1 KORINTIA 10 - NITI GONTU N.T. (BSI)

Puchinii Atañ Mika Luluñnii

¹ Ngo nunumi chinke nenado, anubarmii atañ, ngunuka aba atañ hikha jomii ka ura ho dane, ho hikha miilañru yasie siimie mi repo bobiine,

² ho hikha miilañru baptisma labiine Mose ko jomii la yasie siimie nyiho,

³ ho hikha miilañru yajiyallo ka diigo ahiñmi diibiine diigo

⁴ ho hikha miilañru yajiyallo ka tango mi tahiñ biine tambiine. Niimpalukoda mohlu yajiyallo hokii tambiine Yalañ niihna mohlumi imbo montiinii, ho hiika yalañ hii Kristo.

⁵ Hojalopa abuyami Pinii hempyo biimane; niimpalukoda mohluka shiima hii jabyo ho kupa kuya tola done.

⁶ Siisi siika drih atañsi ngunupa luluñ naniiñ pake lyidonii, diimmah miigomi hema yapa hiila mohluka miiniiñ chulipa.

⁷ Iche hetrḛ puchiniimi herii niipa lyilyayo tange ka miinii chuli; hiila ketola do, “Miyu atañ diidu tandupa duha nyatii ho nasu sodu pa guri nyatii.”

⁸ Ngunu iche hetrḛ ingyamiigya henju ho miibḛr nyamasa tonge ka miiniiñ chitañ, ho nyikhañhela jariñhe allo lohe pada shiine.

⁹ Ngunu Attoh mi tenka kema, tange ka miiniiñ chuli ho tabu lo takhii konya biine;

¹⁰ malo budu kema, tange hiila miitii ho miidu loko biinyane miiduloniilo.

¹¹ Siisi siika drih atañsi lyitii mohlumi ka luluñ naniiñpa, hojalo hiika atañmi ketola do ngunu mika kakiñ naniipa, huko hona santuñ ka sanja sanii hii ahkiñ donii.

¹² Hopa kone abi huna hensu donii mo da hiila hii hendito hiila makoda giihi diike.

¹³ Hang tenkalarka hii nunumi hamelokiñ make niihna miyuatañ koka amayanii. Pinii lotiike, ho mo nunumi tenkalarka kiine kemake nunuka dagii lasa manii hokii, hojalo tenkalarka ka agiñho lembo tiirḛ pabi kendoke hargii kopa, niimpalukoda nunumi hiimi pigii ladopa.

¹⁴ Hopa, ngiika heniiñja, puchinii atañ mika heriiniimi apa tolya.

¹⁵ Ngo ludu dadimiiri nii miyu hiilyañ; atoh atoh hanka siinya tolya niihna ngo ludonii.

¹⁶ Lyaniiñ ka turla si nii mina ngunu lyantii kunii, siikasi miibo kuma siipeha Kristo ka ai ho? Yatañ nii mina ngunu petu donii, siikasi miibo kuma siipeha Kristo ka apo ho?

¹⁷ Niimpalukoda hiiko yatañ pere sii dosu donii, ngunu hutiina abuje danii apo kone sii, niimpalukoda ngunu hikha yatañ pere mika diibonii.

¹⁸ Isrel daka miyu atañmi henka to; hutiina membi niimi diinya donii hii agyañ ho miibo kuma siipeha?

¹⁹ Nii mipe hokoda ngo ludo niisi? Diigo puchiniimi ka biniiñsi hang drihpeha malo puchiniisi ya hang drihpeha?

²⁰ Ma, ngo hiila ludu niihna henjemanii atañ membi donii mohlu igii mi bido ho Pinii mima. Ngo nunumi igii ka agiñho diihiñmonii pa lyima dokoda hiila hendo.

²¹ Nunu Attoh ka turla lo la igii atañka turla lo tarla kema. Nunu Attoh ka diitananii hola igii ka diita naniiñ ho diibo lakiñma.

²² Ngunu Attohmi kariñ dopa miichi peha ehna? Ngunu mohmi alḛr yadoha ehna?

²³ “Hikha drih hii aya siido,” hojalo kapane drih hii piigo ahgii make. “Hikha drih aya siido,” hojalo kapane drih sancha giimake.

²⁴ Hopa kone hetrḛ mo atoh ka aya kiipa meyo, hojalo mohka ariapii ka aya kiipa.

²⁵ Diito niijalo kiirimiiko yoh pyudo ho hang taka tamapa henkala.

²⁶ Niimpalukoda “kiiddiapiñ si Attoh kiike, ho hikha hoka donii hii.”

²⁷ Henje manii kone matiirḛ nunumi alyiñapiñ dudupa gyolyi milo ho inchi hiila hendo koda, diito nii nunuka hataho joliñtii hang taka tamapa henkala.

²⁸ (Hojalo mi kone matiirḛ niimi lulyi milo, “Siikasi membi koho hoka biniiñ,” hokoda hiika miyu pa henka biidola huna nunumi luko tiinii, ho henkanii kiipa

²⁹ Ngiika lusa niisi mohka henka kiipa, niikii mapa-hiimi diilya yo.) Niimpa ngiika dasḛrpaka danii mi kone yaka heniiñ lo luko kochi?

³⁰ Ngo matiirḛ payapacho luko lubo dokoda, niimpa ngo ma luchi nii mina ngo payapacho lutii kunii?

³¹ Hopa, nunu diichiha malo tanchiha, malo niijalo nunu miichi, miito hikha rumi Pinii mika assañ giina naniiñpa.

³² Ahiare miipayo Jew atañmi malo Grik atañmi malo Pinii ka gyoliñkonii mi,

³³ niihtañpa ngo hikha miyu atañmi hempyo miipa dupa miidu kapane ngiika miiko ho, ngiika aya kiipa memapa, hojalo abujepa, niimpalukoda mohlumi lyangur kiine dupa.