GELESIA 2 - NITI GONTU N.T. (BSI)

Pol la Khiibe Kiiniñkonii Atañ

¹ Hiikahiiba nyalyañ hela nyampe dala la ngo hiira Jerusalem ho chate Barabas ka agiñho, Taitas mi ngiika agiñho chagiila.

² Ngo chate mihukakiñ niilo; ho ngo mohluka hataho atii bitii (hojalo mi chimapa hiika atañka hataho hutiina khiiko nyadonii) ayapuyu nii mina ngo Midomiyu atañka punkoho tonsḛrkhenyo tonii, hiilamakoda niitañpajalo ngiika harniiñsi malo harkuniisi piigoama.

³ Hojalo Taitas tiirḛ, huna ngiika agiñho danii, mohmitrḛ cheche mitupipakodo ma miima, mo Grik siitrḛ.

⁴ Hojalo gollunii anubarmii atañ ahsiela ura ho ahla, hiikahii rohnii pa lyila chintii ngunuka dasḛrpa Kristo Jisu koka danii mi, mohlu ngunumi miira pa ahgii dupa hiila,

⁵ mohlupa ngunu iche hetrḛ tiilii siimato atta pere patrḛ, niimpalukoda jije ka ayapuyu mi nunupa atii bidu pa hiila.

⁶ Ho hiika atañ kokii huna khiiko nyadonii hang drih ako pajalo (mohlu nii siijalo ngiipa hang lyiguhma; Pinii khiingukhiire make) hiika atañmi, ngo ludu, hutiina khiikonii hang ngiipa miibyañ liigiima;

⁷ hojalo yohe yapaya koda, mohlu kapa lala ngiimi mitupipa komanii atañmi ayapuyu mi luko niipa kahetii hiila, niihtañpa Pitar mi kahetii mitupipa koniiñ mi ayapuyu mi luko niipa

⁸ (hii huna miigo miitiinii Pitar kii dalyilo mitupipa koniiñ atañka miigo pa ngiikii dalyi lotrḛ miido Midomiyu atañpa),

⁹ ho mohlu chilakula la ngiimika aroh-aya biniiñmi, Jems ho Cepas ho Jon, hutiina khiiko nyatii nii siirañ rañtupa dugii nyado hiila, Barnabas ngiinyi mi lahbi alah ka dukuñ siiniiñ mi lyuriila mi, ngiinyi mi Midomiyu ko indopa ho mohlu mitupipa koniiñ atañ ko;

¹⁰ hiilakontii hene mohlu ngiinyi mi arroatu atañmi hempa kencho hiila, nii mina ngo ano miina totanii.

Pol Pitar mi Gabiido Antiok ho

¹¹ Hojalo Cepas ka Antiok hoka ahchi lyiho ngo mohmi cheriitii mohka hataho, niimpalukoda mohmi halii tiiku.

¹² Niimpalukoda miyu tonge Jems kokii amarampa, mo Midomiyu atañka agiñho diibotii; hojalo mohlu ahkele mo dasa lingiitii ho mo atohpa ponsa giitii, biisola mitupipa koniiñ atañmi.

¹³ Ho mo agiñho khiibe Jew atañ miilañ miibo montii, hiila lyikohopa Barnabas lohepa miibo mone ku mohluka agiñho.

¹⁴ Hojalo ngo kapa lala mohlu miidiko miimalyi jije ayapuyu ka piigomi, ngo Cepas mi lutii hikha ruka agiñho, “No matiirḛ, Jew siitrḛ, Midomiyu hiilyañ sando ho Jew hiilyañ pama, niihtañpa no cheche miila kendo Midomiyu atañmi Jew atañ chitañ sandopa?”

Jew la Midomiyu Atañ mi Henje lo Lyangur tiiku

¹⁵ Ngunu atohpa, huna bulyi jaho hokii Jew nii ho ingyamiigyanii Midomiyu ma,

¹⁶ hojalo huna chindonii miyu hii ludḛrkoma dapo ka miiniiñlo hojalo Jisu Kristo mika henje niilo, ngunu tiirḛ Kristo Jisu mi henje tiiku, Kristo mika henje niilo ludḛrkodu kupa, ho dapo loka miigo miiniiñ loma, niimpalukoda dapo loka miigo miiniiñ hii kone mitrḛ ludḛr bikiñma.

¹⁷ Hojalo matiirḛ, ngunuka Kristo lo ludḛr kodu paka miilyiho, ngunu atohmi ingyamiigyanii atañpa kapa siitii, hokoda Kristo ingyamiigyaniika kiiriduniiñ peha? Pema hiilama!

¹⁸ Hojalo ngo matiirḛ hiira hiika atañmi pencha dokoda nii mina ngo pyadu lotonii, hii atohmi kakiñ siido ngo talemiilenii hiila.

¹⁹ Niimpalukoda ngo dapo kiilo dapo ho shiitii ku, niimpalukoda ngo Pinii ko sandu kupa hiila.

²⁰ Ngo Kristo agiñho leda kotiiku; siikasi ngomake huna sando nii, hojalo Kristo huna ngiiko sando kunii; ho sango ngiika asiialyo loka saniiñsi ngo henje loke sandunii Pinii ka Oho mi, huna ngiimi hendo nii ho ngiipa atohmi bisu tiinii.

²¹ Ngo Pinii ka aroh-aya mi khiipa make; niimpalukoda ludḛrbiniiñ matiirḛ dapo lo miido koda, hokoda Kristo ka shiiniiñ hii piigo giimatii.