Tito 2 - Ebaibuli

¹ Konye jo, kiner nuibusakinito aisisianakin naka aijar.

² Koraas imakio luitikokina, luiyapaara, luecoito, lueŋaleete kotoma aiyuun, ka amin, ka atitiŋikin da.

³ Kwape kwaŋin da koraas amakio nukejautene lokayoŋit, mere akasabak, karaida abulesin nuka ajon nuipu; konye nuisisianakinete nuejok,

⁴ tetere ituutoorete akatumunak araut nueminasi ikiliokokec, ka nueminasi ikecedwe da,

⁵ koraas nuecoito, nuesegara, nuiswamaete ore, nuejok, nuenonokikinito ikiliokokec, kinyek akirot naka Edeke ainyanakinio.

⁶ Kwape kwaŋin, kicor ikatumunak acoit.

⁷ Kakiro kere kitoduun korai aanyunet naka aswamisio nuejok, kotoma aisisianakin kitoduun korai lomam imunaara, loiyapaara,

⁸ kakiro nueŋaleete lomam itoronio, tetere isurumio ekapegan ileic, komamei ŋes akirot naerono einer asurokinia oni.

⁹ Kicor ibulesin kononokikis ikecejaka kakiro kere, koraut luitojokete, mere luirebirebete,

¹⁰ mere luelemelemaka iboro, konye kitodiasi kamunonut kere naejok, tetere isirete aisisianakin naka Eketajaraniwok Edeke kakiro kere.

¹¹ Naarai atakanu asianut naka Edeke einunit ituŋa kere aitajario,

¹² kituutoori oni ebe, kaŋeroto amamus ayoŋit Edeke, ka aiŋobel naka akwapin, kajarata kacoit, ka adolit, ka ayoŋit da Edeke, kotoma okar luka kwana,

¹³ kedareto noi amun nakarereŋ naka atakan nakaibuses naka Edeke lokapolon ka Eketajaraniwok Yesu Kristo,

¹⁴ loabu koinakin bon kanuwok, tetere kilakuni oni kama kepali kere, ka aitalaun kanukeŋ ituŋake obe, luekokakinito aswamisio nuejok.

¹⁵ Kiner ŋun, kicor da, kitoron da kapolou kere. Kinyek idiotuŋanan aimen joo.