HIBRU 11 - NITI GONTU N.T. (BSI)

Henje

¹ Siisi henje si hentinii drih mika jije pakiñ do hiila ka heniiñ mike, kapa masujalo pakiñdo loda hiila ka heniiñ.

² Niimpalukoda siika silo bilo miyuatañ lariinyatii piniimiito luniiñmi.

³ Henje lo ngunu talado dohadolo mi Pinii ka aguñlo putii hiila, niimpalukoda nii mina kapa donii kapa manii drih atañ hokii linke nentii.

⁴ Henjelo Abel Pinii mi bitii khiiniiñya membinii Ken mi hentola, hiilo mo denki do hiila khiikotii, Pinii haki bido mohka ahmiñayiñ biniiñ mi larii biidola; mo shiitii, hojalo mohka henje lo mo siisi jalo ludorañ.

⁵ Henjelo Enok ayoh ho chagii kotii niimpalukoda mo shiiniiñ mi kapa matii; ho mohmi mepa kumatii, niimpalukoda Pinii mohmi ingii tiiku. Siisi mohmika ingii marañpa mo Pinii mi hempyo miipatii.

⁶ Ho henje giimapa mohmi hempyo miipa lakiñma. Niimpalukoda hujalo Pinii ka aruñho ahchi henje kendo loda mo du hiila ho mo ajudu hiika atañmi huna mohmi medonii.

⁷ Henje lo Noah, Pinii lo luluñ kobiidola ahsanii lyisa niimi kapa masu tiirḛ, tagiila ho hempḛr kahe hulu tare pentii mohka uru atañmi lyangur naniipa; siika silo mo dohadolo mi khiipatii ho denki mika pensi koniiñpa lyitii niihna henjelo ahdonii.

⁸ Henje lo Abraham taliitii mohmika gyola lala inge lulyiho gandaho nii mina mo pensikokiñ tiinii; ho mo intii, hang chimapa mo no ilyi hiila.

⁹ Henjelo mo gyajotii hemmebiniiñ kiiddi ho, nyibo ganda hokii hiilyañ, tabyo ude ho dubii dola Isak la Jakob nyi hiilyañ, mo agiñho pensi kotii hiika hemme biniiñ ahiñmi.

¹⁰ Niimpalukoda mo metii citi mi nii mina liidi ratii kunii, hiimika penchanii ho punii bo Pinii.

¹¹ Henjelo Sarah wiinga giina nanii harchichike mi kappatii, mo akha siitii kutrḛ, niimpalukoda mo mohmi lotii hiila khiitii huna hemme bitiinii.

¹² Hiikohopa miyu kone kokii, ho mo kokii huna shiiniiñ mi gabii tokula dutii kunii, hiiko hokii halugiira mi biitii ohoasi hiimkane abuje yapuñ daka takḛr atañmi ho siimie biilyo daka khiikha lamanii sumu kane.

¹³ Hikha siika atañsi henje ho shiitii, niihna hemme bitii nii hiimi kapa mapa, hojalo hiimi kapa tela ho hiimi adho hokiila ayahelyi lute hela, ho hiila chintii hekula mohlu kiiddiapiñ so nyibo ho dulya lasu hiila.

¹⁴ Niimpalukoda miyuatañ huna ludonii siimi didḛrpa miitii mohlu atoh ganda mi metii hiila.

¹⁵ Mohlu matiirḛ hiika ganda mi hentii koda nii hokiina mohlu iritiinii, mohlu hiiko ahku lakiñ tiiku.

¹⁶ Hojalo siikasi, mohlu ayaya ganda mi kapa nala hentii, hiika hii, dariiganda hokii. Hiikohopa Pinii hiinyañ matii mohluka Pinii hiila ka gyoko saniiñmi, niimpalukoda mo mohlupa citi miimyo bitii.

¹⁷ Henjelo Abraham, mohmika tenka lyiho, Isak mi bitii, ho huna hemme niimi kapa tiikunii mohka oho ako lohe bidupa miitii,

¹⁸ hopa humina siikasi lutiinii, “Isak kokiila niika ohoasi mi myari biikiñdo.”

¹⁹ Mo hiila hentii Pinii shiila ka doku niimi miina seri lakiñdo hiila; hopa, lumunala ludo koda, mo mohmi laku biitii ku.

