1 KORINTIA 9 - NITI GONTU N.T. (BSI)

Kiiniñkonii ka Miigo Lugo

¹ Ngo dasḛr mapeha? Ngo kiiniñkonii mapeha? Ngo ngunu Attoh Jisu mi kapa matopeha? Nunu ngiika Attoh koka miijo mapeha?

² Ngo matiirḛ mipa kiiniñkonii pa lyima siijalo, oha nunupa ngo lyisu dokeha; niimpalukoda nunu Attoh ko ngiika kiiniñkonii ka tiihonanii pa lyido.

³ Siikasi ngiika lutrḛ siina naniiñpa lyido huna ngiimi taka talyi nii.

⁴ Ngunu nii ngunuka diigo tango mi diila tala kema ha ehna?

⁵ Ngunu mihie lo inkuñ kola kema ha, khiibe kiiniñkonii hiilyañ ho Attoh koka anubarmii atañ ho Cepas hiilyañ?

⁶ Malo si Barnabas ngiinyi mi kontii siipeha sandu pa injomiijo miiniiñ hokii apalakiñ ma hiila?

⁷ Huna sipahi lyila miiho donii atoh masu biidola? Hu robalu miidu hang diima pa hiika ahee hiniiñ hokii? Hu dulu kadu kajo lamapa?

⁸ Ngo siimi miyu ka otority lapeha ludonii? Dapo sitrḛ ahiñ pa luma siipeha?

⁹ Niimpalukoda hiila ketola do Mose ka dapo ho, “Nunu hiibo nyegomi pupyañyo niida hiika hii elyañ mi nyorlo talyi.” Siikasi Pinii siih mipeha hena donii ehna?

¹⁰ Siika hikha luniiñsi ngunumi hena lama siipe ha lusu donii? Siikasi ngunu pasu kesu tiinii, niimpalukoda halebanii miyu mi halebabii dola hentiñ dopa ho amoo pinii mi amoo pibii dola hentiñ dopa pijo dokiñdo hiila.

¹¹ Ngunu matiirḛ yajiyallo ka drih nunuka punkoho lilo dokoda, siikasi abu haja dopeha ngunu matiirḛ drihpachi ka amoo pido dokoda nunukokii?

¹² Siimi matiirḛ khiibe nunu kokii kula do koda, ngunu hiimi abu yapa kula kema siipeha? Hojalopa, ngunu siika kugo siimi kuma, hojalo ngunu pigii du niijalo miitiñ miiko saniiñmi Kristo ka ayapuyu ka lembo mi.

¹³ Nunu chimapo hutiina piniiude ho miiho niipa atii tiinii mohlu mohluka diigo piniiude hokii diikiñdo hiila, ho hutiina agyañ ho miiho donii hii membilaka biniiñ hokii diiche monkiñdo hiila?

¹⁴ Hii chulipa, Attoh lutola do hutiina ayapuyu mi gyuko donii hii ayapuyu ka gyujo hokii mohluka sango pa bikiñdo.

¹⁵ Hojalo ngo hang kone hetrḛ siika kula sanii hokii kumake, malo ngo siimi keduniisi sokii hang siika luniiñ siimi kapa dupa hiilama. Niimpalukoda ngiipa shiiniiñ ya aya yakiñdo mi kone lojalo ngiika khansu nii piigopa ngiimi khiima miipa dokoda.

¹⁶ Niimpalukoda ngo matiirḛ ayapuyu mi tonsḛrkhenyo dokoda, hii ngiimi khansu dopa hang bima. Niimpalukoda ngiimi miidopa bitii. Aiya lulyido ngo matiirḛ ayapuyu mi tonsḛr khenyo makoda!

¹⁷ Niimpalukoda ngo matiirḛ siimi ngiika henko miido koda, ngiipa ajju junii hii dokiñdo; hojalo hii matiirḛ ngiika henko homa koda, ngo miigomi khiilii kotola do.

¹⁸ Nii hokoda ngiipa ajju junii dokiñdo? Si kontiisii: ngiika tonsḛrkhenyo ko ngo ayapuyu mi hang lujo lama, hikha ayapuyu ka miijo mi ngo lama.

¹⁹ Niimpalukoda ngo hikha miyuatañ kokii dasḛr siido, ngo atohmi hikha ruka miira pa miisutii, niimpalukoda ngo abuyapa lumiñ biidu pa hiila.

²⁰ Jew atañ ko ngo Jew lyibo mondu, Jew atañmi lumiñ biidu pa; hutiina dapo ho dunii ngo dapo hoka dunii hiilyañ lyibo mondu, ngo dapo ho duma siijalo niimpalukoda dapo hoka duniiñ mi lumiñ biidupa hiila.

²¹ Hutiina dapo ho damanii ngo dapo hoka dama niipa lyibo mondu-Pinii ka dapo ho damapa hiila mapa hojalo Kristo ka dapo ho, ngo dapo hoka damanii atañmi lumiñ biidupa.

²² Ajju agiñho ajju mondu, ngo ajju mi lumiñ biidupa. Ngo hikha drihpa lyidu hikha miyu atañpa, niimpalukoda ngo hikha miina naniiñlo tange mijalo lyangur dupa hiila.

²³ Ngo hikha siika atañ siimi ayapuyu kiipa siike miisu dunii, niimpalukoda ngo hiiko hokii lyaniiñ mi tache kodupa hiila.

²⁴ Nunu chimapo harka siiko ho kone abi kone mi hargo dupa hadu hiila, hojalo kone sii ahmiñayiñ mi labii siidu nii hiila? Hopa hiila harto no hiimi labii dupa.

²⁵ Khelinii miyu kone abi miinyodu hendimiidi mi hikha drih ho. Mohlu siimi miinyada lyula samanii karniiñbyopa mi larii dupa, hojalo ngunu lyula samaniimi.

²⁶ Ayado, hopa ngo harpa harla hamake, ngo kiisuñ ara allyi ho kiimake;

²⁷ hojalo ngo ngiika apo mi uro yapa kiisudu ho hiimi kiimya losudu, niimpalukoda mihmi tonsḛr khenyo lala ngo atoh ya piigo ama dadii la hiila.