Rusi 1 - Ebaibuli

¹ Kosodi kanen kapaarasia nuatubioto ikatubok, abu ebeli kojau akwap. Abu etuŋanan loka Bet-lekem-yuda kolot aiboiororoi akwap naka Moab, ŋes ka akeberu, ka odweke iarei,

² Ekiror loka etuŋanan kaŋol kerai Elimelek, ekiror da loka aberuke Naomi, ikiroria luka odwcke iarei Malon ka Kilion, Ipuratin luka Bet-Iekem-yuda, Apotu kodoloto akwap naka Moab, kiboiororos kaŋina.

³ Kotwana Elimelek ekile loka Naomi; kosal ŋesi ka odweke iarei.

⁴ Apotu komanyata aŋor nuka Moab; ekiror loka adiopet Orupa, ekiror da loka nakiareit Rusi: apotu kesi kodaut ikar kwape itomon kaŋina.

⁵ Kotwakata Malon ka Kilion iarei kere; kotwania aberu odweke iarei ka ekileke da.

⁶ Kosodi konyet ŋesi anyoun ka aterakake, aboŋor anyoun kakwap naka Moab; naarai abu kiira kakwap naka Moab ebe abu EJAKAIT koanyanar iketuŋa ainakin kes inyamat,

⁷ Konyou kaibois kanaeboienenoo, ka aterakake aarei nepepe kaŋes; koderoto erot aboŋor akwap naka Yuda,

⁸ Kosodi Naomi atemar aterakake aarei ebe, “Ape, koboŋosi ŋinidiopet kayesi ore loka totoke; kiswamak EJAKAIT yes nukasianut, kwape ipotu yesi da kiswamakiniata lukatwak, ka eoŋ da.

⁹ Koinak EJAKAIT yes adumun aiyeŋun, ŋinidiopet kayesi kore loka ekileke.” Kosodi ŋesi ainu kes; kodelosi, komonyata akiyo.

¹⁰ Kotemasi kesi ŋes atiar, “Okwe ito, konye kiboŋori isio nepepe kajo mama ejaas ituŋakon.”

¹¹ Kosodi Naomi atemar kes ebe, “Kibelokinos bobo adweka: kanukinyo ipudatar yesi aupar keoŋ? Eroko kereka idwe ejaas aliligeteka lueraunos ikiliokokus?

¹² Kibelokinos bobo, adweka, koloto; naarai amoion eoŋ noi, mam adumuni ekiliokit ece. Arai kener eoŋ ebe, Amuno, karaida kajaun kekiliokit akuare na, kauru da idwe lusap;

¹³ Tikidarata kereka yesi kes apoloor? ŋes inyeiniata yesi adumun ikiliok? Okwe, adweka; naarai arieba eoŋ kanukus, naarai abu akan naka EJAKAIT kolom aluikin eoŋ.”

¹⁴ Kodelosi bobo, komonyata akiyo: konu Orupa tataake, konye kimorikikinos Rusi kaŋes.

¹⁵ Kobala ebe, “Koany, abono akainikon mama ejaas ituŋake, ido mama ejai edekeke: kobono ijo da kotupa akainikon.”

¹⁶ Kotema Rusi atiar, “Sirikiinaina eoŋ aiial jo, aboŋor komam kiupar kajo: naarai mama ibeenenei ijo, ŋes abeenenei eoŋ da; kaneiperenenei ijo, ŋes aperenenei eoŋ da; eraunos ikonituŋa ikatuŋa, Ekonideke da Ekadeke.

¹⁷ Neitwanikini ijo, ŋes atwanikini eoŋ, ŋes kedaikinio da; keswamak EJAKAIT eoŋ kwaŋin ka adepar da, arai ca kitiaki akirot kere jo keoŋ dimarai atwanare.”

¹⁸ Kosodi keanyu ŋesi ebe adau aitogogoŋ alosit kaŋes, kinyck do einer kaŋes.

¹⁹ Kosodete kesi aarei adipar aitodol naadolioto Bet-lekem. Kosodi kanen kedaut adolore Bet-lekem, abu ere kere koriaria kanukee, kirioros aŋor ebe, “Naomi nape na?”

²⁰ Kobala kes ebe, “Sirikinyarito eoŋ Naomi, konye konyarai Mara: naarai abu Lokapedor kere keswamak eoŋ nukadwarak noi.

²¹ Abu kolo kanyou kane eleleba, ketobonu EJAKAIT ore emamei ibore: inyo ca kinyaritotor Naomi? Kwabo erai EJAKAIT ekajenen kamaka, abu Lokapedor kere ketican eoŋ.”

²² Kwaŋin koboŋ Naomi, ka Rusi Amoabut, ateranike nepepe kaŋes, naaboŋunio anyoun kakwap naka Moab: kodoloto Bet-lekem napeegeunio aisak.