Tito 1 - Ebaibuli

¹ Paul, ebulesit loka Edeke, ekiyakia da loka Yesu Kristo aisilosikinia aiyuun naka luseuna luka Edeke ka ajenunikec naka abeit kiton ayoŋit Edeke,

² kotoma amun naka aijar naka ikar kere, naabu Edeke, lomam iŋalai, kisumun eriŋa apakio nuka ikar,

³ konye kapakike abu kitodia akekirot kotoma alimonokin nakejokokinio kwape ejaar aicorakinet naka Eketajaraniwok Edeke:

⁴ Mama ejai Tito ikakoku obe kotoma aiyuun nakimorit: Asianut ka ainapakin nuepote kama ejai Edeke Papa, ka Kristo Yesu da Eketajaraniwok.

⁵ Kanuka nu ŋes kenyeinia jo koKurete, tetere iteteni nuideuna, kodakak da imakio kaŋolire kwape kecorakinia jo,

⁶ arai ejai loemamei aitoronet, ekiliokit loka aberu adiopet, loiyuunito ikedwe, komam iwosatai ebe eraas luka iponesio lutai, ka luetumaaka.

⁷ Naarai ibusakinit ekaanyanaran araut loemamei aitoronet, kwape ekeŋadan loka Edeke; mere loisiyalamikina bon, mere loenyunyurana, lomam emer, lomam ibuŋai, lomam iŋobelei apesan,

⁸ konye loisukunyikini ipejok, loemina ajokis, loecoit, loedolit, lokalaunan, loitikokina da;

⁹ loericit akirot naka aiyuun kwape ejaar aisisianakin, tetere epedori aicor kotoma aisisianakin naka aijar, bobo da aitoron luirebirebete.

¹⁰ Naarai ejaas luetumaaka luipu, luinerasi aamameak, ka luiŋalas da, aitelekarit lueraas luekepitai.

¹¹ Ibusakinit aisililiŋ kes, naarai itotolikinete ituŋa kere lukokalia, isisianakinete numam ibusakinit kes aisisianakin, kanuka ameda nakileic.

¹² Abu ediopet kakesi, enabikec kikulepek, kobala ebe, “Eraas Ikureton ikeŋalak apaarasia kere, itiaŋ lueroko, ikeraŋak lueloŋwaka.”

¹³ Aitejenunet ŋin erai nakabeit da, Kanuka ŋun kitoron kes kadedeŋ, tetere eŋaleete kotoma aiyuun,

¹⁴ kinyeis acoit awaragasia nutai nuka Iyudayan, ka aicorakineta da nuka ituŋa luepaarete ainyein abeit,

¹⁵ Elaete iboro kere mama ejaas luelaete. Konye emamei ibore yenelai mama ejaas luemunaara ka lumam iyuunito; konye emunaara do adamakec ka aomisiokec da.

¹⁶ Elimorete ebe ejenete Edeke, konye eŋerito ŋes kaswamisiokec; eraas luesacitai, luiulaka, luegiritoi da kaŋiniswam kere naejok.