Yokana 4 - Ebaibuli

¹ Aso nakejenunia Ejakait ebe eirasi Iparisayon ebe adum Yesu ikesisiak luipu aitelekar Yokana ka aibatis,

² (Kwabo mam Yesu elopet kibatisai, dimarai ikekesisiak,)

³ kinye Yudaya kolot bobo Galilaya.

⁴ Kibusakinit ŋes aitor kidiŋ Samaria.

⁵ Kosodi kodol ore loko Samaria, loenyaritai Sukar, loaapias kamana nakeinakini Yakob okokuke Yosep.

⁶ Kejai nen atan naka Yakob, aso naarai kepasit Yesu kanuka alositeke, kiboikin atan. Kerai bala esawa lokikanyetekape.

⁷ Kobu aberu naSamariat aiwok akipi. Kotema Yesu ŋes atiar, “Ae akipi kamat.”

⁸ Naarai kelositos ikekesisiak ore agwel inyamat.

⁹ Kotema aberu naSamariat ŋes atiar, “Ikonakini ai ijo Eyudayat kilipi eoŋ akipi, eoŋ naarai Asamariat?” Naarai mam Iyudayan imorikikina kIsamarian,

¹⁰ Koboŋok Yesu kotema atiar, “Arai kijeni ainakinet naka Edeke, ka ŋol da lokibala ebe, Ae akipi kamat, tikilipi ŋes, tikiinak jo akipi nukajarak.”

¹¹ Kotema aberu ŋes atiar, “Ejakait, emamei jo ibore yeniwokunet, idul atan da; aso idumuni kai akipi ŋun nukajarak?

¹² Ipol kereka ijo aitelekarit papaakosi Yakob, loabu koinak sio atan na, ŋes da elopet komat akipike, nepepe kikedwe, ka ikebaren da?”

¹³ Koboŋok Yesu kotema ŋes atiar, “Ŋin yenemasi akipi nu ejaki bobo akur,

¹⁴ konye yenemasi akipi nuainakini eoŋ, mam ejaki akur ikar kere; konye akipi nuainakini eoŋ eraunete kotomake atan naka akipi nuibulubulitos kiton aijar namam edaun.”

¹⁵ Kobala aberu ŋes ebe, “Ejakait, koinakinai eoŋ akipi ŋun kenyek akur aijak, karaida abunenen ne aiwok akipi.”

¹⁶ Kotema Yesu ŋes atiar, “Kolot, konyarau okilenikon, koboŋu ne,”

¹⁷ Koboŋok aberu ebe, “Emamei eoŋ ekiliokit.” Kotema Yesu atiar, “Inera abeit ebe, Emamei eoŋ ekiliokit;

¹⁸ naarai kijaas kikiliok ikany, ŋol da loijaatar kwana mam erai okilenikon; inera nu abeit.”

¹⁹ Kotema aberu atiar, “Ejakait, aanyun ebe irai enabi,

²⁰ Kemaete lukapapaakosi koroŋat kalo; ibalasi yesi ebe Yerusalem ŋes aibois naibusakinit amaia.”

²¹ Kotema Yesu ŋes atiar, “Toto, kiyuunai, ebunit esawa lomam imaiata bobo Papa koroŋat kalo karaida Yerusalem,

²² Imaete yesi yenimam ijenete; kimai isio yenikijeni, naarai ebunit aitajario kotoma oYudayan.

²³ Konye ebunit esawa, ejai da kwana, loemaiata ikamaak lukabeit Papa, kotoma omoyo ka abeit, naarai emoot Papa ituŋa luikote nen aima ŋes.

²⁴ Erai Edeke Emoyo, ŋul da luemaete ŋes, ibusakinit aima kotoma omoyo ka abeit.”

²⁵ Kotema aberu ŋes atiar, “Ajeni ebe ebunit Mesia (ŋol Ioenyaritai Kristo); naebunio ŋesi kipukokini sio akiro kere.”

²⁶ Kotema Yesu ŋes atiar, “Eoŋ lopelo lokinera kajo.”

²⁷ Atipet kopotu ikekesisiak, koumokis naarai kineras kaberu, konye mam loabu kolim ebe, “Ikoto inyo?” Arai ebe, “Kanukinyo ineratar kaŋes?”

