1 TIMOTI 5 - NITI GONTU N.T. (BSI)

Henjemiyu Atañ kiipa Chigiiniiñ

¹ Akhaya miyumi galyayo hojalo harolupato mohmi nunuka aba pa hembiidola; himmeyami anu atañ hiilyañpa khiito,

² akhaya nyimii mi annii atañ hiilyañpa khiito lya, ajañya nyimii mi barmii hiilyañ khiito, hikha dariilo.

³ Khiitolya hiimie atañmi huna jije hiimie nyanii.

⁴ Hiimie kii matiirḛ wiinga malo oho asi dulyi milo, mohlumi kapyopa mohluka henjemiiju miigomi miike nento mohluka atohka uruho ho mohluka annii-aba mi tonge biku kiine toku; niimpalukoda siika siimi Pinii ka kataho lariido.

⁵ Mo huna jije hiimie nii, ho mohmi kontii apa tiikunii, Pinii mi hentiñ la dunii ho miikañ ari miila dunii tiilii biniiñho la kuniiñho allo ayoh karmyañmi;

⁶ hiilamapa mo huna atohmi helyihembyo ho tiilii siidonii shiido kuke mo turla dasudajalo.

⁷ Siimi luto, niimpalukoda mohlumi hang sarpasaniiñ giimadopa.

⁸ Hu kone jalopa matiirḛ mohka heniimyanii mi kalyañ tama, ho luchila mohka atoh uru mi, mo henje mi mapah do ho henjemanii kone mi ayamanii ya.

⁹ Hiimie konepa khiitolya mo matiirḛ nyang alyañkhe anyañmi akha yala lyilyi milo, millo kone kontii ka mihie pa dutii milo;

¹⁰ ho mo mohka aya miigo miiniiñ mika luta nangko laka dunii, kone huna wiinga aso sucha tiinii, helakala mi kakiñla, piniimiyu atañka alih harbinii, pamyotakho giinii atañ mika hempyo miipanii, ho atoh mi kapane aya miigo hoka henga laka miinii.

¹¹ Hojalo sancha hiimie atañmi kelii lyayo; niimpalukoda mohluka sancha lyiho miidhinkliñ Kristo mi chekho kendoke mohlu millo inala herila,

¹² ho hopa mohlu miikhatii hiila helii siikiñ doke mohluka kapyo paka hemme niimi chekho lala.

¹³ Hiimi apalala, mohlu assuale miigomi chingii kendoke, ude penge abi injola, ho assuale kontii mapa hojalo khanjola ho mika miigo ho mulumiile miijola, mohluka lusamanii mi lujola.

¹⁴ Hopa ngo hendo sancha hiimie atañmi millo insukiineto, wiinga biike nento, mohluka ude mi kabii siike nento, ho ahha-banii mi myodu biyo ngunumi cheriidopa.

¹⁵ Niimpalukoda tonge inkunyane kuta Saitan ka kiiliñ ho imbo dupa.

¹⁶ Siisimatiirḛ henjenii nyimii kone kii heniimyanii dukoda huna hiimie nii, mohmi mohlumi hembyuñ kiineto; gyoliñkonii atañmi alluabayo, niimpalukoda hiimi hembyuñ kiine dupa hutiina jije hiimie atañnii.

¹⁷ Amiabañ atañ hutiina sangiigyagii nyadonii uro yapa khiiko kendo, luchila huna tonsḛrkhenyo ho tonsḛr nyadonii;

¹⁸ niimpalukoda piniipota si ludo, “Nunu hiibo nyegomi pupyañyo niida hiika hii elyañ mi nyorlo talyi,” ho, “inniimiinii atañ mohluka injo mi lakiñdo siido.”

¹⁹ Pema khiilii lyayo amiabañ mi nii dahepa anye jalo hingejalo haki bitema miigya tiike hiila.

²⁰ Hiika atañ pakoda hutiina ingyamiigya ho miikañla danii, gato mohlumi miilañruka tadopa, niimpalukoda khiibe atañmi biisola dadopa.

²¹ Pinii ho Kristo Jisu ho kahenii miidopopi ka hataho ngo niimi lubii lyike siika miiju siimi atii biitolya khiingu khiire mapa, henguhere la hang miite mapa.

²² Nyibyaloda alah tenchala tiiliila miilyayo, miyu kone ingyamiigya laka miiko ho miibo lyayo; atohmi dariipa atii siito lya.

²³ Yasie kontii talya yo, hojalo roalha ichuche tanto lya niika erre kiipa ho niika kiirañ achih chiniiñ kiipa.

²⁴ Miyu tonge ka ingyamiigyanii atañ didḛr kadḛr doke, ayakacho kako dopa, hojalo tonge ka ingyamiigyanii atañmi kamihoke kapa dunii.

²⁵ Hiichulipa aya miigo miiniiñ hiitiirḛ didḛrpa kadḛrdo; ho hiika atañhii kadḛr lama dado jalo, mohlu achuñ kotola dola kema.