Sekaria 11 - Ebaibuli

¹ Koŋa ikekiakon, ijo Lebanon, Tetere idopori akim iresiakon.

² Kodelo ijo eberos, naarai ebiror eres, Naarai amudiaros ikito lukaiokak. Kodelosi, yes iluan luka Basan, Naarai aiepar amagoro naegogon,

³ Eporoto loka adelor naka ikeeokok! Naarai eŋatara aibusesukec. Eporoto loka iŋatunyo ludidik luegatas! Naarai eŋatara eitur loka Yorodan.

⁴ Abu EJAKAIT Ekadeke kiner kwanata ebe: “Korau ijo ekecokon loka esipan loebuni aario.

⁵ Luegwelete kes earete kes, kobalas ebe mam adiokirot naitelekarit kes; nul da luegwelarete kes ebalasi ebe, “Kituritete EJAKAIT, naarai abar eoŋ’: mam ikeeokokokee itimete kes,

⁶ Naarai ebala EJAKAIT ebe, Mam bobo etimi luibojete kakwap. Konye, koany, ejaikini ituŋa ninitunanan akan naka iidunyeteke, akan da naka ekabakake: edanyete lukakwap, mam eoŋ da ayuuni kes kakanikec.”

⁷ Araun do ekeeokon loka esipan loebuni aario, kanuka ikagwelak amerekekin. Kalemu da ibelai iarei; abu kamaik ediopet ekekiror Asianut, kamaik da ece ekekiror Eidie. Ketadak da esipan.

⁸ Kolap ediopet kamudia ikecokok iuni. Naarai etapasito ekatau, kes da kalaitos eoŋ.

⁹ Kasodi eoŋ atemar atiar, “Mam teni araun ekecokonikus. Ŋin yenetwani, kotwana; nin yenemudiario, komudiarai; nul da luideunos konyamata ninidiopet akiriŋ naka yenice.”

¹⁰ Ketin ekabela Asianut, kabil, tetere abili akaitutuket naetutukit kituna kere,

¹¹ Kobilai kapaaran kaŋin: kwaŋin kojenut ikagwelak amerekekin lukerereete eoŋ ebe kerai akirot naka EJAKAIT,

¹² Kabala kes ebe, “Arai kitojokito, koinakinai eoŋ ekaropit; arai mam, kinyeis.” Kitemoto do ekaropit atutubeta akaisauni nuka epuesa,

¹³ Kabala EJAKAIT eoŋ ebe, “Kocakak ekaiean” etiai lokapolon loapotu ketemokis eoŋ. Kalem atutubeta akaisauni nun nuka epuesa, kacakak ekaiean, togo loka EJAKAIT.

¹⁴ Kasodi eoŋ aibil ebelaka ece Eidie, tetere abili einaeane kama ejai Yuda ka Isirael.

¹⁵ Kabala EJAKAIT eoŋ ebe, “Kolemu bobo iboro luka ekeeokon loebanaana.

¹⁶ Naarai koany, adakuni ekecokon kakwap, lomam epod lueoliorito, karaida amoot luesiarakina, karaida aider luebilil; mam da itadaki luicasito, konye enyami ŋesi akiriŋ naka luetumitos, ecilicilei imagegerekee.

¹⁷ Itukwi ekeeokon lotai loejali esipan! Kojaun ekileŋ akanike, akonuke da nakoteten! Koono de akekan, Komudukanar eut akekonu nakoteten!”