2 TIMOTI 4 - NITI GONTU N.T. (BSI)

¹ Ngo niimi lubii lyike Pinii ka hataho ho Kristo Jisu kiilo huna shiinii ho turnii mi ayakacho kakiñ donii, ho mohka ahniiñlo ho mohka raddeganda lo:

² aguñmi tonsḛrkhenyo to, kiirañ hendi tolya myodu jalo malo myodu majalo, yatolya, gatolya, ho harolupa tolya, pigiiniimi la tonsḛr niimi pema miima miilya yo.

³ Niimpalukoda myodu si ahlyi ke niidana miyuatañ jije tonsḛr niimi ya pigii tamanii, hojalo mohluka yaroo ahah tanañlo mohlu atohpa mohlumi ka lukonii tonsḛrbo kahe siibii kendo mohluka tana nii hiilya luko kodupa,

⁴ ho mokur giikiñdo jije mika tasa nii hokii ho jijemanii hoya ngojo la dakiñdo.

⁵ Niipa koda, kiirañ abyu mapa datolya, pigii tolya herumi, puyu bakoboka miigomi miitolya, niika miigomi miipe tolya.

⁶ Niimpalukoda ngo membi kosanii ka lyego ho dakuke; ngiika indu myodu ahdo kuke.

⁷ Ngo ngiika aya pago mi patii ku, ngo ngiika hargomi haja tiiku, ngo henje mi atii tiiku.

⁸ Ho siisikii ngiipa atii bitiiku denki ka tayyiñbyopa mi, nii mina Attoh, denki gondu, bikiñ donii hiika Allo ho, ho ngiimi kontiima hojalo hikha hiika atañ miilañmi hutiina mo ka ahkur saku niimi hemmi nyadonii.

Timoti Paka Luniiñ

⁹ Niika miikhe jami miitolya ngiiko nyibya ahdupa.

¹⁰ Niimpalukoda Demas, siika siilobiilyo ka dohadolo mi hembyola, ngiimi apatela ho Tesolonika ho inne; Kresen Gelesia ho inne, Taitas Dalmatia ho.

¹¹ Luk kontiisii ngiika agiñho dasu danii. Mak mi mebiila ho niika agiñho ahgii lya; niimpalukoda mo hempḛr piigo ahne ke ngiimika miiho ko.

¹² Taichikas mi ngo Ipisia ho kiiniñ biilyi ke.

¹³ Niida no ngiiko ahchi, pulye mi biilii kulya ngiika Karpas koka apa niimi Troas ho, kheta atañ miilañmi, ho uro japa siilyo hoka keniiñ atañmi.

¹⁴ Alejandar muryañ puniibo ngiimi ano heru dopa miibiine; Attoh bili kendoke mo ka siika miiniiñ atañ kiipa.

¹⁵ Hendi tolya no atohpa mo kokii, niimpalukoda mo hempḛr uro chekho doke ngunuka puyu mi.

¹⁶ Ngiika kapyo paka lutḛr siilyi ho kone hetrḛ ngiipa dabo mane; miilañru ngiimi apa nyatii. Sipa mohlumi halii makiñcho!

¹⁷ Hojalo Attoh ngiika agiñho dabo, ho ngiimi tamo mi bihii puyu mi aya loda luko dopa, niimpalukoda hikha Midomiyu atañmi siimi tadopa. Hopa ngiimi patii ka aguñ hokii papya tiiku.

¹⁸ Attoh ngiimi kapane diimmah hokii papya kendoke ho ngiimi lyangur do dariiganda ka raddeganda kiipa. Mohmi kontii assañ kencho ayu dahepa. Amen.

Kamijapa Ayahelyi

¹⁹ Priska la Aquila nyimi ayahelyi, ho Onesiporus ka uru atañmi.

²⁰ Erastas Korint ho dune; Tropimas mi ngo achih dopa Miletas ho apate.

²¹ Niika miikhe jami ahdupa miitolya dorii ahma rampa. Eubulas niipa ayahelyi mi bilii bulyi ke, hii chulipa Pudens ho Linas ho Klaudia ho hikha anubarmii atañ.

²² Attoh niika yajiyallo ka agiñho dabo kencho. Aroh-aya niiko dokiñ cho.