Rusi 3 - Ebaibuli

¹ Abu Naomi tataake kotema ŋes ebe, “Akokuka, mam kamoikini neibworaria, tetere iiauni ejok?

² Emamei kereka Boas lokokekiwok lolem iboienenei ijo kabulesinike? Koany, epiesi esairi akuare na kopejal.

³ Aso kiloŋ kotuanar kakinyet, konap anapitokon, kijesar opejal; konye sirikitejenun mama ejai etuŋanan ŋol aitodol naedaunia ŋesi ainyam ka aimat.

⁴ Kosodi naeperio, kojen aibois naeperi ŋesi, koloma ijo da kopuko akeieke koper; kilimokini ŋesi jo nuiswamai.”

⁵ Kotema ŋesi ebe, “Nuiner ijo kere eswamai.”

⁶ Kosodi ŋesi aiiesar opejal, kiswama kere kwape ajaatar nuecorakinit ŋes tataake.

⁷ Kosodi kedau Boas ainyam ka aimat, kolakar etauke, kolot apero ariri naka atukot naka akima: kobu ŋesi eeedi, kopuko akejeneke, koper.

⁸ Kosodi kidinebai korien etuŋanan, kibelokin; ido koany, aperi aberu kakeieneke.

⁹ Kotema ebe, “Iŋai bo ijo?” Koboŋok ŋesi ebe, “Eoŋ Rusi akonibulesit; asa kimukoo abulesitikon kanapitokon; naarai irai ekalakunanika.”

¹⁰ Kotema ŋes atiar, “Kisireren EJAKAIT jo akokuka; itodu asianut naedeparit kosane aitelekar nasodit, naarai mam itupanar itelepai, arai lukican arai ikabarak.

¹¹ Kwape kwana da, akokuka, sirikiyoŋ; keswamakini jo kere nuinera; naarai ejeŋi ere kere loka ikatuŋa kwape iraar aberu naiiok.

¹² Erai teni abeit ebe arai eoŋ lokokekikon; konye ejai ece loeapie koinaeane aitelekarit eoŋ.

¹³ Aso kosalak ne akuare na, kosodi kedol atupurue arai kiiswamak ŋesi jo aswam naka ekalakunan, ejok; kiswamak do ŋesi jo aswam naka ekalakunan; konye do arai mam ecamuni aiswamakin jo aswam naka ekalakunan, ŋes do keswamakinia eoŋ jo aswam naka ekalakunan, kwape ejaria EJAKAIT. Koper aitodol tupuruc.”

¹⁴ Koper akejeneke aitodol tupuruc; konyou eroko yeniee kejena yeniee. Naarai abu kotema ebe, “Sirikejenun ebe abunit aberu na opeial.”

¹⁵ Kotema atiar, “Koyau elou loimukor ijo, kitin”: Kosodi ŋesi aitin; kitemokinai aitemisio akanykape nuka esairi kisibwok ŋes; kolot ore,

¹⁶ Kosodi kedol neejai tataake kotema atiar, “Iŋai bo ijo, akokuka?” Kolimok ŋes kere nuabu etuŋanan kiswamak ŋes.

¹⁷ Kotema ŋesi ebe, “ŋes kainakini aitemisio nu akanykape nuka esairi; naarai abu kalimok ebe, ‘Mam ilosi neejai tataakon komamei ibore,’”

¹⁸ Kosodi atemar ebe, “Kiboikin kopala akokuka, aitodol neijenunia neebearete akiro: naarai mam etuŋanan ŋol iyenuni aitodol naedaunia akirot na lolo.”