1 KORINTIA 7 - NITI GONTU N.T. (BSI)

Mihie Millo Lasu Niimika Takaniiñ

¹ Siisi nunuka piigo nii mina nunu ketiinii. Siikasi ayado milobo matiirḛ nyimii mi tene mado koda.

² Hojalo niimpalukoda helyihembyo dopaka tenkalarka kosa niimi, miyu kone abi atohpa mihie ho nyimii kone abi atohpa millo biisuto.

³ Millo hii atoh ka mihie mi mohka millo ka miigomi miibito, ho hii chulipa mihie hii atohka millopa.

⁴ Niimpalukoda mihie hii atohka apo mi sangii siimake, hojalo millo hiike sangii dunii; hii chulipa millo hii atoh apo mi sangii siima ke, hojalo mihie hiike sangii dunii.

⁵ Kone anya mi ma hiila lulyayo hojalo talii siibii dola myodu myolo mi kabii dola, niimpalukoda niinyi kuniiñ ho henga dupa; hojalo hiira anyeru adiñ siito kulya, hiilamakoda Saitan tenkalarka kendoke hendimiidi papo kopa.

⁶ Ngo siimi hena lake ludunii, miito loda hiila lumake.

⁷ Ngo hendo nunu miilañru ngo chuli dado koda hiila. Hojalo kone abiko atoh atohpa ahmiñayiñ bingu tola do Pinii kokii, kone mi pongelya ho kone mi akoya.

⁸ Mihie millo biima ranii mi la hiimi atañmi ngo ludu siikasi aya yado ke nunu atoh kone kontii pa dusu dokoda ngo chitañ.

⁹ Hojalo mohlu matiirḛ hendimiidi siila makoda, nunu mihie millo biito. Niimpalukoda siikasi mihie millo biiniiñ ya aya yado pigii lama paka henga henkha saniiñ mi.

¹⁰ Mihie millo buku niimi ngo ludu, ngoma hojalo Attoh kokii, mihie hii mohka millo kokii ponsa pa ilya yo

¹¹ (hojalo mo matiirḛ hiila miido koda, mohmi kontii atohpa duke nento, malo mohka millo agiñho ludiñ bito ku) ho millo hii atoh ka mihie mi byasu lyayo.

¹² Khiibe atañmi ngo ludu, Attoh make, hukiina mihie henje manii hokii biidonii, mo matiirḛ niika agiñho dubo nando koda, no mohmi byasu lyayo.

¹³ Huka nyimii kii matiirḛ millo henjemanii hokii biido koda, ho mo matiirḛ niika agiñho dubo nando koda, no mohmi byasu kema.

¹⁴ Niimpalukoda henje manii millo mohka mihie kii dalyi lo darii miitii kuke, ho henjemanii mihie mi mohka millo kii dalyi lo darii miitii ku. Hiilamakoda, nunuka wiinga atañ darii kema, hojalo hiika hii hiipa mohlu darii do.

¹⁵ Hojalo henjemanii dubasiinii matiirḛ apasiina dokoda, apa siike nento; si chitañ lugo ho anu mijalo barmii mijalo lutiñ yo. Niimpalukoda Pinii ngunumi gyotii chimie kiipa.

¹⁶ Mihie, niihtañpa no chindo niika millo mi no lyangur lakiñdo hiila? Millo, niihtañpa no chindo no niika mihie mi lyangur lakiñdo hiila?

Pinii ka Nunu Mika Gyoniiñ Hiilyañ pa Santo

¹⁷ Hiimikontii, kone abi hiila santo sango mi niihtañ pana hiimi Pinii bitii nii, ho niihpana hiimi gyotiinii. Siikasi ngiika miiju ke hikha gyoliñkonii atañ ho.

¹⁸ Kone matiirḛ mohmika gyolyi ho mitupiko tola dotii koda. Hiimi mohka mitupipa laka miiho niimi lapa siichi hiila miike neyo. Kone matiirḛ mohmika gyolyi ho mitupipa koma rankoda. Mohmi mitupiko talyi hiila miike nenyo.

¹⁹ Niimpalukoda mitupiko niiñ jalo mitupiko maniiñ jalo hiimi hang pa khiimake, hojalo Pinii ka lujubiniiñ mika atii niimi ke.

²⁰ Kone abi hiila dato niihtañpa mohmika gyolyi ho mo datii.

