Yakobo 3 - Ebaibuli

¹ Ikainacan, sirikiraut ikesisianakinak luipu; kojenut ebe kidumuni oni atubokinio naitelekarit apolou.

² Naarai kibucari oni kere kakiro nuipu; arai mam ibucari ituŋanan kakirot, ŋol ŋes etuŋanan loepol, loepedori aitikokin kiton akuanake kere.

³ Konye arai kibwaiki iboro luitikokinet aituke nuka ibalasin, tetere kirimarete oni, kibelonokini awatekec kere.

⁴ Koany atakerin da, karaida kepolok kwaŋin, eyaŋaarete ikwamin luededeŋ, ibelonokin kes akiŋol naedit noi, kama itojokit ekereŋean kere kotoma akoteke,

⁵ Kwape kwaŋin da erai aŋajep atutubet naedit, ilabilabi nuepolok, Koany ikito luipu luetia nen enokete akim naedit!

⁶ Erai aŋajep akim. Erai aŋajep akwap naka amamus adolit kotoma atutubetawok, emunaari akuan kere, isinepuni akokoro naka auruunet, Geena da isinepuni ŋes.

⁷ Naarai epedorio aitapatan ŋolipone kere loka itiaŋ, ka akweny, ka lueliatos, ka luka aŋolol da, ido adaut ituŋa aitapatan,

⁸ konye emamei ituŋanan kere yenepedori aitapatan aŋajep, erono, iloliana, ileleba aisorit naeari.

⁹ Ŋin ŋes kituritor Ejakait ka Papa; ŋin ŋes kikenio ituŋa lukesubio kaput naka Edeke.

¹⁰ Elomunete aiturit ka aiken kotoma aituk ŋin adiopet. Ikainacan, mam ibus akiro ŋun ajaut kwaŋin,

¹¹ Eleleunete kereka akipi nuejok ka nuedwarak da kotoma akoŋu adiopet naka atan?

¹² Ikainacan, epedori kereka etini aira iseitunin, arai bo emusabibu aira itinin? Mam da epedorete akipi nuejai amunyu aluor nuejok.

¹³ Iŋai bo kayes ejai acoa ka ajenun? Kitodu cani aswamisioke koponesioke luejok kotoma aiyapepera naka acoa.

¹⁴ Konye arai kijaunos kekokote loedwar ka aŋolopa toma otauonokus, siriwoloboboete, siriŋalaete da asurokin abeit.

¹⁵ Mam acoa ŋin erai naebuni kokuju, konye erai naka akwap, naka auruunet, naka Satan.

¹⁶ Naarai neejai ekokote ka aŋolopa, nepenen da ejai aitotolikin, ka ŋiniswamisioit kere da naerono.

¹⁷ Konye acoa naebuni kokuju nasodit erai naesegara, kosodi nakainapakin, nakaiyapepera, naenonokikinit, ileleba aitim ka araito nuejok, emamei abuonokin, emamei da esoswai.

¹⁸ Eyeitai araito nuka adolit toma ainapakin mama ejaas ŋul luiswamaete nukainapakin.