GELESIA 3 - NITI GONTU N.T. (BSI)

Dapo malo Henje

¹ O piicha Gelesia daka miyuatañ! Huna nunumi ashu miilii tiinii? nunuka amee kadopa Jisu Kristo mi miilañrumi kakiñla leda biine.?

² Ngiimi siimi kontii nunumi taka kiinepe: Nunu Yajiyallo mi dapo ka miigomi miibii dola larii tiinii, malo henje biido laka tapa kopa ha?

³ Nunu hiimkane piicha po? Yajiyallo hokii miiri biila, siisi nunu asiialyo lo miime pa miidunii?

⁴ Nunu hiimkane abuje drih mi piigo ama pa henka tiikunii? hii matiirḛ jiji hiila koda piigo ama.

⁵ Huna nunumi Yajiyallo mi bitiinii ho miimalyanii miigo miitiinii nunuka punkoho hii dapo loha, malo henje biidolaka tapa niiloha?

⁶ Hopa Abraham “Pinii mi henjetii, ho hiika hii mohmi denki hiila kala giitii.”

⁷ Hopa nunu kato siikasi henje ka miyuatañ ke Abraham ka oho atañ hii.

⁸ Ho piniipota hii, lumyotola dotiiku Pinii Midomiyu atañmi henje lo denki hiila kahetiiku, ayapuyu mi Abraham mi kapyo yapa tonsḛrkhenyo tiiku, lubiidola, “Niiko hokii la hikha ganda atañmi lyankiñdo.”

⁹ Hokoda, huna henje ka miyu nii lyanko kendo Abraham ka agiñho hukiina henje giidonii.

¹⁰ Hikharu hutiina dapo ka miiniiñmi hentiñ la dunii hii beniiñ ka ura ho du; niimpalukoda hiila ketii, “Kone abimi belii kendo huna siika dapo ka kheta soka hikha keto laka doniiñ mi tamanii, ho hiika atañmi miima nii.”

¹¹ Siisi siikasi jije miyu kone hetrḛ lupyakokiñma Pinii ka hataho dapo lo; niimpalukoda “Huna henjelo lupyakotii kunii hii denki lo sankiñdo”;

¹² hojalo dapo hii henje ka ayoh ho doma ke, niimpalukoda “Huna hiimi miido hii hiilo sankiñdo.”

¹³ Kristo ngunumi tupyatiiku dapo ka beniiñ hokii, ngunu paka beko sanii mi beko biidola-niimpalukoda hiila ketii, “Kone abiko beniiñ dokiñdo huna sannii ho hosḛr siida nii”,

¹⁴ Kristo Jisu ko Abraham ka lyarniiñ hii ahkiñcho Midomiyu atañ ko, niimpalukoda ngunu Yajiyallo ka hemme niimi larii dupa henjelo.

Dapo la Hemme Biniiñ nyi

¹⁵ Miyu kii dalyi pa lumu nando koda, anubarmii atañ: kone hetrḛ opama miyu ka henjumi, malo hiiko abyañ liima, ronge hiimi miilyañ tiiku koda.

¹⁶ Siisi hemme bitii Abraham la mohka ohoasi pa. Hiika hii hiila luma, “Ho ohoasi atañpa,” abujemi lutala; hojalo kone misu luta nansu donii, “Ho nunuka ohoasi mi,” hiika hii Kristo.

¹⁷ Ngo hiila ka lusa niimike: dapo si, lampe la hikhañhe anyañ ka hiiba ho ahtii, hii Pinii ka hemme tola doku niimi opadopa miila kema, hemmesiiniiñ mi ayama hiila.

¹⁸ Niimpalukoda pensikoniiñ si matiirḛ dapo lakoda, hiika hii hemme biniiñma; hojalo Pinii Abraham mi bitii hemme biidola.

¹⁹ Niimpa hokoda dapo? Siika siimi agyo liitii niimpalukoda ingyamiigya niikiipa, ohoasi ka ahmiñayiñ menda hemi humina hemme bitii nii; ho hiika hiimi miidopopi mi punko luniiñ pa atii biidola kaheliñtii.

²⁰ Siisi punko luniiñ kone mi abuyapa dakiñdo; hojalo Pinii kone sii.

Dapo ka Dodo Paka Lyiniiñsi

²¹ Hokoda dapo si Pinii ka hemme niimi chekho lapeha? Pema hiilama; niimpalukoda dapo mika biniiñ matiirḛ sangii dokoda, hokoda denki hiitiirḛ jije lusu dokoda dapo la lyikiñtii.

²² Hojalo piniipota si hikha drih atañmi ingyamiigya hiila khiido, niimpalukoda niihna Jisu Kristo mika henje niipa hemme bitiinii hiimi bike nendupa hutiina henje nyadonii.

²³ Siisi henje ka ahma rampa, ngunu dapo ka uro ho duto, ura ho tunko biitola nii dahepa henje mi kakiñ tama.

²⁴ Niimpalukoda dapo hii ngunu mika kabiiniipa lyine nii dahepa Kristo ahma tiirañ, niimpalukoda ngunumi henje lo ludḛr dupa.

²⁵ Hojalo siisi henje hii ahdoku, ngunu kabiiboka ura doku make;

²⁶ niimpalukoda Kristo Jisu ko nunu miilañru Pinii ka oho atañ kuke, henje kiilo.

²⁷ Niimpalukoda nunu niimkane abuje baptisma latiiku Kristo ko ho hii Kristo mi giidoku.

²⁸ Hopa Jew malo Grik hiila khiisu kema, miira malo dasḛr hiila tiirḛ khiisu kema, milobo malo nyimii hiila tiirḛ khiisu kema, niimpalukoda nunu miilañru Kristo Jisu ko kone ke.

²⁹ Ho nunu matiirḛ Kristo kiikoda, hokoda nunu Abraham ka ohoasi ke, pensi kokiñdo hemme biniiñ hiilyañpa.