hutiina mohmi tapa nyanenii,

⁴ Pinii tiirḛ haki bitii kagiñnanii ho kahotamo ho abuje miimalyanii lo ho Darii Yajiyallo ka ahmiñayiñ mi mohka atoh henko jaho khetii.

Kone Huna Ngunumi Sangopyako Ingii Donii

⁵ Niimpalukoda siimi miidopopi mimake Pinii kabiitote lunii ahsanii dohadolo mi, nii mina ngunu ludonii.

⁶ Siimi koneda pyako tola done, “Miyu si niihpe niika mohlumika hendopaka lyiniiñsi, Malo miyu ka oho, niimpalukoda no mohmika kalyañ doniiñsi?

⁷ No mohmi arche hepa miidopopi atañmi atu yadopa miitii, no mohmi tahiñbyopa mi agiitii tatukatu ho khiiniiñ ka agiñho,

⁸ amane drih mi mohka alih liidi ho dopa.” Siisi amane drih mi mohka ura ho dopa miila lala, mo hang apama agoho mohka miila madopa. Si chulipa, ngunu siisi kapama amane drih mi mohka ura ho dopa.

⁹ Hojalo ngunu Jisu mi kapado, humina arche hepa miidopopi mi atu yadopa miitiinii, tatukatu ka agiñho tayyiñbyopa agiitii khiibii dola niimpalukoda shiiniiñ ka heru mika henko hopa, niimpalukoda Pinii ka aroh-aya kopa mohmi shiiniiñ mi henka kiine dupa kone abipa.

¹⁰ Niimpalukoda siikasi miitatola doku mohpa, hupana ho hukohokiina kapane drih atañ lintii nii, abuje oho atañmi tatukatu ho ahgii lala, mohluka sangopyako mika miitu rigii niimi digoabiaya dopa miitii heru heniiñlo.

¹¹ Niimpalukoda huna darii miidonii ho hutiina dariimiiko tiikunii hikha kone hokii ke lindonii. Hopa niihna mo hiinyañ manii mohlumi anubarmii hiila gyodupa,

¹² lubiidola, “Ngo gyuko talyi niika armyañ mi ngiika anubarmii atañko, miyu apurho ngo niimi assañ talyi.”

¹³ Ho hiira, “Ngo ngiika henje mi mohko atii talyi.” Ho hiira, “Soke ngo danii, ho himme atañ Pinii ka ngiimika biniiñ.”

¹⁴ Hopa himme atañ asiialyo la ai nyi giido, mo atoh loda hiichulipa henju ahiñ jami giido, niimpalukoda shiiniiñlo mo pyadulodupa mohmi huko hona shiinii ka harchichike hii giidonii, hiikahii, igii,

¹⁵ ho hikha hiika atañmi tupya tiiku hutiina shiisa niimi biisola hikha sango ho tumbii kotola donenii.

¹⁶ Niimpalukoda jije siikasi mo miidopopi atañmi hena lama hojalo Abraham ka ohoasi atañmi.

¹⁷ Hopa mohmi mohka anubarmii hiilyañpa miitii kapane henjumiijuho, niimpalukoda mohmi aroh la lyike nendupa ho lotii bukuñ nyibu pa Pinii mika miiho ko, miyu atañka ingyamiigyanii atañpa mensi liiko dupa.

¹⁸ Niimpalukoda mo atoh loda tenkalarka kotii ho heru hentii, ho mo hembyuñ lakiñdo hutiimina tenkalarka biidonii.