Yosua 24 - Ebaibuli

¹ Kotukok Yosua atekerin kere nuka Isirael Sekem, konyarau imakio luka Isirael, ka ikapolokokec ka ikatubokokee, ka ijakakee; kitodiaros akonyen nuka Edeke,

² Kotema Yosua ituŋa kere atiar, “Inera EJAKAIT, Edeke loka Isirael kwanata ebe, ‘Eboiete kolo lukapapaakus kokekwa loka Ecor, ŋes Tera, papa loka Aburaam, papa da loka Nakor: apotu kijaanakis icedekesio.

³ Kasodi aitonyoun papaakus Aburaam kokekwa loka Ecor, kenarcnik ŋes anatar akwap kere naka Kanaan, ketupuu aurike, kainak da ŋes Isaak.

⁴ Kainak Isaak Yakob ka Esau: kainak Esau emoru Seir airum; abu Yakob ka idweke kolototo Misiri.

⁵ Abu kejuka Musa ka Aaron, ketican Misiri, kwape ajaatar nuabu keswama kaŋina: akaulo kanun abu ketolom yes,

⁶ Abu ketolom lukapapaakus koMisiri: ipotu kodoloto aŋolol: kibwaput Imisirian lukapapaakus kagalin ka ikebwanenok kiton Aŋolol Nakarenan,

⁷ Kosodete kiworoto EJAKAIT, abu kibwaik amuton kidinikus ka Imisirian, kitobonik aŋolol mamakee, korapia kes; apotu akusikonye koanyut nuabu eoŋ keswama koMisiri: kiboioto da yesi kamodiŋ apaarasia nuipu.

⁸ Kasodi aitolomun yes akwap naka Imorain, lueboiete kokekwa loka Yorodan; kitijioto yes: abu kejaik kes akanikus, kirumata da yesi akecekwap; abu kamudia kes kakonyenekus.

⁹ Kosodi Balak, okoku loka Sipor, ekabaka loka Moab, anyoun asurokin Isirael; kijuka anyaraun Balaam okoku loka Beor aiken yes:

¹⁰ Konye mam abu kapupok Balaam; tape kisireretji yes: kwaŋin kayu yes kakanike.

¹¹ Ipotu kodokata Yorodan, kodoloto Yeriko: apotu ituŋa luka Yeriko kitiiioto yes, Emorait, ka Eperisit, ka Ekanaanit, ka Ekitit, ka Egirugasit, ka Ekibit, ka Eyebusit; abu kejaik kes akaninikus.

¹² Abu keiuka ekaturuturut kinarenekus, loabu kirenea kes kakonyenekus, kes ikabakan iarei luka Imorain; mere kekilenikus karaida akabwakus.

¹³ Abu kainak yes akwap namam ipotu kitaaritos, ka ireria lumam yes kidukito, iboiete da kotoma; inyamete imusabibun ka iseitunin lumam yes kiraito.’

¹⁴ “Aso do koyonata EJAKAIT, kijaanakis ŋes kamunonut ka abeit: kolemasi idekesio luejaanakinete lukapapaakus kokekwa loka Ecor, koMisiri da; kijaanakisi yesi EJAKAIT,

¹⁵ Konye arai kironikinit yes aijaanakin EJAKAIT, koseutu yesi lolo loijaanakinete; arai bo idekesio luejaanakinete lukapapaakus luajaas okekwa loka Ecor, arai idekesio luka Imorain, luibojete yesi kakwapukee: konye eoŋ ka ekakal, kijaanakini EJAKAIT.”

¹⁶ Kobonokis ituŋa ebe, “Madi akuj isio aijal EJAKAIT, aijaanakin idekesio ice;

¹⁷ Naarai EJAKAIT Ewokodeke, ŋol ŋes lokitolomuni oni ka lukapapaawok kakwap nako Misiri, kotogo da loka ebulesene, loeswamai aanyuneta nun nukos kakonyenekosi, loabu kidar oni korot kere lokitorit, kotuna da kere lukipou ketoroto mamakee:

¹⁸ Abu EJAKAIT kireŋea ituŋa kere kakonyenewok, kes Imorain lueboiete kakwap: kanuka ŋun kijaanakini isio da EJAKAIT; naarai erai ŋesi Ewokodeke.”

¹⁹ Kotema Yosua ituŋa atiar, “Mam yes ipedorete aijaanakin EJAKAIT; naarai erai Edeke lokalaunan; erai ŋesi Edeke lokekolo; mam isionie aibucaretakus karaida adiakaretakus.

²⁰ Arai kijalata yesi EJAKAIT, kosodete aijaanakin idekesio lumo, ibelokini do ŋesi aiswamakin yes nukaronok, kimudiari da yes, kedau ŋesi aiswamakin yes nukajokak.”

²¹ Kotemasi ituŋa Yosua atiar, “Mam; konye kijaanakini isio EJAKAIT.”

²² Kotema Yosua ituŋa atiar, “Iraas yesi ikajenak kamakus ebe iseut yesi EJAKAIT aijaanakin ŋes.” Kotemasi atiar, “Kirai ikajenak.”

²³ Kotema atiar, “Aso do kolemasi idekesio lumo luejaas mamakus, kogoŋakis ikusitauon mama ejai EJAKAIT, Edeke loka Isirael.”

²⁴ Kotemasi ituŋa Yosua atiar, “Kijaanakini EJAKAIT Ewokodeke, kirimari da ekeporoto.”

²⁵ Kwaŋin kitutukoto Yosua kituna kapaaran kaŋin, kisilak kes ekisil ka aicorakinet ko Sekem.

²⁶ Abu Yosua kiwadik akiro nun kere oitabo loka ekisil loka Edeke; kolem amoru naati, kosipok nen kwap kelua loedunyas kaibois nakalaunan naka EJAKAIT,

²⁷ Kotema Yosua ituŋa kere atiar, “Koany, eraun amoru na akajenan kamawok; naarai apupu akiro kere nukilimok EJAKAIT oni: eraun akajenan kamakus, kinyeis aiŋer Ekusideke.”

²⁸ Kwaŋin kotwar Yosua ituŋa, kolot ninitunanan airumeteke.

²⁹ Kosodi kokau kanun, kotwana Yosua okoku loka Nun, ekejaanakinan loka EJAKAIT, korai loka ikar akwatat ka itomon.

³⁰ Kidaikisi ŋes oikor loka airumeteke Timunat-sera, loejai akwap nakiukon naka Epuraim, kari naka agolitomei naka eronat loka Gaas.

³¹ Kijaanak Isirael EJAKAIT apaarasia kere nuka Yosua, ka apaarasia kere nuka imakio luabusito adepar Yosua, luajenete aswam kere naka EJAKAIT, naabu kiswamak Isirael.

³² Akojo da nuka Yosep nuayanaunete idwe luka lsirael koMisiri, apotu kesi kidaikis Sekem, alup nuabu Yakob kogwel kaneejaas odwe luka Kamor papa loka Sekem atutubeta akwatat nuka apesan: koraunos airumet naka idwe luka Yosep.

³³ Kotwana Eleasar okoku loka Aaron; kidaikisi ŋes oukot loka okokuke Pinekas, loainakinitai ŋes kakwap nakiukon naka Epuraim.