1 PITAR 2 - NITI GONTU N.T. (BSI)

Turnii Yalañ la Darii Miyu nyi

¹ Hopa hikha kanamapa miiniiñ la surupiibi mi ho lotiimaniimi ho kariñ mi ho hikha nipasiiniiñ mi apa toku.

² Niti wiinga buniiñ hiilyañ, darii yajiyallo ka anyi mi hayato, hiilo nunu sancha ladopa sangopyako lohepa;

³ niimpalukoda nunu henka tiiku Attoh ka helakala mi.

⁴ Mohko ahto, hiika turnii yalañ ho, miyu ka khiipa kuniiñ hojalo Pinii ka kata hoka kahenii ho khiiniiñ;

⁵ ho turnii yalañ chuli nunu atohtiirḛ pencha siito yajiyallo udemi, darii nyibupa, yajiyallo ka membi niimi bidupa nii mina Pinii lariidonii Jisu Kristo kiilo.

⁶ Niimpalukoda siikasi piniipota ho giido: “Kato, Ngo Zayon ho yalañ puhe atii biilyi ke, khonchañ jaho, yalañ kahenii ho khiiniiñ, ho mo huna mohmi henje donii pema hiinyañ dopa atii kema.”

⁷ Nunupa hiikohopa hutiina henje nyadonii, mo khiiniiñ ke, hojalo hutiina henje nyamanii, “Hiika yalañ jahii nii mina udepeniibo khiipa tiikunii hiikahii khonchañ daka rali japa lyido,”

⁸ ho “Yalañ hiika hii miyu mi liichi giido, yalañ hiikahii mohlumi podo giido”; mohlu liichido niimpalukoda mohlu aguñ ka luniiñ tama, mohlu miido paka lyilyi kunii.

⁹ Hojalo nunu kahenii haluke, radde ka nyibu atañ, darii ganda, Pinii ka atoh miyu, niimpalukoda nunumi luko kiine dupa mohka hempḛr aya miigo miiniiñmi huna nunumi gyoliñ tiinii kamo hokii mohka hempḛr kapyo hutoh ho.

¹⁰ Ronge nunu Pinii ka miyu pa lyimane hojalo siisi nunu Pinii ka miyu kuke; ronge nunu aroh mi lariimane hojalo siisi nunu aroh mi larii tiiku.

Pinii ka Miira Atañ

¹¹ Heniiñja, Ngo nunumi yarlyike nyibo ho monkoniipa khiisubiidola asiialyo ka helyihembyo hokii dasa giitolya hiika hii nunuka yallo miya ke gyambo pagii donii.

¹² Aya miiju miya Midomiyu atañka punkoho miito, mohlu nunumi miigya niipa khiilii dojalo, mohlumi nunuka aya miigo miiniiñmi kala lala ho Pinii mi assañdopa mohka ahlyiku allo ho.

¹³ Pinii kiipa atohmi tiilii siibi tolya kapane miyu sangiibomi, hiikahii radde mi akho japa miibii lyija lopa,

¹⁴ malo govonor mi mohka kiiniñ konii, miikhiiñ kiine dupa huna miigya donii ho assañ kiine dupa huna miidiko miido nii.

¹⁵ Niimpalukoda siikasi Pinii ka henjuke miidiko miibii dola nunu adumadopa miikiñ donii chimanii piicha miyu atañmi.

¹⁶ Dasḛr miyu hiilyañ santo, hojalo nunuka dasḛr mi diimmah miiju mi miigiñ naniiñpa biite mapa; hojalo Pinii miira hiilyañ santo lya.

¹⁷ Hikha miyu atañmi khiito. Hensuto anubarmii hiilyañ. Pinii mi biisoto. Radde mi khiito.

Kristo ka Heru Henkiñ nii

¹⁸ Miira atañ, tiilii siibito atoh atañko hikha khiiniiñlo, hela kala bomi kontii mapa hojalo lurubomi tiirḛ.

¹⁹ Niimpalukoda lyanko kuniiñke no matiirḛ Pinii luniiñmi hendi dokoda, no achihmi pigiidu miigo giimapa miilyiho.

²⁰ Niimpalukoda nii miijo biikiñdo siika sokii, nunu matiirḛ miigya dokoda ho hiipa hiko dokoda ho hiimi pigii dokoda? Hojalo nunu matiirḛ miidiko miisudo ho hiipa heru hembi dokoda pigii biidola, nunu Pinii lo lyankodo.

²¹ Niimpalukoda siika sipa nunumi gyoliñtii, niimpalukoda Kristo tiirḛ nunupa heru hembi tii, nunupa katiñ naniiñpa apa bibii dola, niimpalukoda nunumi mohka dako ho dabo monke nendupa.

²² Mo hang ingyamiigya miima sii; mohka nyachu ho hang lugyanii kapa masu.

²³ Mohmika miipyu lyiho, mo lupyu lusima; mohka heru helyiho; mo luluñma; hojalo mo hiimi hentiñne huna kadiko jaho kabiidola halii donii.

²⁴ Mo ngunuka ingyamiigya atañmi bapa bitii mohka apo ho pogyañho, niimpalukoda ngunumi ingyamiigya ho shiike nendu kupa ho denki ho sanke nendu kupa. Mohka une giiko hopa nunumi miipya tiiku.

²⁵ Niimpalukoda nunu ngonyane subuñ chitañ, hojalo siisi subuñ sorniiko ahku doku ho nunuka yallo mika Kabii boko.