Nakum 1 - Ebaibuli

¹ Abwokon naka Ninebe, Eitabo loka aitapoet naka Nakum Elikosit,

² Erai EJAKAIT Edeke lokekolo, inyaŋi da; Inyaŋi EJAKAIT, ileleba anyunyura; Inyaŋi EJAKAIT kama ka lukediŋeteke, Elilikini lukasurupoke,

³ Iyapi EJAKAIT anyunyurikin, eili ili da akepedor, Lomam itojoki luegwaunito akiro. Ejai EJAKAIT ekerot otapipirio, kokwamin da, Idouon kes adae nuka akeieke,

⁴ Iretakini ŋesi aŋolol, itooni, Itooni da icorin kere: Enonokiar Basan, ka Karumel, Enonokiar da aturot naka Lebanon.

⁵ Emaranete ironan kakonyeneke, Ecalaros iukon; Ebuburiar akwap kakonyeneke, Eebo, akwapin, ka luibojete kotoma kere.

⁶ Iŋai bo epedori abwoikin aisiopoke? Iŋai da epedori atitiŋikin adedeŋ naka anyunyurake? Ebukunio anyunyurake kwape akim, Etiyatiyai ŋesi imor.

⁷ Ejok EJAKAIT, abwas kapaaran naka ican; Ejeŋi ŋesi nul luemunosi ŋes.

⁸ Konye itanani eut aiboisike kakalele naelapara, Erukoria lukasurupoke kiton amuton.

⁹ Anyoika nuitetemonorete kaomisio aluikin EJAKAIT? Itanani ŋesi cut: Mam irucakini bobo aitican.

¹⁰ Naarai karaida esubito bala ikukwa luikodikodito, Epalala kesi da kanumatanakec, Idoporio kes cut kwape ariaŋ naconit de.

¹¹ Aiomu idiopet kamakon yenitetemor aronis aluikin EJAKAIT, Yenineruni nukaronok.

¹² Inera EJAKAIT kwanata ebe: “Karaida egogoŋ kes cut, ipu da, Ejepio kes, eoliorete. Karaida abu kareite jo, Mam bobo karei joo

¹³ Kwana abili aiookotoke kamakon, Aaŋololedi irikoikon.”

¹⁴ Abu EJAKAIT kicorak nukon ebe: “Mam bobo eyeio ekonikiror; Kotogo loka idekesiokon Ajepi aput naegerer, ka aput da naecalara. Etemokini atesikon; Naarai isiliana ijo.”

¹⁵ Koany, akejen nuka aŋololol kaloeyauni akiro nukajokak, Loelimonokini ainapakin koronan! Kidar ipucinokon, ijo Yuda, Kitodol aiyaposiokon: Naarai mam ikaronon itori bobo tomakon; Egelario eut.