2 KORINTIA 5 - NITI GONTU N.T. (BSI)

¹ Niimpalukoda ngunu chindo kiiddiapiñ daka ngunuka tabyo mi matiirḛ mudu siitii jalo, ngunuko ude do Pinii kokii, alah loka ude peniiñ mapa, lyulasamanii dariiganda ho.

² Jije lusudokoda so ngunu siikhiiñdo, ho ano hentudo ngunuka dariiganda daka duko mi atii budu pa,

³ niimpalukoda siimi atii biidola ngunumi arapa kapa koma dopa.

⁴ Niimpalukoda ngunuka siika tabyo soka durañ so, ngunu herudo ho henado; hiilama ngunu abitarii agiikoma pa du hiila, hojalo ngunumi piijoda ahgii kendo, niimpalukoda niihna shiila sanii hiimi sango ho huha dopa.

⁵ Mo huna siika drih siimi ngunupa miimyo bidonii hii Pinii, huna ngunumi Yajiyallo mi bitiinii chigiiniipa.

⁶ Hopa ngunuko kiirañ aya haro nanii do; ngunu chindo ngunuka ude hoka apo pa dulyi ho ngunu Attoh kokii adho pa da,

⁷ niimpalukoda ngunu henje loke indunii, kapa niilo make.

⁸ Ngunu ko aya haro nanii do, ho ngunuka apo hokii inkula ho Attoh ka agiñho ude hoka dubo saniimi hensañ hepa henchi.

⁹ Hopa ngunu ude ho duchiha malo adho pa dachiha, ngunu mohmi hempyo miipa talyi hiilaka heniiñ hii ngunuka miisanii.

¹⁰ Niimpalukoda ngunu miilañru Kristo ka ayakacho kako duko ho ahkiñdo loda, niimpalukoda kone abimi aya malo ayamanii mi larii kiine dupa, niihtañ pana mo miitiinii mohka apo ho.

Pinii Mika Ajiñnii Kristo Kiilo

¹¹ Hopa, Attoh mika biiso mi chimbii tola, ngunu miyu atañmi yardu; hojalo ngunumi Pinii chindo, ho ngo hendo siika siimi nunuka henju hotiirḛ chindu do.

¹² Ngunu atohmi nunuka agiñho hiira assañ siima lyike hojalo luko biilyi ke ngunu mika hentii monsa niimi, niimpalukoda nunu hiika atañmi luko lakiñdo huna miyu ka sanju gyaju mi hentii siinya danii ho mohka ahha homa pa.

¹³ Niimpalukoda ngunu matiirḛ hendḛr lamapa lyido koda, hiika hii Pinii pake; ngunu matiirḛ hendi ko hendo koda, hiika hii nunu pake.

¹⁴ Niimpalukoda Kristo ka heniiñ hii ngunumi lutiñ biitola biido, niimpalukoda ngunumi talii dopa lutiiku miyu kone miilañ rupa shiibi tii hiila; hopa miilañru shiikiñdo.

¹⁵ Ho mo miilañ rupa shiibi tii, niimpalukoda hutiina sando nii hii atoh pa sansu madopa hojalo hiipa huna mohluka piigo pa shiibi tiinii ho turi tiiku tiinii.

¹⁶ Siisi kiija, hopa, ngunu kone mitrḛ miyu ka henju ho hente kuma; ronge ngunu Kristo mi miyu ka henju ho hentii kujalo, ngunu siisi kiija hemba takuma.

¹⁷ Hopa, mi kone matiirḛ Kristo ko dado kukoda, mo niti puniiñ ke; khu hii lyune kuke, kato, niti doku.

¹⁸ Hikha siika atañsi Pinii kokii ke, huna Kristo kiilo ngunumi yardiñ tiikunii mohka agiñho ho ngunumi yardiñ niika miigomi bitiinii;

¹⁹ hiika hii, Kristo ko Pinii mi yardiñ tiiku dohadolo mi mohko, mohluka ilemiile niimi khiiku mapa, ho ngunumi yardiñbiniiñ ka puyu mi luko tote hiila lutii.

²⁰ Hopa ngunu Kristo ka puyu mika bako binii, Pinii ngunu kiilo mohka yarniiñ mi yardo. Ngunu nunumi yarlyi ke Kristo kii dalyi pa, Pinii ko ahdiñ nyato ku.

²¹ Niimpalukoda ngunu kiipa mohmi ingyamiigya niipa miitii huna ingyamiigya luniiñ mika chima niimi, niimpalukoda ngunumi Pinii ko denki hiila miidupa hiila.