Sekaria 9 - Ebaibuli

Abwokon

¹ Akirot naka EJAKAIT mama ejai akwap naka Kadurak, Ka Damasiko aibois naeounere. Naarai itei EJAKAIT akoŋu naka ituŋanan Ka naka atekerin kere nuka Isirael.

² Kamat da loidunyatar eikoruke: Turo ka Sidon, naarai eco ŋesi.

³ Abu Turo koduk abwas naegogon kanuken, Kotukonok epuesa bala apua, Ka esabu loejok kwape erit loka irotin.

⁴ Koany, ireneari ŋes EJAKAIT, Ecakari akebar toma aŋolol; ldoporio kakim.

⁵ Eanyuni Asukelon ŋun, ekurianari; Gasa da, eriebakin noi; Ka Ekuron, naarai itisilio nuabu komuno. Eoliori ekabaka koGasa, Mam ituŋa ibojenenete koAsukelon.

⁶ Iboie ateker nainyalakina koAsudod, Etanaŋi da eitur loka Ipilisitian.

⁷ Alemari akeokot kaitukuke, Italesiake da kokidin okelake; Eraun ŋesi da aatoŋot naka Edekewok: Eraun kwape ekapolon koYuda, Ka Ekuron kwape Eyebusit.

⁸ Edukuri airigaun ekatogo asurokin aiore, Komam yenitori karaida aboŋor: Mam bobo ekamwanan itori tomakec: Naarai kwana aany kakakonye.

⁹ Kiyalamikin noi, ijo apese naka Sion! Kikalal, ijo apese naka Yerusalem! Koany, ebunit ekabakakon neijai: Erai loedolit ejaas kaitajario; Itasono kibwanenite da isigiria, Itaok yenika asigiria.

¹⁰ Ademari Epuraim agali, Ka Yerusalem da ebalasi, Edemario da akabwa naka ejie; Elimokini da atekerin ainapakin; Ilosikin ayaiteke anyoun kaŋolol kiton aŋolol, Ido anyoun koCor kiton osaŋe loka akwapin.

¹¹ Ka jo da, kanuka aokot nuka aitutuketekon, Adau alemun ienanakon kotoma aipany namam akip,

¹² Kibelokinos neejai abwas naegogon, Yes ienan luemunos; Kalimonokin lolo ebe kenyakakini jo irwan aarei.

¹³ Naarai abu ketukud Yuda kwape akakabwa, Etemok Epuraim araut ekemal; Esidiki da odwekon, wu Sion, Aluikin odwekon, wu Yaban, Ketuluori jo kwape ekileŋ loka lokirigi.

¹⁴ Etakanuni EJAKAIT kamakec, Elomari emaleke kwape eimilia: Ekutakini Ejakait EDEKE arupepe, Euparos kitapipirion luka eŋalakimak,

¹⁵ Eiikini kes EJAKAIT loka aioresio; Enyamete, icakacakaete alica nuka aporocet; Emasete akeceokot kwape kajon: Ilelebunos kwape atanyia, Kwape agoria nuka etem.

¹⁶ Itaiari kes EJAKAIT Ekecedeke kapaaran kaŋin Kwape esipan loka iketuŋa: Naarai eraunos bala amor nuka aboko, Emwekimwekete kakwapuke.

¹⁷ Naarai epol ca ma akejokis, Epol ca ma aketemelel! Itopolounete akima ikatumunak, Ka ebino da lokitetet apesur.