Matayo 9 - Ebaibuli

¹ Kodoka Yesu ataker, kikwaŋar, kodol ore lokobukec.

² Ido koany, koinut ŋes etuŋanan lokasenyan, eperi koitada: nakeanyunia Yesu akeceiyuun, kotema lokasenyan atiar, “Okoku, kotitiŋior; esionii akonidiakanareta.”

³ Ido koany, kotemasi ice kokewadikak kotauonokec atiar, “Einyanakini lo Edeke.”

⁴ Konye kojen Yesu aomisio nukotauonokec, kotema atiar, “Kanukinyo iwomitotor nukaronok kotauonokus?

⁵ Ani bo naepatana, atemar atiar, Esionii akonidiakanareta, arai bo atemar ebe, Konyou, kolot?

⁶ Konye tetere ijenunete ebe ejai Okoku loka etuŋanan apedor kakwap aisioni adiakanareta” kosodi kotema ŋesi lokasenyan atiar, “Konyou, kibwok ekoniitada, kolot orekon.”

⁷ Konyou ŋesi, kolot oreke.

⁸ Konye nakeanyuniata ikodeta, kokuriakaros, kitopoloosi Edeke, lokeinakini ituŋa apedor naikoni na.

⁹ Nakitoritor Yesu kanen, koany etuŋanan iboie kaitelemis esolo, ekekiror Matayo; kotema ŋes atiar, “Kotupunai.” Konyou, kotupa ŋes.

¹⁰ Kosodi kanen, nakiboikin togo ainyam, koany, kopotu luketelemak esolo ka ikadiakanarak luipu kiboikinos nepepe ka Yesu ka ikekesisiak.

¹¹ Nakeanyuniata Iparisayon, kotemasi ikekesisiak atiar, “Kanukinyo emoriata Ekusikesisianakinan ka iketelemak esolo ka ikadiakanarak da?”

¹² Konye nakepupunio Yesu, kotema atiar, “Lukaŋaleok mam ipudasi emurwon, dimarai lukadekak.

¹³ Konye koloto yesi kisisiata apolou naka akiro nu ebe, ‘Akoto aitim, kwabo mere asuban.’ Naarai mam abunit anyarit ikadolitok, dimarai ikadiakanarak.”

¹⁴ Kosodete kopotu ikesisiak luka Yokana mama ejai, kobalas ebe, “Kanukinyo kilunia isio ka Iparisayon, konye ikonikesisiak mam eluŋete?”

¹⁵ Kotema Yesu kes atiar, “Epedorete kereka luenyaritai oiterane aibworo, naeiaarar ka eteran? Konye eponito apaarasia nuedemarere eteran, eluŋete do,

¹⁶ Emamei ituŋanan yenedonyokini acana naka egoe lokitetet toma ananito namojoŋ; naarai acana naibwaikinio ecili anapito, iyatakini do acilat.

¹⁷ Kwabo mam ituŋa ibwaikinete ebino lokitetet toma oriagin lumojoŋ luka emukule; arai kibwaikis, enedasi iriagin, ebukor ebino, emunaaros iriagin; dimarai ibwaikinete ituŋa ebino lokitetet oriagin lukitetiak, tetere ikuniaete kere.”

¹⁸ Napelimokini ikesisiak luka Yokana ŋun, koany, kobu ekayaiton, kokukokin kotema atiar, “Adaun akokuka kwape kwana; konye bia ma kidokok ŋes akonikan, ejari do.”

¹⁹ Konyou Yesu kotupa ŋes, nepepe kikekesisiak.

²⁰ Ido koany, kobu aberu kokauke, nakedeka alel naka aokot ikar itomon ka luarei, kotiro atwele naka anapitoke;

²¹ naarai kotema kotauke atiar, “Arai katiro anapitoke bon, aŋaleuni.”

²² Kibelokin Yesu, koany ŋes, kotema atiar, “Kotitiŋior akokuka; kitaŋaleu jo akoniiyuun.” Koŋaleu aberu ameun kosawa kaŋol,

²³ Nakedolio Yesu ore loka ekayairon, koany luekusere alamarun, ka ekodet eborianete,

²⁴ kotema atiar, “Kolomasi kiŋa; naarai mam etwanit ipese konye eiotoi.” Kokienatar ŋes.

²⁵ Konye kedau aitolomar ekodet, kooma toma, kitiŋ akan naka ipese, konyou ŋin.

²⁶ Kilosikinos akiro ŋun akwap ŋin kere;

²⁷ Nakitorio Yesu kanen, kotupasi imudukiok iarei, kiworoto kotemasi atiar, “Okoku loka Daudi, kitimoi sio.”

²⁸ Keloma ŋes itogo, kopotu imudukiok mama ejai; kotema kes Yesu atiar, “Iyuunitos ebe apedori eoŋ aswam na?” Kotemasi atiar, “Eebo, Ejakait.”

²⁹ Kosodi kotiro akonyenekec kobala ebe, “Kwape ejaar akusiiyuun kiswamakin yes kwaŋin.”

³⁰ Kokwenyutu akecekonyen. Kicoro Yesu kes noi ebe, “Kocoito, kinyek imodiotuŋanan ajenun.”

³¹ Konye konyoutu kesi, kisiarakis ekeemut akwap ŋin kere.

³² Napenyounete kwi, koany, koinunai ebaŋ loajai ajokit.

³³ Kireŋear ajokit kiner lobaŋ; koumokis ikodeta, kobalas ebe, “Mam lem etakanunitos nuikote nen kotoma Isirael.”

³⁴ Konye kobalas Iparisayon ebe, “Ireŋeari ŋesi ajokin kanuka lokapolon loka ajokin.”

³⁵ Kimaniman Yesu ireria kere, kokialon da, isisianakini katukosiakec ka alimonokin Akiro Nukajokak nuka ajakanut, ka aitaŋaleunun ŋolipone kere loka adek ka akalanyanut da,

³⁶ Keanyu ikodeta, kitim kes, naarai kilworuna ka aisiarakina, bala amerekekin nuemamei ekecokon.

³⁷ Kosodi kotema ikekesisiak atiar, “Ipu idwenyan, konye ikidioko ikeswamak;

³⁸ aso kilipa Ejakait loka aidweny kijuk ikeswamak toma aidwenyeke.”