Yokana 10 - Ebaibuli

¹ “Abeit, abeit, katemari yes atiar, yenimam itori orute elomari anuk naka amerekekin konye kodoka kamace, erai ŋin ikokolan ka ikaŋatan da;

² konye yenitori orute ŋes erai ekecokon loka amerekekin.

³ Eŋaikini ekagolon ŋes; iirarete amerekekin ekeporoto, enyarai ŋesi akemerekekin kikiroriakec, itolomari kes kiŋa,

⁴ Kedau aitolomar nukeŋ kere, iŋarenikini kes, etupakinete amerekekin, naarai ejenete ekeporoto.

⁵ Mam etuparete cut eloŋwau, konye ekerete kama ejai, naarai mam ejenete eporoto loka iloŋwau.”

⁶ Abu Yesu kolimok kes awaragan ŋin, konye mam ejenuna akiro nualimokini kes.

⁷ Kolimok Yesu kes bobo ebe, “Abeit, abeit, katemari yes atiar, arai eoŋ erute loka amerekekin.

⁸ Kere lukageikinete keraas ikokolak ka ikaŋatak; konye mam apotu amerekekin kiirasi kes.

⁹ Arai eoŋ erute; arai kitoro ituŋanan mamakaŋ, itajario, elomari ka alomun, edumuni da erony.

¹⁰ Mam ekokolan ebuni atai dimarai akoko, ka aiar, ka amunaar da; abu eoŋ kabu tetere ejaunete kaijar, ejaunete da kanaedeparit.

¹¹ Arai eoŋ ekecokon lokajokan. Einakini ekecokon lokajokan akeijar kanuka amerekekin.

¹² Etuŋanan loeropio, lomam erai ekecokon, amerekekin da mam eraas nuke, eanyuni epeet ebuni, inyeini amerekekin, ekeri; ikami do epeet kes, isiarakini.

¹³ Ekeri ŋol naarai erai loeropio, mam epodo amerekekin.

¹⁴ Arai eoŋ ekecokon lokajokan; ajeni ŋun nueraas nukaŋ, nukaŋ da kajenete eoŋ,

¹⁵ kwape kajenia Papa, eoŋ da ajeni Papa; ainakini akaijar kanuka amerekekin.

¹⁶ Ido ejaas eoŋ amerekekin ace, numam eraas nuka anuk kana; kebusakinit ayaun ŋun da, iirarete ekaporoto; kosodete araun esipan ediopet, ka ekecokon ediopet.

¹⁷ Kanuka na kamina Papa, naarai ejaikini akaijar, tetere alemuni bobo.

¹⁸ Emamei ituŋanan yenikademari, konye ejaikini eoŋ elopet. Ejai eoŋ apedor naka aijaikin, ejai da apedor alemun bobo; adumunit aicorakinet na kama ejai Papaka.”

¹⁹ Kojau bobo atiakatiak koYudayan kanuka akiro kaŋun,

²⁰ Luipu kakes kobalas ebe, “Ejai lo ajokit, ekerepiki; kanukinyo iirariata ŋes?”

²¹ Kobalas ice ebe, “Akiro ŋun mam eraas nuka ituŋanan yenejai ajokit. Epedori kereka ajokit aitwekenyun akonye nuka imudukiok?”

²² Kerai epucit loka Atiakunio koYerusalem; kapak naka aterot;

²³ kitorit Yesu oyekalu alomaret naka Solomon.

²⁴ Kosodete kolukut ŋes Iyudayan kotemasi atiar, “Itodoli ai isibuonokini ikositauon? Arai irai Kristo, kolimokinai kaitebeikin.”

²⁵ Koboŋok Yesu ebe, “Abu kalimok yes, konye mam iyuunito. Aswamisio nueswamai eoŋ kokiror loka Papaka, kes ketejenunito.

²⁶ Konye yes mam iyuunito, naarai mam iraas lukotoma amerekekinika.

²⁷ Iirarete akamerekekin ekaporoto, ajeni kes, kes da katupito eoŋ;

²⁸ ainakini kes aijar naka ikar kere, mam cut eoliorete, kwabo emamei ituŋanan yeneurupoori kes kakanika.

²⁹ Papaka lokainakini ŋun erai lokapolon aitelekarit kere, kwabo emamei ituŋanan yenepedori aurupoor kes kakan naka Papaka.

³⁰ Kirai eoŋ ka Papa ipe.”

³¹ Kosodete kirarata bobo Iyudayan amor aibiribirio ŋes.

³² Koboŋok Yesu kes ebe, “Ketodik yes aswamisio nuipu nuejok nuepote kama ejai Papa; kanuka aswamisioit anyoin kaŋun kibiribirioto eoŋ kamor?”

³³ Koboŋokis Iyudayan ebe, “Mam kibiribiri jo kanuka aswamisioit naejok, konye kanuka ainyanakin Edeke; naarai jo etuŋanan, ituluori bon Edeke.”

³⁴ Koboŋok Yesu ebe, “Mam kereka iwadikatai kokisilakus ebe, ‘Kabala iraas yesi idekesio’?

³⁵ Arai abu konyara kes idekesio ŋul lukebunokini akirot naka Edeke (ido mam epedorete nukiwadikatai abilio),

³⁶ ibalasi kereka yesi lokitalauni Papa kijuk akwapin ebe, ‘Iinyanakini Edeke’; kanu abalar ebe, ‘Arai eoŋ Okoku loka Edeke’?

³⁷ Arai mam eswamai aswamisio nuka Papaka, sirikiyuut.

³⁸ Konye arai eswamai, karaida mam kiyuunito eoŋ, kiyuutu aswamisio; tetere ijenunete ipiirikinete da ebe ejai Papa tomaka, eoŋ da toma Papa.”

³⁹ Komoata bobo aikamun ŋes; konye koku kakanikec.

⁴⁰ Kolot bobo okekwa Yorodan aibois nakegeunia Yokana aibatis; kosalak ŋina.

⁴¹ Kopotu luipu mamakeŋ; kobalas ebe, “Abeit mam Yokana eswamat aanyunet kere: konye nukinera Yokana kere kanuka ŋol keraas abeit.”

⁴² Kiyuut luipu kaŋina.