1 JON 3 - NITI GONTU N.T. (BSI)

Pinii ka Wiinga Atañ

¹ Kato niihtañ hensunii Aba ngunumi bitii, ngunumi Pinii ka wiinga hiila gyoko dopa; ho hiila ngunu, niimpa dohadolo ngunumi chima lukoda siika atañsi mohmi chima kopa.

² Heniiñja, ngunu Pinii ka wiinga atañke siisi; siikasi ahma ranke niihtañ kendo ngunu hiila, hojalo ngunu chindo mohka ahlyi kuho ngunu mo chuli kendo, niimpalukoda ngunu mohmi kapa kendo mo niihtañ hiitañpa.

³ Ho kone abi huna mohko hentiñ mi atii donii atohmi darii miisudu niimpalukoda mo darii.

⁴ Kone abi huna ingyamiigya donii hiikahii Pinii ka dapo mi takhodo; niimpalukoda ingyamiigya niisi dapo mika takhoniiñ.

⁵ Nunu chindo mo ahtii ingyamiigya niimi lapa biidupa hiila, ho mohko hang ingyamiigya giima.

⁶ Kone hetrḛ huna mohko giige donii ingyamiigya nyama; kone hetrḛ huna ingyamiigya donii mohmi kapama malo mohmi chima.

⁷ Himme atu atañ, kone lotrḛ talubalo koyo. Mo huna miidikomi miidonii hii denki ke, niihtañpa mo denki.

⁸ Mo huna ingyamiigya donii hii igii kokii; niimpalukoda igii si lotu jaho hokii ingyamiigyanii. Pinii ka Oho ahdo paka lyiniiñsi igii ka miigo miiniiñmi pyadu dupa hiila.

⁹ Kone hetrḛ huna Pinii lo buko tiinii ingyamiigya ma; niimpalukoda Pinii ka henju hii mohko giigela do, ho mo ingyamiigya lakiñma niimpalukoda mo Pinii loka buko nii.

¹⁰ Siika silo kala lakiñdo huna Pinii ka wiinga hiila, ho huna igii ka wiinga: hujalopa miidiko miiniiñmi miima hii Pinii kiima, malo hii huna atohka anubarmii mi hemanii.

Koneanyañ mi Hensuto

¹¹ Niimpalukoda siika sike puyu nunuka tapanii lotuja hokii, hiikahii ngunu kone anyañmi hensu kendo hiila,

¹² ho Ken chuli masa huna diimmah kokii nii ho atoh ka anu mi mensu tii. Ho niimpa mo mohmi membiine? Niimpalukoda mohka atoh miiniiñ hii diimmah ho mohka anu hii denki tii.

¹³ kahotamo nyayo, anubarmii atañ, dohadolo si nunumi kana mapa miido hiila.

¹⁴ Ngunu chindo ngunu shiiniiñ hokii impo biila sango ho daku, niimpalukoda ngunu anubarmii mi hendu. Mo huna hensu manii shiinii ho giige tola do.

¹⁵ Kone abi huna atohka anubarmii mi kanamapa miidonii hii miyumeniike, ho nunu chindo miyumenii kone kotrḛ santḛrlamanii sango giigela doma mohko.

¹⁶ Siika silo ngunu chindo hensu niimi, mo ngunupa mohka sango mi hempa bitii hiila; ho ngunu tiirḛ ngunuka sango mi anubarmii atañpa hempa bikiñdo.

¹⁷ Hojalo mihkone matiirḛ dohadolo ka drihpachi biido koda ho mohka anubarmii hiimi anna do hiila kapa dokoda, hojalo mohka ahha mohmi hiimi bina mapa hendo koda, niihtañpa Pinii ka heniiñ hii mohko do hiila luchi?

¹⁸ Himme atu atañ, kiije ngunu hensu masa aguñlo kontii malo luniiñlo kontii hojalo miibii dola ho jije lo.

Pinii ka Hata hoka Haroniiñ

¹⁹ Siika silo ngunu chindo ngunu jije kii hiila, ho hiirapa hatii lupa do ngunuka ahha mi mohka hataho

²⁰ niidajalo ngunuka ahha ngunumi halii talyi; niimpalukoda Pinii ngunuka ahha mi kaye yake, ho mo chindo kapanehemi.

²¹ Heniiñja, ngunuka ahha matiirḛ ngunumi halii makoda, ngunukii Pinii ka hataho hatiido;

²² ho ngunu padu mohkokii niijalo ngunu kuchi, niimpalukoda ngunu mohka lujubiniiñmi atii biidu ho niihna mohmi hempyo miipa donii hiimi miidu.

²³ Ho siikasi mohka lujubiniiñ, hiikahii ngunu henje kendo mohka Oho Jisu Kristo ka armyañ mi ho kone anyañmi hensu kendo, mohka ngunumika lujubiniiñ hiilyañ.

²⁴ Hikha hutiina mohka lujubiniiñ atii biidonii hii mohko giigedo, ho mo mohlukoho. Ho siika silo ngunu chindo mo ngunuko giigela do hiila, Yajiyallo nii mina ngunumi bitii nii.