Yokana 13 - Ebaibuli

¹ Kosodi eriŋa edolo epucit loka Aleleŋ, kejeni Yesu ebe adolu ekesawa loenyounio kakwapin kanu alosit mama ejai Papa, kemina ŋesi iketuŋa lukejaas akwapin, komina kes aitodol awasia,

² Napenyamete lukatiboŋ, kodaunite Satan aibwaikin Yuda Isikariot, okoku loka Simon, etau lokabilakin ebotet,

³ kejeni Yesu ebe ainaki Papa akiro kere akaninike, ebe da alomu kama ejai Edeke, elosi da mama ejai Edeke,

⁴ konyou konyamat, kolaca ikenapen; kolem aninaet, koenik aŋabeteke.

⁵ Kosodi kobukok akipi atuba, kogeu ailot ikekesisiak akeje, ka anina kes kaninaet nakenapit.

⁶ Kodolok do Simon Petero. Kotema Petero ŋes atiar, “Ejakait, ilosi ijo akakeje?”

⁷ Koboŋok Yesu kotema ŋes atiar, “Nueswamai eoŋ mam ijeni kwana, konye ijenuni kokau.”

⁸ Kotema Petero atiar, “Mam jo ilosi akakeje cut kiton ikar kere.” Koboŋok Yesu ebe, “Arai mam kelosi jo, mam imorikikina keoŋ.”

⁹ Kotema Simon Petero ŋes atiar, “Ejakait, mere akakeje bon, konye akakanin ka akakou da.”

¹⁰ Kotema Yesu ŋes atiar, “Yenedauni ailoŋ emamei eipud dimarai ailot akeje, konye elai akuan kere: ilaete yesi da, konye mere kere.”

¹¹ Naarai ajeni ŋesi loekoto abilakin ŋes ebotet; ŋes abalar ebe, “Mam ilaete kere.”

¹² Kosodi nakedaunia ailot akejekec, ka alemun ikenapen, ka aiboikin bobo, kotema kes atiar, “Ijenut kereka nukeswamak eoŋ yes?

¹³ Kinyarito eoŋ Ekesisianakinan ka Ejakait da; inerasi yesi kotenan, naarai arai eoŋ kwaŋin.

¹⁴ Aso arai eoŋ, Ekusijakait ka Ekusikesisianakinan da, kelot yes akeje, ibusakinit yes da ailot akeje nuka lucekus.

¹⁵ Naarai kainak yes aitodikinet, tetere iswamaete yesi da kwape keswamakinia yes.

¹⁶ Abeit, abeit, katemari yes atiar, Mam ebulesit itelekarit ejakaitike; karaida ekiyakia aitelekarit lokiyakiari.

¹⁷ Arai kijenutu ŋun, isirereŋitoi yes arai kiswamata,

¹⁸ Mam enera nukus kere: ajeni luaseunit; konye kodol naiwadikatai ebe, ‘Lokenyami ikanyamat, ŋes ketonyoik aketitibat.’

¹⁹ Amear kwana kalimokini eriŋa edoluno, tetere naedolunioto, kiyuut ebe eoŋ ŋopeŋol,

²⁰ Abeit, abeit, katemari yes atiar, Yenisukunyikini ŋin yeneyakiari, kesukunyik eoŋ; yenikesukunyikini eoŋ isukunyikinit je lokejukuni.”

²¹ Kedau Yesu einer ŋun, kokadak kotauke, kitejenu kobala ebe, “Abeit, abeit, katemari yes atiar, ediopet kayesi kabilakini ebotet.”

²² Koŋoleanakinos ikesisiak, kobuonokinos iŋai bo ŋol loelimit ŋesi,

²³ Kejai ediopet kokesisiakake lokegoŋakina atorob naka Yesu, lokemina Yesu.

²⁴ Aso kokwet Simon Petero ŋes, kobala ebe, “Kiŋitu cani loelimit ŋesi.”

²⁵ Aso egoŋakina ŋesi kwape kwaŋin atorob naka Yesu, kotema atiar, “Ejakait, ŋes bo iŋai?”

²⁶ Koboŋok Yesu ebe, “Loecunyakini aodunet kainak, ŋes ŋol.” Kosodi kedau aicunyakin aodunet, kolem koinak Yuda okoku loka Simon Isikariot.

²⁷ Kokau kaodokinet, kolomak Satan ŋes, Kosodi kotema Yesu ŋes atiar, “Nuiswamai, kisunyite aswam.”

²⁸ Kwabo emamei etuŋanan kalukemorete kaŋes lokejeni akirot nakelimokinia ŋes ŋun.

²⁹ Naarai koomitos ice ebe naarai itiŋit Yuda eriagi, abu Yesu kolimok ŋes ebe, “Kogwel lukipuda kanuka epucit,” arai ebe kijaik lukican ibore.

³⁰ Kosodi kedau ŋol aijaar aodokinet, atipet koloma: kerai da kuare.

³¹ Kosodi nakedaunia ŋol alomar, kotema Yesu atiar, “Kwana itopolooritai Okoku loka etuŋanan; Edeke da itopolooritai kotomakeŋ,

³² Itopoloori Edeke ŋes kotomakeŋ, itopoloori da atipet.

³³ Yes idwe ludidik, eroko apak naedit ajai nepepe kayes. Kimoete eoŋ; kwape abu kalimokinitor Iyudayan ebe, ‘Nealosi eoŋ, mam yes ipedorete abunore’; kwana da kalimokini yes kwape kwaŋin,

³⁴ Kainakini yes aicorakinet nakitetet ebe, Kominanaros; kwape abu kaminar yes, kominanaros yesi da kwape kwaŋin.

³⁵ Kanuka ŋun ejenunete ituŋa kere ebe iraas yesi ikakesisiak, arai iminanaros bonik.”

³⁶ Kotema Simon Petero ŋes atiar, “Ejakait, ilosi bo ai?” Koboŋok Yesu ebe, “Nealosi eoŋ, mam kipedori atupun kwana; konye kitupuni kokau.”

³⁷ Kotema Petero ŋes atiar, “Ejakait, kanukinyo mam eoŋ apedoria atupar jo kwana? Ainakini akaijar kanukon.”

³⁸ Koboŋok Yesu ebe, “Iinakini kereka ijo akoniijar kanukaŋ? Abeit, abeit, katemari jo atiar, Mam ekokor eruikini, aitodol nakiŋerio eoŋ irwan auni.