²⁰ Henjelo Isak ahsanii lyansa niimi luliñtii Jakob la Isau nyimi.

²¹ Henje lo Jakob, shiipa miilyi kula, Josep ka oho kone abimi lyambiido, mohka panyi ka hataho adiñ chukila herii kiinetii.

²² Henjelo Josep, mohka santuñ ka kamikalo ho, Isrel miyu atañka linku sanii mi lupatii ho mohmika alie saniiñmi luko lumyo tii.

²³ Henjelo Mose, mohmika bulyi ho, piilo bariñhe mohmi mohka annii-aba achuñ biitola biitii, niimpalukoda mohlu kappatii wiinga si ano kapyodo hiila; ho mohlu biiso matii radde ka pota biliñ laka luniiñmi.

²⁴ Henjelo Mose, mohka sancha lyiho, gyoko tama lutii Paraoh ka nyimii wiinga ka oho hiila,

²⁵ miihimiire khiimapama miiko niimi ya kahetii Pinii ka miyuatañ agiñho hempyo paka ingyamiigya hoka sobo saniimi hentola.

²⁶ Mo Kristo paka heru hembi niimi uro mingotamo yapa hentii Egip hoka alḛrdrih doniimi hentola, niimpalukoda mo ajju kosa niimi katii.

²⁷ Henjelo mo Egip mi apatii, radde ka hadii mitrḛ hang biiso mapa; niimpalukoda mo pigiitii mohmi kapa biido niihtañpa hembiidola humina kapa lamanii.

²⁸ Henjelo mo Impobiiniiñ mi atiitii ho ai mi pipputii, niimpalukoda butu wiinga mika mennii bomi mohlumi tenne lama dopa.

²⁹ Henjelo miyuatañ Lanchañ siimie mi repo botii pitañ kiiddi hoka indo niihtañpa; hojalo Egip daka miyuatañ, mohlu hiika ahiñpa miipa miika du hiila, huhatii.

³⁰ Henjelo Jeriko daka sulu hii tehyitii mohlu allo lokanuhe pakḛr kiile.

³¹ Henjelo Rahab pfyoaridiisuniibo lyumatii hiika atañ agiñho hutiina luniiñ tama tiinii, niimpalukoda mo hemihenja karii katañ tii ruha laka ahnii atañmi.

³² Ho siimi uro yapa nii hiila ngo luchi? Myodu si ngiipa nyima lyita Gideon, Barak, Samson, Jepta, David ka piigomi, ho Samuel ho nyibuheniiñ atañmi luko dupa,

³³ huna henjelo raddeganda mi pamiñbiinii, miidikomiigii tiinii, hemme biniiñmi kapatiinii, abañpatii atañka aguñmi gapiñtii,

³⁴ yamu yala doniimi miimitii, ilyo pakhii kosaniihokii hargii tiiku, ajjulo tamonyatii, gyambo pasuko tamopa datii, nyibo ka sipahi atañmi hargii dopa miitii.

³⁵ Annii akha mohluka henii-myanii mi shiinii hokii turiturku dopa kapa biido. Tonge miihimiire kotii, tiipatama hiila lutii, niimpalukoda mohlu hiira aya yapa sango sancha kendo.

³⁶ Khiibe atañ nyapa kola heru hentii ho tarulo hikotii, ho dachañranyi kolii kotiita ho patiih tunkotii.

³⁷ Mohlu yalañ kukotii, mohlu tanye piche kotii, mohlu ilyolo pakhii kotii; mohlu subuñ ho siibiñ ka alyo mi giitola intii, arrokapa, achihchila, khiimapama miikotii,

³⁸ hupana dohadolo si khiiniiñpa nyimatiinii-gyajola siimuganda hola putoo atañ ho, ho miru hola kiiddi daka lampii atañ ho.

³⁹ Ho hikha siika atañsi, henjemi ayaloda mohluko giisutii, hojalo kapa matii nii mina hemme bitii nii,

⁴⁰ niimpalukoda Pinii kakiñ kempyotii ayayapa ngunupa, niimpalukoda ngunumi apalala mohlumi digoabiaya dopa miila kema.