²¹ Nunu miira pa dato ha gyolyiho? Pema henayo. Hojalo no matiirḛ tupya kola dokoda, no atohmi tupya siidu pa miito.

²² Niimpalukoda huna Attoh ka gyolyi ho miirapa datiinii hii Attoh ko tupya konii miyu hiilyañke. Hiichulipa huna tupya kotola datiinii hii gyolyi ho hii Kristo ka miira ke.

²³ Nunumi arie bila riitii kuke; miyu ka miira pa lyiyo.

²⁴ Hopa, anubarmii atañ, niihtañpa nunu kone abimi gyotii, hiitañpa Pinii ko dato.

Mihie Millo Biimaranii la Hiimie ka piigo mika Takaniiñ

²⁵ Siisi mihie millo biima ranii ka piigomi, Ngiiko Attoh ka lutolya hiila ka luniiñ nyimasii, hojalo ngo ngiika heniiñmi ludu humina Attoh ka aroh lo henje taje ladopa bitii nii.

²⁶ Ngo hendo siika myodu soka hengahenkha mi kala la mo atoh paya hiila duda dokoda aya kendo.

²⁷ No mihie biidu kuha ehna? Ponsa pa dachi hiila meyo. No mihie biima rañ ehna? Mihie biichi hiila meyo.

²⁸ Hojalo no matiirḛ mihie lalyi milo, no ingyamiigya make, ho nyimii matiirḛ millo indo koda mo ingyamiigya make. Hojalo huna mihie millo lasu donii hiiko kiiddiapiñ ka heru hii dokiñdo, ho ngo hiiko hokii niimi lakhu dupa hiila ke.

²⁹ Ngiika lusa niisi, anubarmii atañ, myodu myolo si tunii lyiku ke; siisi kiija, hutii kiina mihie dunii nunukii nyima niihtañ santo,

³⁰ ho hutiina heru nyadonii nunu heru maniiñ hiilyañ, ho hutiina hempyo nyadonii hempyo maniiñ hiilyañ, ho hutiina riidonii nunu drih nyimanii hiilyañ,

³¹ ho hutiina dohadolo ka drih kiiri miinya donii nunu hiika drih mi miima niihtañ. Niimpalukoda siika dohadolo si lyula ke doku nii.

³² Ngo nunumi hena hokii tupya dupake miidunii. Mihie biima ranii Attoh ka piigo pa hena bidu, niihtañ pana Attoh mi hempyo miipa talyi nii hiila;

³³ hojalo mihie bukunii dohadolo dalyi ka piigo mi hena nyada, niihtañ pana atoh ka mihie mi hempyo miipa talyinii hiila,

³⁴ ho mohka henga nii hii henche siitola do. Ho millo ima ranii annii akha malo nyimii hena nyada Attoh ka piigo mi, niihtañ pana darii pa dachi nii apo la yajiyallo nyimi; hojalo millo inkunii annii akha hii dohadolo dalyi ka piigo mi hena nyada, niihtañ pana atoh ka millo mi hempyo miipa talyi nii hiila.

³⁵ Ngo siimi nunuka aya kiipa ke ludu nii, hang nunumi lutiñ pama ke, hojalo aya miiju mi ayayadopa miipa ho nunuka Attoh mika henche mapa herii niimi henka dopa.

³⁶ Kone matiirḛ hendo koda mo atoh ka mihie biisa bomi miidi ko miima hiila, mohka heniiñ hii matiirḛ latrḛ dokoda, ho hiila miikiñ dokoda, mohmi miike nento mo nii hendo: mohlumi mihie biike nento, hiika hii ingyamiigya make.

³⁷ Hojalo hujalopa latrḛpa mohka ahha ho hendo koda, biima jalo hiila hojalo mohka heniiñmi pigii lado koda, ho mohka ahha ho siimi hendo koda, mohmi nyimuñ pa dake nensu talyi hiila, mo miidi ko miido.

³⁸ Hopa huna mohka mihie biisa niimi biidonii aya siido; ho huna mihie biitema hiila dunii hii hiimi tiirḛ aya yado.

³⁹ Mihie mi radiñ tola do nii dahepa mohka millo sala duchi. Millo matiirḛ siido koda, mo millo lagu lakiñdo humi mo kabyo do, Attoh ko kontii.

⁴⁰ Hojalo ngiika ayakacho kaniihii mo hempyo yakiñdo mo matiirḛ atoh pa dusu dokoda. Ho ngo hendo ngiiko Pinii ka Yajiyallo hii giido hiila.