HIBRU 1 - NITI GONTU N.T. (BSI)

Pinii ka Aguñ Mohka Oho Kiilo

¹ Abuje ho ponsa ponsa lembopa Pinii luriitii ayuho ngunuka aba atañmi nyibuhenii atañlo;

² hojalo siika kamikalo allo ho mo ngunumi mohka Oho lo luriitii, humina mo kahetiinii kapane drih atañmi pensi koniipa, hukiilona mo dohadolo mi puliñtiinii.

³ Mo Pinii ka tatukatu mi byokur lingiido ho mohka tiihoniiñ henjujami giido, siichañmiido mi mohka aguñka harchichikelo gatu biitola. Mo ingyamiigyanii atañmi darii miite hekula, mo Pinii kahejaka lahbi alah ho duku.

Niimkane Kaye Pinii ka Oho

⁴ Miidopopi atañmi ano kayeyado mohka armyañ myanko niitrḛ mohlumi ano khiiniiñya.

⁵ Niimpalukoda nii miidopopi mi Pinii lune, “No ngiika Oho, siilokii ngo niimi chibii lyikuke”? Malo hiira, “Ngo mohka aba pa lyikiñdo, ho mo ngiika oho pa”?

⁶ Ho hiira, mohka butu wiinga mika dohadolo soka ahgii lyiho, mo lune, “Hikha Pinii ka miidopopi atañ mohmi herii tolya.”

⁷ Miidopopi atañmi mo lune, “Hu mohka miidopopi atañka ale mi miine, ho mohka miira atañmi yamu miilyopa.”

⁸ Hojalo Oho mi mo lune, “Niika raddeduko, O Pinii, ayu kolyuñ kolo dahepa dokiñdo, denki raddepanyi sangii naniiñsi niika raddeganda ka raddepanyi.

⁹ No denki hiiniiñ hemi hentii ho diimmah hiiniiñ hemi kanamatii; hopa Pinii, niika Pinii, niimi arrḛyartiiku hempyo ka kutulo hikha niika dahiñ atañmi kahejapa.”

¹⁰ Ho, “No, Attoh, kiiddiapiñ mi putii lotu jaho, ho yapuñ hii niika alah loka puniiñ;

¹¹ siika atañsi lyukiñdo, hojalo no dakañ kendo; siika atañsi hikha akha kendo pulye khu hiilyañ,

¹² pulye chitañ no mohlumi karbii kendo, ho mohlu lyiguh kendo. Hojalo no hiira siisu, ho niika anyañ pema nyanja kema.”

¹³ Hojalo Pinii nii miidopopi mi lune, “Duto ngiika lahbi alah so nii dahepa ngo niika ahha-banii atañmi niika alih data naniiñpa miitema”?

¹⁴ Mohlu hikha miihoniiñ yajiyallo masupeha miiho niipaka kiiniñ konii, hikha hiika atañpa hutiina sangopyako mi kapa kendonii?