2 KORINTIA 9 - NITI GONTU N.T. (BSI)

Ananii Henjemiyu Paka Hembyuñnii

¹ Siisi siikasi nunumi ngiipa kedopa lyima piniimiyu paka biniiñ piigo mi,

² niimpalukoda ngo chindo nunuka henju niimi, nii mina ngo nunumi khambii dunii Masedonia miyuatañ agiñho, lubiidola Akaia ada biinya kiija henju la do; ho nunuka miichi hiila ka heniiñ hii abujemi haro miipa giitii.

³ Hojalo ngo anubarmii mi kiiniñ biilyi ke niimpalukoda nunu paka ngiika hentii niisi mi danyo pa impa madopa siika drih so, niimpalukoda nunumi henjula duke nendupa, ngiika luniiñ hiilyañpa nunu lyito;

⁴ hiila makoda Masedonia hokii miyu tonge ahbo kendo ngiika agiñho ho nunumi henju mapa kapa koda, ngunu hiinyañ kendoke-nunumi hang lusa giimapa-niimpalukoda hiimkane hentiñdo.

⁵ Hopa ngo hentii anubarmii tonge mi kiiniñ dopa lyido ngiika ahma rampa ahpyo hete hiila nunuko, ho miimyo he siika ahmiñayiñ bisa niimi nunuka hemme niimi, niimpalukoda siika siimi khoniiñ hiila mapa hojalo hembiidola ka ahmiñayiñ biniiñ hiila.

⁶ Drih hii hiila ke: huna henjḛr biidola bichi nii hii henjḛr biidolasu bisi kokiñ donii, ho huna abuje ali talyinii hii abuje pikiñdo.

⁷ Kone abi miito nii hiila niika ahha ho hentii, bina mapa hembiidola malo bikiñ doku loda hiila mapa, niimpalukoda Pinii hendu huna hempyo biidola bidonii.

⁸ Ho Pinii nunumi bila kendo kapane lyaniiñ mi abuje dopa, niimpalukoda kiirañ nunuko kapanehemi khepa doke nendupa ho abupa hembyuñ kiinedupa kapane aya miigopa.

⁹ Hiila ketola do, “Mo pipyapisatii, mo arroatu mi bidu; mohka denkihii ayudahe dokiñdo.”

¹⁰ Huna alikormo mi ali niimi bidonii ho yatañ mi diisa niipa bidonii ho bikiñ doke nunuka anna niimi ho niika denki ka amoopigo mi abuyapa miibi kendoke.

¹¹ Nunumi kapakohe mingo dopa miikiñ doke uropaka bibyuñ kopa, ngunu kiilo Pinii mi payapacho hiila assañnii linkiñdo;

¹² niimpalukoda siika miigo soka miibyuñ nii hii piniimiyu ka anna mi kontii bibyuñ do hiila ma hojalo Pinii mika abuje payapacho luko hotiirḛ bipa la doku.

¹³ Siika miigo soka tenka koso, nunu Pinii mi assañdiilañ kendo nunuka talii laka Kristo ka ayapuyu mi khiiko hopa, ho hempabiido laka bibyuñ niimi mohlupa ho khiibemiyu patrḛ;

¹⁴ hopa mohlu nunumi kapa nala henyada ho nunupa kubi nyada, niimpalukoda abuje Pinii ka aroh-aya nunuko doko hopa.

¹⁵ Pinii mi payapacho niimpalukoda mohka luko shiilamanii ahmiñayiñ biko hopa!