Obadia 1 - Ebaibuli

¹ Aitapoet naka Obadia, Inera kwanata Ejakait EDEKE nuka Edom ebe: Kipupu akiro kaneejai EJAKAIT, Ejukunitai ekiyakia alimokin atekerin ebe: “Konyoutu yesi! Kanyoutu oni aitiji ŋes!”

² Koany, ketidisiari jo katekerin: Kimwaŋio noi.

³ Kimodo jo eitur loka etaukon, Okwe jo loiboie kaciŋeta nuka emoru, Loiboie kaneicelelei; Loibala kotaukon ebe, “ŋai ca epedori aitodokun eoŋ kwap?”

⁴ Ebala EJAKAIT ebe, Karaida kidir kuju bala emorukaalet, Karaida kejaun akaikon kidiŋ aacer, Ketodokuni jo kaŋina.

⁵ Arai kibunokinito ikokolak jo, Arai kibunokinito ikerurwok kuare, (Mere kimudiario jo!) Mam tikekokwata aitodol naeupiata?

⁶ Arai kibunokinito ikedeak emusabibu Mam tikideutu imusabibun lueroko bon? Eŋanyiŋanyi ca ma iboro luka Esau! Aŋici ca ma aiŋadisiake nuibwaa!

⁷ Kireŋeut ituŋa kere lukitutukito kajo orotokon, Kiton oikor: Kimodata ituŋa luinapakina kajo, kipikosi da; ŋul luenyamete akonitap kilokata jo katacit: Emamei aijen kotomakeŋ.

⁸ Ebala EJAKAIT ebe, Mam kereka eoŋ kapaaran kaŋin Amudiari lukacoa ko Edom, Ka aijen komoru loka Esau?

⁹ Iyaloŋoŋoete ikagogoŋokokon, jo Teman, Ŋes ainakini ŋinituŋanan emudiario Komoru loka Esau kaario.

¹⁰ Kirumete jo ileic kanuka adedeŋ Naibu kiswamak onacekon Yakob, Kimudiario ikar kere.

¹¹ Kapaaran naibu kobwoia kawai, Kapaaran naejoreoritotor imo ikeboro, Naalomariata lukaeekwap oruteike, Kilamilamata eroet kanuka Yerusalem, Kosubite ijo bala ediopet kakesi.

¹² Konye sirikite apaaran naka onacekon Kapaaran naka icanike, Siriyalama kanuka idwe luka Yuda Kapaaran naka amudiariokec; Karaida einer nuka eitur Kapaaran naka aiyaloŋoŋ.

¹³ Sirikiloma orute loka ikatuŋa Kapaaran naka epolakec; Eebo, sirikite aiticanitoikec Kapaaran naka epolakec, Karaida aidokokin akonikanin oborokec Kapaaran naka epolakec.

¹⁴ Sirikibwo kopidin amudiar luke luekuete; Sirikijaik luke luideunos kapaaran naka aiyaloŋoŋ,

¹⁵ Naarai eapie apaaran naka EJAKAIT katekerin kere. Kwape ibu kiswamaa, kiswamakinio jo da kwaŋin, Eboŋokini akoniswam akoukon elopet.

¹⁶ Naarai kwape ibu komasia koronataka lokalaunan, Emasete kwaŋin atekerin kere tiritir; Eebo, emasete, kilikorete, Ejaunos bala mam lem ejauna.

¹⁷ Konye ejaunos luekuete Moru Sion, Eraun lokalaunan; Irumi ekek loka Yakob airumetake.

¹⁸ Eraun ekek loka Yakob akim, Ekek loka Yosep da aŋajepa nuka akim, Ka ekek da loka Esau ariaŋ; Enokete kesi, enyamari kes: Emameun yenideun kokek loka Esau; Naarai ener EJAKAIT.

¹⁹ Irumete luka ari naka Eŋalakimak emoru loka Esau; Irumete luka apuutona da Ipilisitian: Irumete emanikor loka Epuraim, ka emanikor da loka Samaria; Irumi Benyamin da Gilead.

²⁰ Luijoreoritai luka ajore na naka idwe luka Isirael Luajaas koKanaanin, irumete aitodol Sarepat; Luijoreoritai da luko Yerusalem, luejaas Separad, Irumete ireria luka ari naka Eŋalakimak.

²¹ Epote iketaiarak Moru Sion atubokin Emoru loka Esau; Eraun ajakanut naka EJAKAIT.