HIBRU 10 - NITI GONTU N.T. (BSI)

¹ Niimpalukoda dapo hii dosutii hojalo aya drih ahsa niimika kagiñnanii ka yallo sii, siika doje sanii atañka jije ajumi hentola, si pema lyila kema, membinii jami menti menti menka ari anyañ karmyañmi membido, si digoabiaya giila kendo peha huna Pinii ko ahde donii.

² Hiilamakoda, mohlu biniiñ mi bingo keñku masu peha? Heriibomi matiirḛ ronge darii miitii kukoda, mohluko hang ingyamiigya hiila heniiñ hii giikiñ kuma.

³ Hojalo siika membiko atañso ingyamiigya niimi hempa dopa miikañdo anyañ karmyañmi.

⁴ Niimpalukoda siikasi miila kema lodake siihhiibo la siibiñ nyika ai lo ingyamiigya atañmi lapa biidupa.

⁵ Siika piigopa, Kristo ka dohadolo soka ahlyiho, mo lutii, “membiniimi la biniiñkeniiñ mi no hembyo make, hojalo apo no ngiipaka miimyo biniiñmi;

⁶ byamu biniiñho ho ingyamiigya paka biniiñho no hempyo biimake.

⁷ Ho ngo luto, ‘kato, ngo ahdu niika heniiñjami miidupa, O Pinii,’ niihtañpa ketola do ngiimi dapo ka kheta ho.”

⁸ Mohka lupyo paka luniiñhii, “No hemmima malo siika siimi hempyo biima membi niiso ho biniiñso ho byamu bikoso ho ingyamiigya paka biniiñ atañso” (siika atañsi dapo hoka keniiñ chulipa bido),

⁹ ho mo lubyañtii, “Kato, ngo niika heniiñjami miidu pasu ke ahsu dunii.” Mo kapyo mi lapatii anyeniimi miiribiidu pa hiila.

¹⁰ Ho hiika henko jaho miiko hopa ngunumi darii miitii ku Jisu Kristo ka apo mika bisu kopa hikha ronge pada.

¹¹ Ho nyibu kone abi dadu kiirañ mohka miigo miidupa, bido membi niijami menti menka biidola, hiikahii pema taliinii atañmi lapa biila kema.

¹² Hojalo Kristo ka bisuniisi kiirañ bisa niipa rongepada ingyamiigyanii atañpa bitii, mo dutii ku Pinii ka lahbi alah ho,

¹³ ho mo kalyada mohka ahha-banii atañmi mohka alih nyota naniiñpa miimiñ menda hemi.

¹⁴ Niimpalukoda ronge paka biniiñlo mo digoabiaya dopa miitii hikha myodupa hutii mina darii miitii kunii.

¹⁵ Ho Darii Yajiyallo tiirḛ ngunupa haki bido; niimpalukoda lubiidola,

¹⁶ “Siika sike ngiika mohluka agiñ hoka hemmesiiniiñ hiika allo atañka hiiba, Attoh ludo: ngo ngiika dapo atañmi mohluka ahha ho atii talyi, ho kechi mohluka henju ho,”

¹⁷ ho mo lubyañtii, “Ngo mohluka ingyamiigyanii atañmi ho mohluka miigya kuniiñmi henge giite kuma.”

¹⁸ Nohna siika sipa hello biniiñ hii donii, hiikoho ingyamiigya pa bido pa lyima.

Kiije Ngunu Pinii ka Aruñ ho Ahdesa

¹⁹ Hiikohopa, anubarmii atañ, ngunu hentiñdo dariinenchañ ho ahdupa Jisu ka ai lo,

²⁰ niti ho turnii lembolo nii mina mo ngunupa miiko bitiinii pulye tonkhu niilo, hiika hii, mohka apo lo,

²¹ ho ngunu kii kahe nyibu du Pinii ka ude ho,

²² kiije ngunu ahdesa jije ahha ka agiñho poteje jijeka henje giitola, ngunuka ahha mi dariipa pisse giila kacho henju hokii ho ngunuka ahuapo mi darii yasie lo hasu giila.

²³ Kiije ngunu giikañ ari giisa ngunuka hentiñ naniiñ mika khako siiniiñmi alyemapa, niimpalukoda mo huna hemme bitiinii hii lotii ke;

²⁴ ho kiije ngunu hensusa niihtañ pana kone anya mi haro lupa siikiñ donii hensu niiho ho aya miigo atañ ho,

²⁵ tonge paka kapa siisa niimi assuale mapa, tonge hiila miinya data, hojalo kone anyañmi haro lupa siito, ho hiimi tiirḛ uro yapa nunu kapado Allo hii tunii dokuke.

²⁶ Niimpalukoda ngunu matiirḛ ingyamiigya niimi miikañ ari jije mi chimbiidola miido koda, hiiko ingyamiigyanii atañpaka membi nii nyiku make,

²⁷ hojalo biiso loda ayakacho kako saniiñ hiike donii, ho hadii ka yamu yaniiñ niihna ahha-banii atañmi yakiñ donii.

²⁸ Miyu huna Mose ka dapo mi chekhola miitiinii shiinyane hang aroh komapa anye malo hinge ka pyako laka haki biniiñho.

²⁹ Niimkane heruyapa pamyokenko kendo nunu henka duha hiika miyu mi huna Pinii ka Oho mi khiipa donii, ho khiimapama miidonii hemmesiiniiñ ka ai mi niilona mo darii miitiikunii, ho hadii dopa miitiinii aroh-aya ka Yajiyallo mi?

³⁰ Niimpalukoda ngunu mohmi chindo huna lutiinii, “Miili sanii ngiika miigoke, ngo bili talyike.” Ho hiira, “Attoh mohka miyu atañmi halii kendoke.”

³¹ Siikasi biisokacho ka drih ke turnii Pinii ka alah hoka huha niisi.

³² Hojalo hempa nyato bilo allo atañmi niido hona, nunu byohu koku lala, nunu hempḛr uro herumyanka pitii,

³³ ronge milo hikha butii kadopa miipyutii ho pamyotakho agiitii, ho ronge milo sitañ miiko niika agiñho dabo kiinetii.

³⁴ Niimpalukoda nunu arohtii patiihtunko nii atañmi, ho nunu hempyo biidola taliimontii nunuka gandanencha mika robii lyiho, niimpalukoda nunu chintii nunupa siimi ayaya gandanencha do ho ayudahe dokañ saniiñ.

³⁵ Hopa nunuka hentiñnanii mi ripa siiyo, nohna ano kahe ajunii donii.

³⁶ Niimpalukoda nunu pigii niimi anna doke, niimpalukoda nunu Pinii ka henko jaho miidupa ho lariidupa hemme biniiñmi.

³⁷ “Niimpalukoda ichuche myodu ka hiibaho, ho ahsabo ahkiñ doke ho diirii miikiñ make;

³⁸ hojalo ngiika denki kone henje loke sankiñ donii, ho mo matiirḛ inku doku koda, ngiika yallo mohko hempyo make.”

³⁹ Hojalo ngunu hiika atañ make huna inkuñ nyado kunii ho pyadu loko tiinii, hojalo hiika atañke huko hona henje giidonii ho mohluka yallo mi atii biinya donii.