Yeremia 3 - Ebaibuli

¹ Ebalai ebe, “Arai kirene etuŋanan akeberu, Enyouni ŋin da kamaken, Korau naka ecetuŋanan, Eboŋori tope je mamake bobo? Mam akwap ti kemunaun noi? Konye irau ijo naadote mama ejaas ipailon luipu; Konye ebala EJAKAIT ebe, Ikoto kereka aboŋun mama ajai?

² Kiteluo akonikonye kuju neelapat, koany, Anu bo numam kiteperitere? Ibu kiboie kawai kerot aidareun kes, Kwape Eyarabut kais; Ibu komunau akwap kadoteukon, ka aronisikon.

³ Kanuka ŋun kimikitai elimilim, Komameun akiru naka akamu; Kwabo kijai kereet loka naadote, Ibu koner aileieikin.

⁴ Mam kimonyakini eoŋ ageun lolo ebe, ‘Ipapa, kirai ijo epadie loka atumunika,

⁵ Enyunyuranakini kereka ŋesi ikar kere? Isiopanakini kiton osaŋe?’ Koany, ibu kiner, konye kiswama nueroko, kwape kipedoria.”

⁶ Ido da kabala EJAKAIT eoŋ kapaarasia nuka Yosia ekabaka ebe, “Iany ijo nueswama Isirael nakabononoran kau? Adoka ŋesi nolironat loimukurur ido kokwap kanolikitoi loepesit, kodotei kaŋina,

⁷ Kabala ebe, ‘Kedau ŋesi aiswama akiro ŋun kere, eboŋuni do ŋesi mama ajai’; konye mam abu kobonu; abu Yuda kinaeike naemodana koany.

⁸ Koany da, naerenearia Isirael nakabononoran kau kanuka adoteuke, kainak da ebalua lokairenear; konye Yuda kinacike naemodana mam akuriana, konye ‘kolot ŋin da kodotei.

⁹ Kosodi kanen naarai ebenenikinit ŋes adoteuke, komuna akwap, kodotei kamor ka apunurei.

¹⁰ Konye ebala EJAKAIT ebe, Karaida nun kere mam Yuda kinaeike naemodana eboŋunit neajai keketau kere, konye ijoseikinit.”

¹¹ Kabala EJAKAIT eoŋ atiar, “Isirael nakabononoran kau itodiara araun naedolit aitelekar Yuda naemodana.

¹² Kolot kolimonok akiro nu koseseni agolitomei, kiner atiar, Ebala EJAKAIT ebe, ‘Kobonu ijo Isirael nakabononoran kau; Mam kaseseni jo kanyunyura; Naarai ebala EJAKAIT ebe, Arai eoŋ lokaitim, Mam anyunyuranakin ikar kere.

¹³ Ebala EJAKAIT ebe, Na bon, kolitno numam adolitekon, Ebe idiaka kama ejai EJAKAIT Ekonideke, Isiarak ikonirotin mama ejaas imo kokwap kanolikitoi loepesit, Komam irimarit ekaporoto.

¹⁴ Ebala EJAKAIT ebe, Koboŋutu, Yes idwe luibononorete kau; Naarai arai eoŋ lokowaikus: Ido kalemuni yes, ediopet kore, iarei kokek, Kayau Sion.

¹⁵ “Kainakini yes ikecokok kwape ejaar ekatau, lukitanyamenenete yes kacoa ka ajenun.

¹⁶ Kosodi kanen, ebala EJAKAIT ebe, Naipuakarotor iyatanakinotor da kakwap, kapaarasia kanun mam oobo ineras ebe, “Asaduku naka aitutuket naka EJAKAIT.” Mam aomisioitike elomari otauonokec; mam iitunete ŋes; mam ipeionokinete ŋes; ido mam bobo iswamao.

¹⁷ Kapak kaŋin emaikinete Yerusalem eicoloŋ loka EJAKAIT: etukonokinos atekerin kere mamakeŋ, okiror loka EJAKAIT, Yerusalem: ido mam bobo elosenenete kwape ejaar aninik naka itauonokee lueroko.

¹⁸ Kapaarasia kanun euparos ekek loka Yuda kekek loka Isirael, enyounete nepepe kotoma akwap naka agolitomei epote akwap nakainakinit lukapapaakus araun airumet.

¹⁹ “Konye abu kaomite kwape tikebwaikinia jo toma odwe, Ainakin jo akwap nakailel, Airumet naejok naka aioresio nuka atekerin. Abu kaomite ebe kinyaraete eoŋ Papa; Komam ibelokinos ainyein atupun eoŋ.

²⁰ Ebala EJAKAIT ebe, Abeit kwape enyounio aberu kama kokilenike kaimod, Kwape kwaŋin kimodiata yesi eoŋ, Wu ekek loka Isirael.”

²¹ Epupuno eporoto kaiboisio nuiceleleete, Aimony ka aiŋaiŋa naka idwe luka Isirael; Naarai etirioto ekecerot, Emurwokis EJAKAIT Ekecedeke.

²² Kobonutu, yes idwe luibononorete kau, Etaŋaleuni abononorikus kau. Koany, kiponi mama ijai; Naarai irai ijo EJAKAIT Edekekosi.

²³ Abeit aiŋarakinio naemunoi koukon erai naatai, Eeelet da koronan: Abeit ejai aitajario naka Isirael toma EJAKAIT Edekewok.

²⁴ “Konye ageun keiditeuwok abu ibore yeniketal koiwenya aitaaritoi naka lukapapaawok; isipaninikec luka amerekekin ka luka aituk, ka idwekec da lusap ka lupesur.

²⁵ Kapero kotoma oleiciwok, korap oni aitirirawok: naarai kidiaka kama ejai EJAKAIT Edekewok, oni ka lukapapaawok, ageun keiditeuwok kiton lolo: mam kipou karimarito eporoto loka EJAKAIT Edekewok.”