1 KORINTIA 11 - NITI GONTU N.T. (BSI)

¹ Ngiimi katiñ nanto, niihtañpa ngo Kristo mi katiñ nandu.

Herii Lyiho Dinta Mi Kulu Giito

² Ngo nunumi assañdu niimpalukoda nunu ngiimi kapaneho hempala ho miiju mi atii tiijo biido ngiika nunumika luko niimi.

³ Hojalo ngo nunumi hiila chingii kiine nando miyu kone abika attohja Kristo ke hiila, mihie ka atoh mohka millo ke, ho Kristo ka attoh Pinii.

⁴ Hu milobo jalo huna kudonii malo nyibu hendonii mohka adiñ mi kulu giitola hii mohka attoh khiima miipado,

⁵ hojalo hu nyimii na huna kudonii malo nyibuhendonii mohka adiñ mi kulu giimapa-siikasi ahiñ siidado mohka adiñ mi matiirḛ denge rekoniinyi.

⁶ Niimpalukoda nyimii kone matiirḛ atohmi byoke khompu giima koda, hokoda mo atohka dimmu mi chepa koto; hojalo siikasi matiirḛ nyimii mi khiima miipa domilo dimmu tudii malo denge rekonii, hokoda mohmi byoke giike nento.

⁷ Niimpalukoda milobo mohka adiñ mi kulu giikiñma, niimpa mo Pinii mika kagiñnanii ho tatukatu giinii; hojalo nyimii hii milo bomi ka tatukatugiinii.

⁸ (Niimpalukoda milobo nyimii kokii puma ke, hojalo nyimii hii miloboko hokiike.

⁹ Malo milobo hii nyimii kiipa puko make, hojalo nyimii hii milo bopa ke.)

¹⁰ Hiiko hopa niihna nyimii hii byoke giikiñ donii mohka adiñ ho, niimpalukoda miidopopi kiipa.

¹¹ (Hojalopa, Attoh ko nyimii hii dasḛr make milo boko hokii malo nyimii kokii milobohii;

¹² niimpalukoda nyimii hii milo boko hokii putii, hopa siisi milo bohii nyimii kokii buko do. Ho hikha drih hii Pinii kokii.)

¹³ Atohpa hanka siito; siikasi miidi kopeha nyimii atañpa Pinii mika kulyiho mohka adiñ mi kulu giima paka giinii si?

¹⁴ Dumiñ sanju tiirḛ hiila tonsḛr masu peha nunumi milo boka adiñ obyo paka giinii hii mohmi khiima miipa do hiila,

¹⁵ hojalo nyimii matiirḛ adiñ obyo pa giido koda, hiika hii mohka hentii siina naniiñpa lyima siipe ha? Niimpalukoda mohka adiñ hii mohmika kulu giina naniiñpa lyido.

¹⁶ Mi kone matiirḛ siimi talii makoda, ngunu yohe ya miiju miima ke, malo Pinii ka gyoliñkonii atañ tiirḛ.

Attoh ka Apiñ

¹⁷ Hojalo akañ soka luko koso ngo nunumi assañ malyi ke, niimpalukoda nunuka tonge paka ahkuñ niisi hiika hii aya kiipama hojalo ayamaya paya.

¹⁸ Niimpalukoda, kapyo japa, nunuka gyoliñkonii paka dakuñ lyiho, ngo hiila tapa do nunuka punkoho tache tahe siido hiila; ho ngo tange mi hiila henjedo,

¹⁹ nunuka punkoho khiingu khiire hii do niimpalukoda hutiina aya donii nunuka punkoho hiimi kala dupa hiila.

²⁰ Nunuka tonge paka kapa siilyi ho, siikasi Attoh ka apiñ ma nunuka diiniiñ si.

²¹ Niimpalukoda diilyi ho, kone abi diile siido atoh ka apiñ mi, ho kone hii haya la do ho tonge hii tangii doku.

²² Nii! Nunu kii ude nyinya ma ha diiko tangko pa? Malo nunu Pinii ka gyoliñkonii mi khiima miipa dunii ho mupyu dupa hiila hukiina hang nyima nii? Nii hiila ngo nunumi luchi? Ngiimi nunumi assañ pe la siika sipa? Ma, ngo assañ tama.

²³ Niimpalukoda ngo Attoh kokii lariitii nii mina nunumi bibii lyinii, Attoh Jisu mohmika talubalo lyi ayoh ho mo yatañ mi tula la,

²⁴ ho mo payapacho lula la, mo hiimi petutii, ho lutii, “Siikasi ngiika apoke niihna nunupa. Siimi miitolya ngiimi hempa hengi naniiñpa.”

²⁵ Hii chulipa turla mitrḛ, apiñ diiku lala, lubiido, “Siika turla si niti hemmesiiniiñ ke ngiika ai ho. Siimi kiirañ miitolya, siimi tanto lya, ngiimika hempa hengi naniiñpa.”

²⁶ Niimpalukoda niimkane kiirañ nunu diichi siika yatañ siimi ho tanchi siika turla siimi, nunu gyukodo Attoh ka shiiniiñ mi mohka ahku menda hemi.

²⁷ Hujalopa, hopa, yatañ mi diichi malo turla mi tanchi Attoh kiimi khiima pama pa hii ingyamiigya niipa halii kokiñ do Attoh ka apo la ai nyipa.

²⁸ Miyu mi kapyopa atohmi kaka siike nento rañ, ho diito yatañ mi ho tanto turla mi.

²⁹ Niimpalukoda hu jalopa diido ho tando apo mi chimapa hii diilii talii giido ayakacho kaniiñmi atohka.

³⁰ Hiipa niihna abuje nunu ajju do ho achih nyadonii, ho tonge hii shiine kuta.

³¹ Hojalo ngunu matiirḛ atohmi jije hanka siido koda, ngunu halii kokiñma.

³² Hojalo niida ngunu Attoh lo halii kochi, ngunu diikhiiñ lukhiiñ kotii ku niimpalukoda ngunumi dohadolo ka agiñho halii hanta koma dopa.

³³ Hopa hokoda, ngiika anubarmii atañ, niida nunu diidu pa ahkuñ siichi, kone anyañ mi kalya siito

³⁴ mi kone matiirḛ haya dokoda, mohmi ude ho diike nento-hiila makoda nunu halii kodupake ahkuñ siidonii. Khiibe drih atañka piigo mi ngiika ahlyi ho ngo luko lyaso.