1 KORINTIA 1 - NITI GONTU N.T. (BSI)

¹ Pol, Pinii ka henko jaho Jisu Kristo paka kiiniñkonii paka gyokonii, ho ngunuka abañ Sostenes,

² Pinii ka gyoliñkonii Korint hoka donii, hiika atañmi hutiina Jisu Kristo ko dardḛtiiku nii, piniimiyu hiila tonge paka gyokonii hikha hiika atañ agiñho kapakohe ganda siiko ho Attoh Jisu ka armyañ mika gyoko ho, anye ruka Attoh ngunukii ho mohlukii:

³ Nunumi aroh-aya la chimie mi bikiñcho Pinii ngunu Aba la Attoh Jisu Kristo kokii.

Kristo Koka Lyaniiñ

⁴ Ngo Pinii mi payapacho ludu kiirañ nunupa Pinii ka aroh-aya kopa nii mina nunumi Jisu Kristo ko bitiinii,

⁵ kapa koye lembo ho nunumi mingo dopa miitii hikha lula ho hikha chilaho

⁶ Kristo mika pyako nii hiitiirḛ nunuko kapa tiiku

⁷ niimpalukoda nunumi yajiyallo ka ahmiñayiñ ho papo kiine diila hiila, ngunu Attoh Jisu Kristo mika kakiñ siiniiñmi nunuka kalyala doho;

⁸ huna nunumi kamikalo lohe turdo atii kendo nii, Attoh Jisu Kristo ka allo ho hang pa hansa giima dopa.

⁹ Pinii lotii ke, hulona nunumi mohka Oho agiñho dukuñ mondo pa gyotiinii, Jisu Kristo ngunuka Attoh.

Gyoliñkonii Hoka Chepya siiniiñ

¹⁰ Ngo nunumi lyarlyi ke, anubarmii atañ, ngunuka Attoh Jisu Kristo ka armyañ pa, hikha nunu taliito ho nunuka punkoho chekho siiyo, hojalo nunu tongepa ahha puhe pa giito ho ahiñpa ayakacho mi kato.

¹¹ Niimpalukoda hiila ngiimi lukoda Klos miyuatañ kokii nunuka punkoho pasudo hiila, ngiika anubarmii atañ.

¹² Nii hiila ngiika lusa niisi hiikoda kone abi nunu hiila ludo, “Ngo Pol kiisu,” malo “Ngo Apollos kiisu,” malo “Ngo Cepas kiisu,” malo “Ngo Kristo kiisu.”

¹³ Kristo mi tache tiipeha? nunupa Pol leda kotii peha? Malo nunu Pol ka armyañ papeha baptisma latiinii?

¹⁴ Ngo payapacho ludu ngo kone mitrḛ baptisma bima nunumi Krispas la Gayas mi opalala la;

¹⁵ hiilamakoda koneabi lududo nunu ngiika armyañ pa baptisma latii hiila.

¹⁶ (Ngo Istepanas ka uru atañ mitrḛ baptisma bitii. Hiikahaho ho, ngo chima ngo mih khiibe mi baptisma bitii tapadu.)

¹⁷ Niimpalukoda Kristo ngiimi baptisma bidupa kiiniñ make hojalo ayapuyu mi tonsḛrkhenyo kiine dupa, ho kiiddiapiñ ka chila loma, hiila makoda Kristo ka pogyañ ka hiika harchichike hii ara kendoku.

Kristo Harchichike ho Pinii ka Chilananiiñ

¹⁸ Niimpalukoda pogyañ ka aguñ si piigoama hiipa hutiina lyunya donii, hojalo ngunupa hutiina lyangur kotii kunii siikasi Pinii ka harchichike pa lyido.

¹⁹ Niimpalukoda hiila ketola do, “Ngo chilamiyu ka chiniiñmi pyadu lochi, ho piibimiyu ka piibi mi ngo lapa yachi.”

²⁰ No chilamiyu da? No pagenii da? No da siika santuñ soka cheriibo? Pinii piicha mi siika dohadolo ka chila pa miima siipeha ehna?

²¹ Niimpalukoda, Pinii ka chilaho, dohadolo hii Pinii mi chila lo chimake, si Pinii mi hempyo miipa do piicha paka ngunuka tonsḛrkhenyo niilo lyangur dupa hutiina henje nyadonii.

²² Niimpalukoda Jew atañ kagiñnanii kunya da ho Grik atañ chila mi menyada,

²³ hojalo ngunu Kristo ka leda niimi tonsḛrdu, Jew atañ paka liichi nanii ho Midomiyu atañ pakoda piigoama,

²⁴ hojalo hutiina gyotii tiinii, anyeru Jew la Grik, Kristo Pinii ka harchichike ho Pinii ka chila.

²⁵ Niimpalukoda Pinii ka piicha hii miyu atañmi hentola chila yado, ho Pinii ka ajju hii miyu atañmi tamo yado.

²⁶ Niimpalukoda nunu mika gyoniiñ mi henka tokurañ, anubarmii atañ; nunu abuje chilamane kiiddiapiñ ka henju ho henka siido koda, nunu tamo mane, nunu halugiira ka khiiko ho bukomanii;

²⁷ hojalo Pinii kahetii dohadolo hoka piicha mi chila mi hiinyañ miipyu dupa, Pinii kahetii dohadolo hoka ajju mi tamo atañmi hiinyañ miipyu dupa,

²⁸ Pinii dohadolo hoka atu ho khiipa niimi kahetii, ho piigo giima hiiniiñmi, niimpalukoda piigogiido hiila ka drih luniiñmi piigogiima hiila miipa dupa,

²⁹ niimpalukoda miyumima kone mitrḛ hentii siima yapa Pinii ka agiñho.

³⁰ Mohke nunuka sango sanginanii Kristo Jisu ko, humina Pinii ngunuka chilananiiñ pa miitiinii, ngunu mika denkigiiko ho dardḛkunii ho tupyabiniiñ ho;

³¹ hopa, hiila keto laka doniiñ hiilyañpa, “Huna khansu donii, Attoh paya khanto.”