Yeremia 8 - Ebaibuli

¹ Ebala EJAKAIT ebe: “Kapak kaŋin itolomunete akoio nuka ikabakan luka Yuda, ka akoio nuka ikapolokoke, ka akojo nuka isasedotin, ka akojo nuka inabin, ka akojo da nuka luibojete ko Yerusalem, kailinakec:

² eloikinete kes kakonyen nuka akoloŋ, ka elap, ka aiore kere naka akuj, nuaminas kesi, nukiiaanakinete, nuatupenenete, nuamootos, nuamaete da: mam etukonokinio, karaida aidaio; eraunos kesi kwape aoret kalup.

³ Ebala EJAKAIT loka aioresio ebe, Eseunio atwanare itia aijar kotoma aatoŋot kere naedeun naka ekek kalo lokaronon, luedeunos kaiboisio kere nukerenearit kes.

⁴ “Bobo da ilimokini kes ebe, Ebala EJAKAIT kwanata ebe, Ibiroros kereka ituŋa, komam enyounete bobo? Eboŋori tope ituŋanan komam eboŋuni?

⁵ Aso kanukinyo abonoriata ituŋa lu luka Yerusalem kau kaicebokinit abononor kau? Iketakinito aiŋal, aneroto aboŋun,

⁶ Abu kapupok, keira da, konye mam eneras nuibecokino: Emamei yenitoronikin akeronis kinera ebe, ‘Ekwaik ai?’ Ibelokini ŋinituŋanan aboloboloke, Kwape ebalasit loitokaar ojie.

⁷ Eebo ejeŋi atolut kotoma akuj apakioke nuseuna; Bnicete eluke ka iporoidoliat ka ewalu da apak naka aponarekec; Konye ikatuŋa mam ejenete ekisil loka EJAKAIT.

⁸ “Ikwaikinete ai ineras ebe, ‘Kirai lukacoa, Ejai du ekisil loka EJAKAIT kaoni’? Konye koany, akwara nakainal naka ikewadikak etarau lokainal,

⁹ Erumata lukacoa ileic, eburunito, ikamunitai: Koany, aneroto akirot naka EJAKAIT; Acoa anyoin ejai mamakee?

¹⁰ Kanuka ŋun ainakini aŋorokec mama ejaas ice, Imanikoriakec mama ejaas nul lukirumetc kes: Naarai ageun ka loedit kakesi kiton lokapolon kakesi, Eraŋani ŋinituŋanan aimedaun, Ido ageun konabi kiton osasedoti Emodi ninitunanan.

¹¹ Etaŋaleut amusuŋut naka akoku naka ikatuŋa kaitapapanit, Kobalas ebe, ‘Ainapakin, Ainapakin,’ Kereka emamei ainapakin.

¹² Eruma kereka kes ileje naadauniata aswam naketal? Be! Mam eut erumito ileje, Ido mam apedorete aitirir: Kanuka ŋun ebiroros nepepe kanul luebiroros: Ebala EJAKAIT ebe, Kapak naeticania kes, elataros.

¹³ Ebala EJAKAIT ebe, Naakotor aideŋ kes: Emameete imusabibun komusabibu, Karaida itinin kotini, Erinyorito dil akui; Ido nuainakinit kes atuboros kamakec.”

¹⁴ Kanukinyo kiboio oni kapalarito? Kotukonokinos, kalomasi oreria luebwaitai, Kelilinata kaŋina: Naarai kisililin EJAKAIT Edekewok oni, Koinak oni akipi nuka epiu aimat, Naarai kipou kadiakasi kama ejai EJAKAIT.

¹⁵ Kipou kamunos ainapakin, konye mam ajokis naebunit; Kamunos apak naka aŋaleun, konye koany aburun!

¹⁶ “Epupunio ainoror naka ibalasinike koDan; Eporoto loka aruo naka ikagogonokoke Einakini akwap kere amaran; Naarai apotu konyamata akwap ka luejaas tomake kere; Ere, ka ŋul da luibojete kotoma,

¹⁷ Naarai koany, ebala EJAKAIT ebe, Ejukuni imunwo, asigirikoloŋa kotomakus, Lumam elemelemeo, kitodotodoete yes.”

¹⁸ Wu okwe karai kapedor aitalakar bon kenyek aiturur! Epirisiar etauka kotomaka.

¹⁹ Koany, eporoto loka aimony naka akoku naka ikatuŋa, Kakwap naelwana noi: “Emamei kereka EJAKAIT koSion? Emamei ekabakake kotomake?” “Kanukinyo ketunyunyurikiniata kaputosiakec nuegerer, Ka aamameak da numo?”

²⁰ “Atubor aidweny, adaun ejet, Mam oni kitajaruna.”

²¹ Kemusun eoŋ kamusunut naka akoku naka ikatuŋa: Eoŋ da ebworo; Kekam aitirir.

²² Emamei kereka emina koGilead? Emamei emurwon kaŋina? Aso kanukinyo mam eŋaleunio aijar naka akoku naka ikatuŋa?