2 TIMOTI 1 - NITI GONTU N.T. (BSI)

¹ Pol, Kristo Jisu ka kiiniñkonii kone Pinii ka henko jaho sango niihna Kristo Jisu ko hemme tola donii,

² Timoti, ngiika heniiñja wiinga: Aroh-aya, aroh, chimie Pinii aba ho Kristo Jisu ngunuka Attoh kokii.

Payapacho luniiñ la Harolupaniiñ

³ Ngo Pinii mi payapacho ludu humina ngo miiho dunii didḛr hendḛr biidola, ngiika aba ka miichañho, niida ngo niimi hempa talyi ngiika kiirañ kuniiñ ho.

⁴ Ngo niika mila mi hempa lyiho, ngo niimi allo ayoh kapa nala hendu, niimpalukoda ngo poteje hempyo giidupa.

⁵ Ngiimi niika denki henje mi hempa dopa miido, henje kapyopa niika ayyo Lois ko giitii ho niika annii Eunice ko ho siisi, ngo henjedo, niiko giido hiila.

⁶ Hopa ngo niimi lupadu hiira miilyo tige liito Pinii ka ahmiñayiñ niiko hoka giiniiñmi ngiika alah tencha biido laka miiniiñmi;

⁷ niimpalukoda Pinii ngunumi biisoniika yajiyallo mi bimake hojalo harchichike ka yajiyallo miike ho hensunii ho hendimiidi.

⁸ Hiinyañ yo ngunu Attoh mika pyako saniiñmi, malo ngiimi mohka pattiih tunko bomi, hojalo hembyuñ monto herumi heniiñmi ayapuyu pa Pinii ka harchichikelo,

⁹ huna ngunumi lyangur tiinii ho gyotiinii darii gyojulo, ngunuka miigo miiko hopa mapa hojalo mohka atoh piigopa ho aroh-aya nii mina mo ngunumi bitiinii Kristo Jisu kiilo ayu kolyuñkolo ho,

¹⁰ ho siisi kakiñ tiiku ngunuka Lyangurbo Kristo Jisu ka ahniiñlo, huna shiiniiñ mi lapa tiinii ho sango la shiilamasaniimi ahgiitii ayapuyu kiilo.

¹¹ Niimpalukoda siika ayapuyu pa ngiimi kahetii tonsḛrkhenyo ho kiiniñkonii ho sariipa,

¹² ho hopa ngo heruhendu siisika henchañho. Hojalo ngo hiinyañma, niimpalukoda ngo chindo ngo humi henjedu hiila, ho ngo hentiñdo mo dagur lakiñdo hiika allo lyihepa nii mina ngiimi kabii tote hiila bitiinii.

¹³ Imbo monto jije aguñ luniiñho nii mina no ngiiko hokii tapatiinii, henjeho ho hensuho niihna Kristo Jisu ko donii;

¹⁴ jijemi dagurbiito nii mina niimi kabiidopa bitiinii Darii Yajiyallo huna niika ura ho dunii.

¹⁵ No chila du hikha hutiina Asia ho dunii ngiiko hokii inkur nyaneku hiila, ho hiika atañ hokii Pigelas la Harmogenes nyi.

¹⁶ Attoh aroh mi bikiñcho Onesiporus ka uru atañmi, niimpalukoda mo kiirañ ngiimi jojo lupa; mo ngiika dachañranyi pa hiinyañ mane,

¹⁷ hojalo mohka Rom hoka ahchi lyiho mo ngiimi hempḛr uro mene ho ngiimi mepa,

¹⁸ Attoh mohmi aroh mi kapa dopa bikiñcho Attoh kokii hiika Allo ho-ho no hempḛr ayapa chindo hikha miigomiiniiñmi mohka Ipisia hoka miiniiñmi.