GELESIA 5 - NITI GONTU N.T. (BSI)

Nunuka Dasḛr mi Atii Biito

¹ Niimpalukoda dasḛr kiinedupa Kristo ngunumi dasḛr pa miibitii; hopa alḛrpa dato, ho hiira tiilii siiyo miira pa.

² Siisi ngo, Pol, nunumi lulyike nunu matiirḛ mitupipa konya dokoda, Kristo nunupa hang aya yagiido hiila make.

³ Hiira ngo lulyike miyu kone abimi huna mitupipa kodanii hii hikha dapo mi talii dopa lyido lodake.

⁴ Nunu Kristo kokii dasa dokuke, nunu huna dapo lo ludḛr kopa miidonii; nunu aroh-aya hokii hupayudo kuke.

⁵ Niimpalukoda Yajiyallo kiilo, henje biidola, ngunu kalyatii denki ka hentiñmi.

⁶ Niimpalukoda Kristo Jisu ko mitupipa koniiñ malo mitupipa komanii hang ponsa siima, hojalo henje hiike miigo miidonii hensu niilo.

⁷ Nunu miidiko miinyane; Hu nunumi jije mika luniiñ tasa niimi lutiñtii?

⁸ Siika yarniisi mohkokii make huna nunumi gyodo nii.

⁹ Ichuche ipohii hikha apu mi ipo lyigiidu.

¹⁰ Ngo Attoh mi hatiido nunu yoheya khiibe henju hendiima hendo ngiika heniiñmi opa lala; ho huna nunumi ahiare miipa donii mo ayakacho kako kendoke, hu jalopa mo.

¹¹ Hojalo ngo matiirḛ, anubarmii atañ, mitupikonii mi tonsḛr khenyo dorañ koda, niimpa ngo siisi lyihepa miihimiire kodorañ? Hiika piigo ho pogyañ mika datiñ biiniiñ atañmi lapa tiiku.

¹² Ngo hendo hutiina nunumi herumiipa donii mohlu atohka ahuapo mi padupanyu losu donii!

¹³ Niimpalukoda nunumi dasḛrkiine dupa hiila gyotii, anubarmii atañ; nunuka dasḛr mi nunuka asiialyo ka miigopa miina nayo, hojalo hensuniilo kone anya ka miira pa lyisuto.

¹⁴ Niimpalukoda hikha dapo hii aguñ gonge ho lyipedo, “Nunu atohka ariapii mi atoh mika hensu henchañho hento.”

¹⁵ Hojalo nunu matiirḛ chisula ho kone anya mi gomegome diisula dokoda hendi tolya nunu kone anya mi pyadulosu domasa hiila.

Yajiyallo la Miyu ka Henju

¹⁶ Hojalo ngo ludu, Yajiyallo lo into, ho asiialyo ka henju mi hembyañ dopa miibi yo.

¹⁷ Niimpalukoda asiialyo ka heminii hii Yajiyallo mi chekhodo, ho Yajiyallo ka heminii hii asiialyo mi chekhodo; niimpalukoda siika atañsi kone anya mi chekho siido, nunumi miitiñ dupa niihna nunu miina doniiñ.

¹⁸ Hojalo nunu matiirḛ Yajiyallo lo ingii kodo koda nunu dapo ka ura ho damake.

¹⁹ Siisi asiialyo ka miigo atañ hii kadḛr doke: datuapu, miibḛrniiñ, helyihembyo heniiñ,

²⁰ puchiniimi ka heriinii, ashumiiniiñ, kahusiiniiñ, pasuniiñ, kariñsiiniiñ, hadii, atohpaka hembii siinii, taliisiimanii, tachesiiniiñ ka yajiyallo,

²¹ kariñ, ow tangiinii, tangiitola hagopaka soniiñ, ho hii chulipaka miinii. Ngo nunumi luluñ lyike, kapyo hoka luluñ luchañ ho, hutiina sitañ drih atañmi miido nii Pinii ka raddeganda mi pensi kokiñma.

²² Hojalo Yajiyallo ka ahee hii hensu nii, hempyo, chimie, pigiinii, helakala, aya, lotii,

²³ ahhakeyiñ, hendimiidi; siika atañmi chekhola hang dapo nyima.

²⁴ Ho hutiina Kristo Jisu kiinii hiika hii asiialyo ka agiñho ledalala mentii ku helyihembyo la hemikami mi.

²⁵ Ngunu matiirḛ Yajiyallo lo sando koda, kiije ngunu Yajiyallo hotiirḛ insa.

²⁶ Kiije ngunu atoh mi hentii siimasa, kone anya mi gasu dopa luhuluha siimasa, kone anya mi kariñ siimasa.