1 TIMOTI 3 - NITI GONTU N.T. (BSI)

Gyoliñkonii Hoka Ingiimiigiibo

¹ Luniiñsi jije: Hu jalo pa matiirḛ bisop pa lyinala hendo, mo khiiniiñ miigomi miipa hendo.

² Siisi bisop pahañhanko sanii giikiñma, mihie koneka millo, hendi-niikiñdo, dadimiiri, hendimiidi, Hapumibya, lukolanii sariipa lyikiñdo,

³ ow tangii kema, payagaya kema, hojalo yanu kendo, gasupasu kema, ho tiicko hembyo kema.

⁴ Mo atohka uru mi ayapa kagii kendo, mohka wiinga atañmi luniiñtanii ho kapane lembo ho khiiko dopa atiikendo;

⁵ niimpalukoda miyu matiirḛ mohka atoh uru mi niihtañpa ayapa kagii kendo hiimi chima koda, niihtañpa mo Pinii ka gyoliñkonii mi kalyañ talyi?

⁶ Mo niti lyiguh niikiñma, hiilamakoda mo hentii siiniiñ ho gori kendo ho giihi kendo igii mika haliiko ho;

⁷ hiikahaho ho mo ago miyu lo aya khiiko niipa lyikiñdo, hiilamakoda mo sarpa niiho huhila ho igii ka gyoh lo hoko kendo.

Gyoliñkonii Hoka Hembyuñnii

⁸ Deakon atañ tiirḛ hendi nyakiñdo, allyosonye giikiñma, roalha mi abupa diigetange kema, doyapa hiila diibuñ kema;

⁹ mohlu michilamanii ka henje mi atii biikiñdo loda didḛrpa hendi biidola.

¹⁰ Ho mohlumi kapyopa tenka torañ; ho mohlu matiirḛ pahañhañsa giima lyimilo ho mohlumi deakon atañpa miiho kiineto.

¹¹ Nyimii atañ tiirḛ hendi nyakiñdo, nipakoyakema, hojalo hendi-niikiñdo, hikha drih atañ ho lotii kendo.

¹² Deakon atañ mihie kone kontii ka millopa lyikiñdo, ho mohluka oho atañ la uru atañmi aya pa kabii kendo;

¹³ niimpalukoda huna denkipa deakon atañpa sangii donii mohlu atohpa aya daju mi miilii siigiido ho kahe hentiñnanii henje giitota niihna Kristo Jisu ko donii.

Kahe Michimanii

¹⁴ Ngo hentiñdo nyibya loda nunuko ahto do, hojalo ngo siika lukosanii mi kebiilyi nunumi niimpalukoda,

¹⁵ ngo matiirḛ dahii lyimilo, nunumi chinke nendupa niihtañ pana kone Pinii ka ude ho miikiñpakiñ donii, niihna turnii Pinii ka gyoliñkonii nii, rali ho jije ka batiñ pa lyidonii.

¹⁶ Jije Kahe, ngunu khakodu, michilamanii ngunu henjeniimi: Mo asiialyoho kakiñ kotii, yajiyallo ho diigolugo giimatii, miidopopi atañlo kapa kotii, miyuatañ ka punkoho tonsḛrkhenyo kotii, henje kotii dohadoloso, tatukatu dopa chagii kotiiku.