1 TIMOTI 6 - NITI GONTU N.T. (BSI)

¹ Hikha hutiina miirapa lyidanii mohluka atoh atañmi hikha khiiniiñlo khiito, niimpalukoda Pinii ka armyañ mi ho tonsḛr niimi lupyu madopa.

² Hukiina henjenii atoh dunya dunii khiimapa miiyo mohlu anubarmii pa lyiko hopa; hiilamapa mohlu uroyapa ayapaya miiho kendo niimpalukoda mohluka miiniiñ hokii hu miijo kapado lukoda henjemiyu atañ ho heniiñja. Tonsḛrto ho siika miigo atañ sipa yarto.

Amuh Tonsḛrnii la Jije Mingo

³ Hu konejalopa matiirḛ tonsḛrdonii yoheya ho taliimomapa ngunuka Attoh Jisu Kristo ka aguñ atañ agiñho ho tonsḛrnii piniisanju ho,

⁴ mo butelinkiñdo hentii siiniiñ ka agiñho, mo hang chima; mo chesuresu niika drih ho hengada ho aguñ ka piigo mika chesuko, niihna kahusiiniiñ lingii donii, taliisiimanii, nipasiiniiñ, aya mapa ka hemmosiiniiñ,

⁵ ho miyu atañka punko hoka chessuniiñ huka henjuna surudonyonii ho jije hokii lyudo kuniiñ, henyadanii piniisanju hiike pasermiiliñ biiko lembo.

⁶ Hiikoho abuje pasermiiliñ biinii hii do piniisanju hembyañ biiniiñ ka agiñho;

⁷ niimpalukoda ngunu hang biiliima dohadolo so, ho ngunu hang dohadolo sokii biila keñkuma;

⁸ hojalo ngunu kii matiirḛ diigo la giigo nyi dokoda, siika atañ siimi ngunu hembyañ biikiñdo.

⁹ Hojalo huna mingo nala hendonii hii tenkalarka ho huhidu, ho gyoh ho, abuje piigoamanii henju ho heru miipanii henju niihna miyu atañmi byagiisako ho pyadu sako ho huhigiidonii.

¹⁰ Niimpalukoda tiicko mika hembyoniiñ amane diimmah ka liima pa lyido; siimika hembyo kopa tonge henje hokii ngonyaneku ho mohluka ahha mi abuje heru miipa siinyada.

Timoti Mika Lukonii

¹¹ Hojalo niipa koda, Pinii mika heriinii miyu, hikha siika atañ siimi apatolya; denki miigomi miichi hentolya, piniisanju, henje, hensunii, ranttiniiñ, ahhakeyiñ mi.

¹² Pagomi aya paju ho pato henjelo; santḛrlamanii sango mi hendi biitolya niihpana niimi gyotiinii niika abuje haki atañka hataho khadiko khako kopa .

¹³ Pinii ka hataho huna hikha drih atañmi sango bidonii, ho Kristo Jisu kokii huna mohka pyakoniimi Pontius Pailet ka hataho khadiko khako ne,

¹⁴ Ngo niimi lulyike ke lujubiniiñ mi harti ahma dopa biitolya ho sarpa kiine lyayo nii dahepa ngunuka Attoh Jisu Kristo ahtema;

¹⁵ ho siika siimi myodumyolo aya ho kakiñ kendoke khiiniiñja ho Kayeja bo kontii, radde atañka Radde ho attoh atañka Attoh,

¹⁶ hukoho kontiina shiilamasa nii donii ho hiitañ hutoh ho du kone hetrḛ ahchi lama sako, humina miyu kone hetrḛ kapama ho kapa lakiñma. Mohmi kontii khiikiñcho ho ayudahe paka pamiñnii dokiñcho. Amen.

¹⁷ Siika dohadolo soka mingo pakoda, luto mohlumi hentii siiyo hiila, malo mohluka hentiñ lasamanii ka mingo mi hentiñ nayo hojalo Pinii miya huna kapane drihmi ngunumi bitiinii hempyo biike nendupa.

¹⁸ Mohlu aya mi miikiñdo, aya miigo ho mingo dopa, billakellaho ho kobya ho,

¹⁹ hiitañpa atii tiikuñ siibiito atohpa aya liidi rabiidola ahlyinii allopa, niimpalukoda mohlumi sango mi sala dopa niihna jije sango nii.

²⁰ O Timoti, kabiito nii mina niimi kabiitote hiila bitiinii. Apa-ayato piigo ama khaniiñ paniiñ bomi ho niihna chekhola ludonii amuhpa chiniike hiila,

²¹ niimpalukoda hiila siimi luko biidola tonge ngonya dake henje luniiñ hokii. Aroh-aya niiko dokiñcho.