Yeremia 7 - Ebaibuli

¹ Akirot naabu kobu mama ejai Yeremia kama ejai EJAKAIT, kobala ebe:

² “Kobwo korute loka etogo loka EJAKAIT, kolimo kanen akirot na, kiner atiar, Kiirasi akirot naka EJAKAIT, yes kere luka Yuda, luelomarete korutei kalu aima EJAKAIT.

³ Ebala kwanata EJAKAIT loka ajoresio, Edeke loka Isirael, ebe, Kitemokis irotinikus ka aswamisiokus, eoŋ da kesiboikini yes aibois na,

⁴ Sirikimunokinos akiro nukainal ebe, ‘Lo ŋes eyekalu loka EJAKAIT, eyekalu loka EJAKAIT, eyekalu loka EJAKAIT.’

⁵ “Naarai arai itemokinete kojokan irotinikus ka aswamisiokus; arai itodolete koiokan etube kokidin ketunsnan ka eidunyeteke;

⁶ arai mam imwanete imoit, ka ikoki, ka apuserut, ido mam ibukokinete aokot numam akirot aibois na, komam itupanarete idekesio ice aiticanar bonik:

⁷ Ŋes konyet kesiboikinio yes aibois na, akwap naainakinit lukapapaakus, ageun apeŋo kiton ikar kere.

⁸ “Koany, imunosi akiro nukainal, numam epedorete aimedaun.

⁹ Ikotosi kereka yesi akoko, ka aiar, ka adote, ka aiyapo nukainal, ka aisupuronokin Baal lukisupurununo, ka atupanar da idekesio ice lumam lem ijenete,

¹⁰ kosodete aponare aibwo kakonyeneka togo lo, loemaikinitai ekakiror, kobalas ebe, ‘Kiyuunitai’; kiswamaenenete da italesia ŋul kere?

¹¹ Araun ca ma etogo lo, loemaikinitai ekakiror, abua naka ikokolak kakonyenekus? Ebala EJAKAIT ebe, Koany, eoŋ, eoŋ obe, aany ŋun.

¹² Konye koloto do yesi aiboisika naajai Silo, naesiaunia eoŋ aisiboikin ekakiror, koanyut nueswamakinit Ŋes kanuka aronis naka ikatuŋa Isirael.

¹³ Ido ebala EJAKAIT ebe, Naarai ipotu kiswamata aswamisio ŋun kere, abu kener kayes, kadilok tupuruc kener, konye mam yes epupuno; kanyarit yes, konye mam iiito:

¹⁴ Ŋes konyet eswamakinia etogo loemaikinitai ekakiror, loimunosi yesi, ido aibois nakainak yes ka lukapapaakus, kwape eswamakinitor Silo.

¹⁵ Kacakari yes kakonyeneka, kwape acakaritor ikusiinacan kere, aur kere naka Epuraim.

¹⁶ “Kanuka ŋun sirikilipak ituŋa lu, sirikitonyou aimony kanukec, karaida ailipasit, ido sirikiinaina eoŋ: naarai mam kapupuni jo.

¹⁷ Mam kereka jo ianyunit nuiswamaete kesi kotoma oreria luka Yuda korotin da luka Yerusalem?

¹⁸ Eraraete idwe akito, inokete lukapapakec akim, igurete aŋor da atap ailunulunanakinia akabaka naka akuj imugatin; ido ebukonokinete idekesio ice ainakineta numatan, tetere ketunyunyurikinete,

¹⁹ Ebala EJAKAIT ebe, Ketunyunyurikinete teni eoŋ? Mere kitunyunyurikinos bonik, aitadakar akwesikec?

²⁰ Kanuka ŋun ebala EJAKAIT Edeke kwanata atiar, Koany, ebukokinio akanyunyura ka akaisiop aibois na, otuŋa, otian da okito lukomanikoria, ka araito da nuka alup; icwei ido mam itudenio.”

²¹ Ebala kwanata EJAKAIT loka ajoresio, Edeke loka Isirael ebe: “Kiyatakisi ainakinetakus nuicweio toma asubanakus, konyamata akiriŋ,

²² Naarai mam abu kener kalukapapaakus, kwabo mam ecorakinit kes kapaaran naketolomunia kes kakwap nako Misiri, nuka ainakineta nuicweio karaida asuban.

²³ Konye kecorakinit kes akirot na ebe, ‘Kiiranarete ekaporoto, eoŋ da araun Edekekus, yes da iraunos ikatuŋa, Kolosenenete korot kere lokeeorakini, tetere ijaunos ejok.’

²⁴ Konye mam apotu kiirasi, mam apotu kitoikis akiikec, konye kolosenenete kainerunikee, kaninik naka itauonokee lueroko, kobononosi kau, mam apotu kiyatakis kinaren,

²⁵ Ageun kapaaran naalomuniata lukapapaakus kakwap nako Misiri kiton lolo, kejukak yes ikakejaanakinak kere inabin, kadilonokin tupuruc aijukunun kes:

²⁶ konye mam apotu keirasi, mam apotu kitoikis akiikec, konye kitininikata imurisiŋakee: kiswamata nueroko aitelekarit lukapapaakec.

²⁷ “Ido ilimokini kes akiro nun kere; konye mam kiirarete, ido inyarai kes; konye mam iiete.

²⁸ Ilimokini kes ebe, ‘Na ŋes ateker namam eirarit eporoto loka EJAKAIT Edekekee, ido mam eeamunito aituutoorio: aolio abeit, egelaritai kaitukekec.

²⁹ Konera itimakon, ijo Yerusalem, Kocaka neelwana, Kikeseu akuudian kokuju neelapat; Naarai aŋer EJAKAIT; ido ajal ituŋa luka atur naka anyunyurake.’

³⁰ “Naarai ebala EJAKAIT ebe, Eswamata idwe luka Yuda neuroko kakonyeneka: ebwaikis italesiakee togo loemaikinitai ekakiror, amunaaria,

³¹ Adukoto aiboisio nuiceleleete nuka Topet, naejai aditot naka okoku loka Kinom, aicweia ikeeedwe lusap ka lupesur kakim; numam ecorakinit, mam da aomisioitike alomarit otauka,

³² Aso do koany, ebala EJAKAIT ebe, Epote apaarasia, mam bobo enyaritai Topet, karaida Aditot naka okoku loka Kinom; dimarai Aditot naka Earit: naarai idaanakinete kesi Topet, naarai emamei apak kamace,

³³ Eraunos atesina nuka ituŋa kalu akiriŋ naka akweny nuka apak, ka itian luka akwap; emameun yenetwaranari kes,

³⁴ Kasodi eoŋ aitanan koreria luka Yuda, korotin da luka Yerusalem, eporoto loka aitae ka eporoto da loka aiyalama, eporoto loka eteran ka eporoto da loka ateran: naarai eraun akwap naiswapit.”