Sekaria 12 - Ebaibuli

Abwokon.

¹ Akirot naka EJAKAIT naka Isirael. Inera EJAKAIT lokepesikini akuj, lokepesi da apetetait naka akwap, lokesubi emoyo laka ituŋanan kotomake, ebe:

² “Koany, etuluor Yerusalem aikopo naka aigetigeta mama ejaas ituŋa kere luirimorito; ejaun mama ejai Yuda da kotoma airigaunio naka Yerusalem.

³ Kosodi kanen, kapaaran kaŋin, etuluori Yerusalem amoru naelanir noi mama ejaas ituŋa kere; nul kere luedakete ŋes imusunanakinos noi. Etukonokinos atekerin kere nuka akwap asurokin ŋes,

⁴ Ebala EJAKAIT ebe, Kapaaran kaŋin, esuumokini nolibalasit, esikeripikini ekebwanenonike. Konye esesenete akakonye ekek loka Yuda, naetumudakia ŋolibalasit loka ituŋa,

⁵ Etemarete ijaka luka Yuda kotauonokec ebe, ‘Luibojete ko Yerusalem kes akagogoŋ kotoma EJAKAIT loka ajoresio Ekecedeke.’

⁶ “Kapaaran kaŋin etusubi ijaka luka Yuda bala atido naka akim kotoma akito, ido bala akalas naka akim kotoma oisutan; idoporete ituŋa kere airimor, kakan nakoteten ka nakokediany da; eriŋa bobo iboie Yerusalem kaiboisike, ŋes Yerusalem,

⁷ “Isiauni EJAKAIT aitaiar iweman luka Yuda, tetere mam itopolooritai aibuses naka ekek loka Daudi ka aibuses naka luibojete koYerusalem adepar Yuda,

⁸ Kapaaran kaŋin eiikini EJAKAIT luibojete koYerusalem; ŋin da yenikalanyana kakesi kapaaran kaŋin eraun kwape Daudi; ekek da loka Daudi eraun kwape Edeke, kwape emalaika loka EJAKAIT kakonyenekee.

⁹ Kosodi kanen kapaaran kaŋin amoi eoŋ amudiar atekerin kere nuepote asurokin Yerusalem.

¹⁰ “Abukokini ekek loka Daudi, ka luibojete koYerusalem, emoyo loka asianut ka loka aiŋaiŋa; esesenete ŋol loapotu kicumata: ibworos ŋes, kwape ibworor ituŋanan okokuke loteluna, ekuudiani ŋes, kwape yenekuudiani ekiyaike.

¹¹ Kapaaran kaŋin ejaun aibworo naepol ko Yerusalem, kwape aibworo naka Kadad-rimon kaditot naka Megidon,

¹² Ibworos lukakwap, ŋolikek kowaike; ekek loka etogo loka Daudi kowaike, ka akecenor kowaikee; ekek loka etogo loka Natan kowaike, ka akecenor da kowaikee;

¹³ ekek loka etogo loka Lebi kowaike, ka akecenor kowaikee; ekek loka Isimein kowaike, ka akecenor kowaikee;

¹⁴ ikekia kere luedeunos, nolikek kowaike, ka akecenor da kowaikec.