²⁸ Aso kinyek aberu akemot, kolot ore, kolimok ituŋa ebe,

²⁹ “Kopotu, koanyut etuŋanan lokalimoki akiro kere nukeswamaenenei. Epedori kereka lo araut Kristo?”

³⁰ Kolomutu kesi kore koloto mamakeŋ.

³¹ Kapak kaŋin kiŋaiŋaata ikesisiak ebe, “Rabi, konyam.”

³² Konye kotema kes atiar, “Ejaas eoŋ inyamat lumam yes ijenete.”

³³ Kineranakinos ikesisiak ebe, “Eiai ca nat yeneinunit ŋes inyamat?”

³⁴ Kotema Yesu kes atiar, “Ikanyamat kes luta, aswam nuekot lokejukuni, ka aitodol da akeswam.

³⁵ Mam kereka ibalasi yesi ebe, ‘Eroko esalito ilapio iwoŋon, kodoli aidweny’? Katemari yes atiar, Kikeutu akusikonye, koanyut amanat ebe adaut areŋeun adwenyio,

³⁶ Eropio ekadwenyan, etukonokini araito kanuka aijar namam edaun, tetere iyalamikinos ekayean ka ekadwenyan nepepe.

³⁷ Naarai erai akirot nakabeit ebe, ‘Eyei ice, edwenyi da ice.’

³⁸ Abu kejuka yes aidweny ŋun numam kitaaritotor; konye kitaaritos ice, ilomakis yesi aitaaritoikec.”

³⁹ Kiyuut Isamarian luipu kotoma ore kaŋol kanuka akirot naka aberu, nakitejenunit ebe, “Abu kalimok akiro kere nukeswamaenenei.”

⁴⁰ Aso nakeponiata Isamarian mamakeŋ, kiŋaiŋaata ŋes asalakin kakes; kosalak do nen apaarasia aarei.

⁴¹ Kiyuut ice luipu kanuka akekirot,

⁴² Kotemasi aberu atiar, “Kiyuunit kwana, mere kanuka ekoniiner bon, naarai kiira isio ikulepek, kijenu da ebe abeit erai ŋol Eketajaran loka akwapisinei.”

⁴³ Akaulo kapaarasia kaŋun aarei konyou kanen kolot Galilaya.

⁴⁴ Naarai kitejen Yesu elopet ebe mam enabi eyoŋio kobukec.

⁴⁵ Aso nakedolio Galilaya, kisukunyikis Igalilayan, naarai apotu koanyutu akiro kere nukiswamai koYerusalem kopucit, naarai kelosito ŋul da opucit.

⁴⁶ Kobu bobo Kana loko Galilaya mama etuluoria akipi ebino. Kojai etuŋanan lokapolou Kaparanaum, lokejai okokuke edeka.

⁴⁷ Kiira ŋol ebe ebunit Yesu Galilaya anyoun koYudaya, kolot neejai kiŋaiŋa aijesar aitaŋaleun okokuke, naarai keapikinit atwanare,

⁴⁸ Kotema Yesu ŋes atiar, “Arai mam ianyunete aanyuneta ka nukaumokin, mam iyuunete cut.”

⁴⁹ Kobala lokapolou ebe, “Ejakait, kijesar eroko ikakoku ketwana.”

⁵⁰ Kotema Yesu ŋes atiar, “Kolot; ejari okokukon.” Kiyuu etuŋanan akirot nakelimokini Yesu ŋes, kolot,

⁵¹ Kosodi napijesar kiriamakinos kikebulesin, lukebalas ebe ejari okokuke.

⁵² Kiŋit kes esawa lokegeunia aitemokin, kolimokis ŋes ebe, “Bian esawa lokikanyetekaarei alakakinia ekamidi ŋes.”

⁵³ Kosodi kojen papake ebe ŋes esawa je lokelimokinia Yesu ebe, “Ejari okokukon.” Kiyuu ŋesi ka lukokaleke kere.

⁵⁴ Ŋin ŋes aanyunet nakiareit nakiswamai Yesu nakenyounio koYudaya adolore Galilaya.