2 PITAR 3 - NITI GONTU N.T. (BSI)

Attoh ka Ahsaniimika Hemme Biniiñ

¹ Siikasi siiti tanye niipa ke ngo nunumi kebii lyinii, heniiñja, ho tanye ruho ngo nunu denki henjumi hiira herila hempa dopa miitii;

² niimpalukoda nunu hempa to darii nyibuhenii atañka lumyo niimi ho Attoh ho Lyangur boka lujubiniiñmi nunupaka kiiniñkonii atañ kiilo.

³ Kappyo japa nunu siika siimi chinto rañ, khansunii atañ linkiñ doke kamikalo myoduho khansu biidola, mohluka atoh helyihembyo mi hembiidola

⁴ ho lubiidola, “No do hemme biniiñhii mohka ahkur saniiñmi? Niimpalukoda ngunu aba atañ shiisu neku tiirḛ, hikha drih atañ hiira pasu dosudonii puliñ bii jahohokii.”

⁵ Mohlu miidiñ ahiñ siika jijemi chima niihtañ miido, dariiganda si Pinii ka aguñ lo bilo ayu ho lintii hiila, ho kiiddiapiñ si yasie hokii putii ho yasie lo,

⁶ niilona dohadolo puliñ tola ka doku niimi yasie lo tubii tiinii ho lyutii kunii.

⁷ Hojalo hiika aguñ luniiñ ahiñ lo kiiddi la yapuñ nyi siisi ka doniimi atii tiikuñ biido yamu hompa dupa, atii biido ayakacho kalyi allo lohepa ho piniimika heriimanii miyu atañmi pyadu lolyi lyihepa.

⁸ Hojalo helyu nyayo siika jije kone mi, heniiñja, Attoh pakoda allo lohe hii anyañ nyang jarepa lyido, ho anyañ jare hii allo lohe chuli pake lyidonii.

⁹ Attoh mohka hemme nii piigo ho haso make tonge hasodo hiila lusu dono, hojalo nunupa mo kalya lake dunii, kone mitrḛ lyuke nena mapa, hojalo miilañrumi henkur kiine nala.

¹⁰ Hojalo Attoh ka allo hii diipyo nii chuli ahkiñdo, ho hiika hiibaho yapuñ hii lyukiñdo hempḛr goropa adubiidola, ho drihpachi atañ jeyi kendo yamu ho, ho kiiddiapiñ la hiika haho hoka miigomiiniiñ mi lyaja kendo.

¹¹ Hopa hikha siika drih atañ jeyi nyakiñdo, niihtañ miyu ka sancha ho sanchi nunuka darii ho piniisanju sango ho,

¹² kalyala dula Pinii ka ahsanii allo mi nyibya ahdo kupa, nii pana yapuñmi lyakiñ donii ho jeyi kendonii, ho drih atañ yamu agiñho jikiñdo!

¹³ Hojalo mohka hemme nii chuli ngunu niti yapuñ atañ la ho niti kiiddiapiñ mi kalya du niihona denki atañ dukiñ donii.

¹⁴ Hopa, heniiñja, nunu siikasipa kalyado, hiilo kapakodupa miito hang diigolugo giima dopa malo pahañ hansa giimadopa, ho chimie ho.

¹⁵ Ho Attoh ka yanu paka kalya niimi sangopyako paya khiito. Hopa ngunuka heniiñja anu Pol tiirḛ nunumi ketii mohmika chila biniiñlo,

¹⁶ siika siimi lubiidola mo hikha mohka siiti atañ ho ketii. Hiikoho drih tonge giido ohepada tachiñ lama, nii mina chimanii ho tagelaka tamanii lugu biidunii hiilo mohlu atohpa pyadu siiniiñ mi lulii giido, mohlu khiibe piniipota mika miichañho.

¹⁷ Nunu hopa, heniiñja, siimi kapyopa chimbii dola, hendi nyato hiila makoda nunu lyugii kodiike piigoamanii miyu ka miigya niilo ho nunu atohka daju mi alyu siidii ke.

¹⁸ Hojalo santo Attoh la Lyangur bo Jisu Kristo ka aroh-aya la chiniiñ ho. Mohmi assañ kencho siisi ho ayudahe ka allo lohepa. Amen.