1 KORINTIA 3 - NITI GONTU N.T. (BSI)

Pinii ka Miira Atañ

¹ Hojalo ngo, anubarmii atañ, nunumi ngo gyola kemarañ yajiyallo ka miyuatañ hiila, hojalo asiialyo ka miyuatañ, Kristo koka himme atañ.

² Ngo nunumi anyi hokii asiñto, alrḛ diigo diisanii hokiima; niimpalukoda nunu hiimi diidupa lyima rane; ho siisi jalopa nunu lyimarañ,

³ niimpalukoda nunu siisi jalo asiialyo kiirañ ke. Niimpalukoda nunuka punkoho kariñ siinii ho hadiimikha dorañ, nunu asiialyo kiima ehna, ho dumiñ miyu miiju hiilyañ miima ehna?

⁴ Niimpalukoda niida kone luchi, “Ngo Pol kii,” ho koneya, “Ngo Apollos kii,” nunu dumiñ miyu siima siipeha?

⁵ Apollos nii hokoda? Pol Nii? Miirasii, mohlukiilo nunu henje nyatii, niihtañpa Attoh kone abimi bitola do.

⁶ Ngo alinii, Apollos yasie binii, hojalo Pinii sii sanke nensu donii.

⁷ Hopa huna mo alie donii malo mo huna yasie bidonii hii hang make, hojalo Pinii kontiisii sanke nensu donii.

⁸ Mo huna ali donii ho mo huna yasie bidonii ahiñ siisu, ho kone abi kapa kendo atoh ka miijo mi niihtañ mo miitii.

⁹ Niimpalukoda ngunu Pinii ka miigo miihiñ ahiñ; nunu Pinii ka aji, Pinii ka ude.

¹⁰ Pinii ka ngiimika aroh-aya biniiñ lo, aya miilaboka miichañ ho ngo liidi mi ratii ku, ho miyu koneya hiiko pencha da. Kiije kone abi hendi nyasa niihtañ pana mo hiimi pencha donii.

¹¹ Niimpalukoda kone hetrḛ liidi rasḛrla racha lakiñma niihna rato kula dokunii, hiika hii Jisu Kristo.

¹² Siisi mih kone matiirḛ pencha dokoda liidi racha biila rupu, ayyiñ, khiiniiñ yalañ, yasañ, liisi, tapo hokii

¹³ kone abika miigo miiniiñmi kakiñ kendo; niimpalukoda Allo hii hiimi lokiñ kendo, niimpalukoda hiika hiimi yamulo yakiñ kendo, ho yamu hii yaka kendo niihtañ miigona kone abi miitiinii hiila.

¹⁴ Miigo miiniiñ matiirḛ miyu kone kii jalo liidi racha ko dola dokoda, mo injomiijo mi kapa kendoke.

¹⁵ Hukii mijalo miigo miinii mi matiirḛ lyabii nekoda, mo alyu siikiñdo, mo lyangur kojalo, hojalo yamu lo lyaka kobii dolasii.

¹⁶ Nunu chimapo nunu Pinii ka piniiude hiila ho Pinii ka Yajiyallo nunuko dudu hiila?

¹⁷ Hu kone jalopa Pinii ka piniiude mi pyadu lochi, Pinii mohmi pyadu lokiñdo. Niimpalukoda Pinii ka piniiude hii dariike, ho hiika piniiude hii nunu ke.

¹⁸ Kone hetrḛ atoh mi talubalo siiyo. Nunuka punko hokii matiirḛ kone siika myodu so mo chila hiila hensu domilo, hiimi mohmi piicha pa lyike nento niimpalukoda mohmi chila kiine dupa.

¹⁹ Niimpalukoda siika dohadolo ka chiniiñhii Pinii pa piigoama, Niimpalukoda hiila ketola do, “Mo chila mi latudu mohluka lyolyi ho,”

²⁰ ho hiira, “Attoh chindo chila miyu ka henju hii piigoama hiila.”

²¹ Hopa kone hetrḛ hentii siinyayo miyu atañka miila niipa. Niimpalukoda hikha drih hii nunu kiisu ke,

²² Pol jalo malo Apollos jalo malo Cepas malo dohadolo malo sango malo shiiniiñ malo siisi ka myodu malo ahsanii myodu, hikha nunu kiisuke;

²³ ho nunu Kristo kii; ho Kristo Pinii kiike.