1 PITAR 3 - NITI GONTU N.T. (BSI)

Mihie Millo Atañ

¹ Hiichulipa nunu mihie atañ tiirḛ, tiilii siibito atoh milo ko, niimpalukoda tonge, mohlu aguñ luniiñmi tama siitrḛ, rongkoda lumiñ biitii do aguñ lumapa mohluka mihie atañka henjumiijulo,

² niida mohlu nunuka khiiniiñmi ho addah henju hembyo mi kapa talyi.

³ Nunu ago hoka ajuamyo kapyo mi miigiiyo adiñ yalu, ayyiñ hokii ka kapyo miigiinii, ho abitarii aya giiniiñ lo,

⁴ hojalo ahha ura hoka aya miyu lyula samanii giiju miya giito helakala ka guju ho chimeeñ yajiyallo, niihna Pinii ka kata ho ano khiiniiñ pa lyidonii.

⁵ Hopa bilo darii annii akha atañ hutiina Pinii mi hentiñ nyatiinii atohmi giiju siinyatii ho mohluka millo atañmi tiilii siibii dola,

⁶ Sarah ka Abraham ka luniiñ taniiñ hiilya, mohmi attoh hiila gyobii dola. Ho nunu siisi mohka wiinga atañke nunu matiirḛ miidiko miido koda ho hang nunumi biiso dopa miikiñ ma.

⁷ Hiichulipa nunu millo atañ tiirḛ, nunuka mihie agiñho talii mola samboto, mohlumi khiibii dola ajjuya hiila hembiidola, niimpalukoda niinyi aroh-aya sango mi pensi kosanii, hiikiihiilo niinyi ka kuniiñmi miitiñ madopa.

Miidiko Miikohopa ka Heruheniiñ

⁸ Kamijapa, nunu miilañru, yajiyallo mi konepa giitolya, aroh siila, anubarmii ka hensu henchañho, biinyah ahha lo ho yanu henjulo.

⁹ Diimmah pa diimmah miisi yayo malo cheniipa chesi lyayo; hojalo hiilamapa lyantolya, niimpalukoda siika sipake nunumi gyotiinii, niimpalukoda nunu lyaniiñmi padupa.

¹⁰ Niimpalukoda “Huna sango mi hensu donii ho kapa nandonii aya myodu mi, mohka allyo mi diimmah hokii atiñ siibii to ho mohka aguñmi surupiibi sanii hokii;

¹¹ mohmi diimmah hokii mokur kula ho miidikomi miike nento; mohmi chimie mi meke nento ho hiimi miijo monke nento.

¹² Niimpalukoda Attoh ka amee hii denki mike pyoge dunii, ho mohka yaroo hii mohluka kuniiñ mike tage dunii. Hojalo Attoh ka nyimo hii mogya mapa do hiipa huna diimmah miido nii.”

¹³ Siisi hu hiiko da nunumi ayamapa miidupa hiila nunu matiirḛ nii na miidikonii hiimi miina la hendo koda?

¹⁴ Hojalo nunu matiirḛ heru hensu dojalo denki kiipa, nunu lyanko kendo. Hang mohlumi biiso yo, hang hena yo,

¹⁵ hojalo nunuka ahha ho Kristo mi Attoh hiila khiito. Kiirañ hemmyo giila dato lya lupya siina naniipa huna nunumi gyola lala nunu koka hentiñ giiniimi taka donii, hojalo hiimi ahhakeyiñ lo ho khiibiidola miito;

¹⁶ ho nunu henju mi didḛr pa atii tolya, niimpalukoda niida nunumi ayamapa miichi, hutiina nunuka aya henjumiiju mi chekhola miidonii Kristo ko hiimi hiinyañmohi dopa.

¹⁷ Niimpalukoda siikasi miidiko miigo paka heruheniiñ hii aya yakiñ doke, hiika hii matiirḛ Pinii ka henko hokoda, ayamapa ka miisa niimi hentola.

¹⁸ Niimpalukoda Kristo tiirḛ shiibitii ingyamiigyanii kiipa rongepada miilañ rupa, denki mi ingyamiigya kiipa, niimpalukoda mo ngunumi Pinii ko ahgii dupa, asiialyo mi shiike nela la hojalo yajiyallo ho turke nentii;

¹⁹ niihona mo intii ho tonsḛrtii yajiyallo atañmi patiihude ho,

²⁰ huna kapyo ho luniiñ tamatiinii, Pinii pigiila kalyatii Noah ka myoduho, yasie jaji kahe mika pula dolyi ho, hiikoho hempḛr lama pasu, hiika hii, midiñpinye mi, lyangurtii yasie lo.

²¹ Baptisma laniiñ hii, siika siimi lutiñ nando, siisi nunumi lyangur do, nunuka kacho mi apo hokii lapa do hiilama hojalo Pinii mi yarla didḛr henjupa, Jisu Kristo ka turiturku kuniiñlo

²² huna dariiganda ho chatii kunii ho Pinii ka lahbi alah ho dunii, miidopopi atañka agiñho, otority atañ, ho harchichike hii mohka ura hosu dosu donii.