2 JON 1 - NITI GONTU N.T. (BSI)

¹ Amiabañ kokii kahe konii nyimii la mohka oho atañmi, humina ngo hendu nii jijeho, ho ngo kontiima hojalo hikha hutiina jije mi chindo nii,

² jije kiipa niihna ngunuka uraho giidonii ho giikiñdo ngunuko ayudahepa:

³ Aroh-aya, aroh, ho chimie ngunuko dokiñcho, Pinii Aba kokii ho Jisu Kristo Aba ka Oho, jije la hensu nyiho.

Jije la Hensu nyi

⁴ Ngo ano hempyo do niika oho tongemi jije mi imbo mondopa kapa lala, niihtañpa ngunumi Aba hii miitolya luhii.

⁵ Ho siisi ngo niimi yardu, nyimii, niti lujubiniiñ mi ngo kelyi hiila make, hojalo ngunukoka donii lotuja hokii, hiikahii ngunu kone anyañ mi hensu kendo.

⁶ Ho sike hensunii, hiikahii ngunuka mohka lujubiniiñ mika imbo moniihii; siika sike lujubiniiñ hii, niihtañpa nunu lotu jaho hokii tapane, hiikahii nunu hensuniiho imbo monto.

⁷ Niimpalukoda abuje gollunii dohadolo so linya neke, miyuatañ hutiina talii nyamanii Jisu Kristo ka asiialyo hoka ahniiñmi; sitañ lunii kone hiike gollunii ho kristokamabo.

⁸ Nunu atohpa hendi nyatolya, nunu alyu siima mapa nii pana nunu miigo miitiinii, hojalo poteje injomiijo mi kapa ladopa.

⁹ Hu kone jalo ilemiile talyi ho Kristo ka tonsḛr niiho datema mohko Pinii nyima; mo huna tonsḛr niiho danii hiiko anyeru Aba la Oho nyi da.

¹⁰ Hu kone jalopa matiirḛ niiko ahchi ho siika tonsḛr niimi ahgii makoda, mohmi ude ho ahke nelyayo malo hang ayahelyi lulya yo;

¹¹ niimpalukoda mo huna mohmi ayahelyi ludonii hii mohka diimmah miiju hoke miibo mondonii.

Kamijapa Aguñ

¹² Ngiiko abuje kesa dosudo nunumi, ngo pota la sihahi nyilo ketema, hojalo ngo hendo nunumi kaha dupa ahchi ho nunuka nyitumoru mi kapa siibii dola lurii siichi, niimpalukoda ngunuka hempyo mi hempe kiine dupa.

¹³ Nunu kahekonii barmiika oho atañ nunumi ayahelyi lulyi ke.