1 TIMOTI 2 - NITI GONTU N.T. (BSI)

Gyoliñkonii hoka Heriinii

¹ Kappyojapa, hokoda, ngo yardu hiika tiiliibiniiñ atañmi, kuniiñ atañmi, Kubiniiñ atañmi, ho payapacho hiila luto hikha miyu atañpa,

² radde atañpa ho hikha hutiina akho pa dunya dunii, niimpalukoda ngunu yanu ho chimie sango sangii kodupa, piniihenju ho kapakohe khiiko biidola.

³ Siikasi aya doke, ho siika siimi taliidoke Pinii ngunuka Lyangur boka kata ho,

⁴ huna hikha miyu atañmi lyangur kiine nandonii ho ahke nenala hendonii jije ka chiniiñho.

⁵ Niimpalukoda Pinii kone sii dusu dunii, ho gondu konesii dusu dunii Pinii la miyuatañ nyika punkoho, miyu Kristo Jisu,

⁶ huna atohmi tupya naniipa bisu tiinii miilañrupa, myodumyolo aya jaho pyakotii.

⁷ Niimpalukoda siika sipa ngiimi kahetii tonsḛrkhenyo niipa ho kiiniñkonii pa (Ngo jije mike lukodunii, Ngo gollu make), Midomiyu atañka tonsḛrbo pa henje la jije nyiho.

⁸ Ngo hendo kapakohe gandaho milobo atañsi kukiñcho, darii alah mi yucha biidola hadiimapa ho gasupasu mapa;

⁹ hiichulipa nyimii atañ tiirḛ gujuaya ho mohlu giikiñcho ho giichañho, adiñmi kagoahupa giiyo malo rupuayyiñ malo tassañtayiñ malo khiiniiñ abitarii hokii mapa

¹⁰ hojalo aya miiju atañ ho, kadiñdopa nyimii huna henjeniika piigomi lukodonii.

¹¹ Nyimii mi chingii kiineto chimie chomyo hikha tiiliisiiniiñmi.

¹² Ngo nyimii atañmi tonsḛr dopa bima lyike malo milobo atañmi otority ho biido pa; mo chimie chomyo pa dukiñdo.

¹³ Niimpalukoda Adam mi kapyopa pupyo, hiikahiiba hosu Eve mi;

¹⁴ ho Adam talubalo komake, hojalo nyimii ke talubalo konii ho talemiilenii.

¹⁵ Hojalo nyimii atañmi lyangur kendo himmeoho buniiñlo, mo matiirḛ biikañ dokoda henjeho ho hensuniiho ho dariiho, miijuluju aya agiñho.