Matayo 8 - Ebaibuli

¹ Kedoku Yesu koroŋat, kotuput ikodeta luipu.

² Ido koany, kobu etuŋanan lokatapon mama ejai, koma ŋes, kobala ebe, “Ejakait, arai ikoto, ipedori aiswagar eoŋ.”

³ Korio Yesu akekan, kotiro ŋes, kotema atiar, “Akoto; kiswagar.” Atipet kiswagar aketapon.

⁴ Kolimok Yesu ŋes ebe, “Kocoite, sirikilimok idiotuŋanan; konye kolot, kitodiar mama ejai esasedoti, koinak ainakinet nakolo kicorakini Musa, araun aitejenunet kamakec.”

⁵ Kosodi nakelomaria Kaparanaum, kobu ekapolokiton erioŋet mamakeŋ, kiŋaiŋa,

⁶ kotema atiar, “Ejakait, eperi ekatelepat kotogo edeka eseny, erieba noi jokan.”

⁷ Kotema ŋes atiar, “Abuni aitaŋaleun.”

⁸ Koboŋok ekapolokiton kobala ebe, “Ejakait, mam eoŋ kebusakinit jo alomun kwap kekaswi; konye kolim akirot bon, eŋaleuni ekatelepat.

⁹ Naarai eoŋ da arai etuŋanan lokayaitai, ejaas iserikalei luayait eoŋ: ido alimokini ediopet ebe, ‘Kolot,’ elosi; ece da ebe, ‘Bia,’ ebuni; ekabulesit da ebe, ‘Kiswama na,’ ido iswamai.”

¹⁰ Nakiiraria Yesu ŋun, koumok, kotema kwi luketupito atiar, “Abeit katemari yes atiar, Mam lem adumunit aiyuun naepol naetia na, karaida toma Isirael kere,

¹¹ Katemari yes atiar, Epote rwaru luipu anyoun kokide koto da, kiboikinos kesi nepepe ka Aburaam, ka Isaak, ka Yakob, toma ajakanut naka akuj.

¹² Konye idwe luka ajakanut ecakario toma amuton nakokiŋa: ejaun kaŋina aimony ka airiamanakin ikel.”

¹³ Kotema Yesu ekapolokiton atiar, “Kolot, kwape ejaar akoniiyuun, kojau kwape kwaŋin.” Koŋaleu etelepat kosawa kaŋol.

¹⁴ Nakelomaria Yesu togo loka Petero, koany amuranike eperi edeka ekamidi.

¹⁵ Kotiro akekan, koŋaleu ekamidi; konyou kijaanak ŋes.

¹⁶ Nakitiboŋ, koinunai lukajokin luipu: kireŋea ajokin kakekirot, kitaŋaleu lukadekak kere,

¹⁷ Tetere itololikinio akirot naenerit Isaia enabi ebe, “Kolema ŋesi elopet awokokalanyanut, kibwok adekesiawok.”

¹⁸ Kosodi keanyu Yesu atukon nuipu irimorito ŋes, kicorak aikwaŋar juwai.

¹⁹ Kobu ekewadikan ediopet mama ejai, kotema ŋes atiar, “Ekesisianakinan, katupenenei jo kama ilosi kere.”

²⁰ Kotema Yesu ŋes atiar, “Ejaas ikuwei apanya, akweny da nuka apak ejaas akaisikec; konye Okoku loka etuŋanan emamei nama iperikini akekou.”

²¹ Kotema ece kokesisiak ŋes atiar, “Ejakait, kisiikinai ber kalot keda papaka.”

²² Konye kotema Yesu ŋes atiar, “Kotupunai; kinye lukatwak kidaata lukatwakakec.”

²³ Nakedokaria ataker, kotupasi ikekesisiak.

²⁴ Ido koany, kodakun ekwam loepol kaŋolol, korapasi akailan ataker: konye kejotoi ŋesi.

²⁵ Koloto ikekesisiak mama ejai kitwekenyut, kobalas ebe, “Ejakait, kitajarai; kimudiar.”

²⁶ Kotema kes atiar, “Kanukinyo ikuriakarotor, yes luedit aiyuun?” Kosodi konyou, kiretak ikwamin ka aŋolol; kojaun aiyamakin cut,

²⁷ Koumokis ituŋa, kobalas ebe, “Ikoni bo ai etuŋanan lo? Naarai ikwamin ka aŋolol da erimasi ŋes.”

²⁸ Nakedolio ŋesi okekwa juwai toma akwap naka Igadarenin, kiriamunos kituŋa iarei lukajokin, lukepote katesin, lukededeŋ noi, komamei ituŋanan yenikepedori aitor korot kaŋol,

²⁹ Ido koany, kiworoto, kobalas ebe, “Ijo Okoku loka Edeke, anyoika ijo kasio? Ibu kereka ijo aitican sio eroko apakikosi kedolo?”

³⁰ Ido kojai esipan loka ipegei luipu edakasi kama elwana.

³¹ Kiŋaiŋaata ajokin ŋes kobalas ebe, “Arai kiireŋea sio, kijukarai kalomasi osipan je loka ipegei.”

³² Kotema kes atiar, “Kolototo.” Kolomutu kolomasi toma opegei; ido koany, komotar esipan kere nejululuei kibirokinos aŋolol, kotwakikis akipi.

³³ Kokerata ikecokok, kolomasi ore, kolimonokis akiro kere, ka nukedoikinete kwi Iukajokin.

³⁴ Ido koany, kolomut lukore kere airiamun ka Yesu: nakeanyut, kiŋaiŋaata ŋes anyoun koikorunokec.