Matayo 7 - Ebaibuli

¹ “Siritubonokinete, yes da kinyeis atubokinio.

² Naarai etube loitubete, ŋopeŋol kitubokinere; ka aitemis naitemioto, ŋipeŋin kitemere yes da,

³ Aso kanukinyo isesenia igugut yenejai akoŋu naka onacekon, komam ipodo akitoi naejai akoŋukon kilopet?

⁴ Arai ilimokini biai onacekon ebe, ‘Kinyek kalem igugut yenejai akoŋukon’; ido koany, ejai akitoi akoŋukon kilopet?

⁵ Yenikesoswai ijo, kolem ber akitoi naejai akoŋukon kilopet; kosodi konyet asesen kotenan alemun igugut kakoŋu naka onacekon.

⁶ “Sirikiinakis iŋokwo ibore yenikalaunan, ido sirikicakakis akusilulun kakonyen nuka ipegei, kinyeis aicakacak kakejekec, ka aibelokin agwaragwar yes.

⁷ “Kilipa, kiinakinio; komoata, idumunete; kikuŋukuŋoto, kiŋaikinio.

⁸ Naarai ŋin yenilipi ijaikinio; yenemoi edumuni; ka yenikuŋukuŋi da enaikinio.

⁹ Arai iŋai kereka kayesi, kilip ikokuke emugati, einakini tope amoru?

¹⁰ Arai kilip agar, einakini tope ŋes emun?

¹¹ Aso arai yes lukaronok ijenete ainakin ikusidwe ainakineta nuejok, mam kereka itelekarit noi Papakus loejai toma akuj ainakin ŋul Iuilipete ŋes iboro luejok?

¹² Aso nuikotosi ituŋa aikonakin yes, kikonakis yesi da kes kwape kwaŋin: naarai ŋun kes ikisila ka inabin da.

¹³ “Kolomasi aitor orute loedidiŋ; naarai elal erut, ipajajai da erot, loebei amudiario, luelomarete da kotomake eraas luipu.

¹⁴ Edidiŋ erut, eridid da erot loebei aijar, luedumunete da eraas luikidioko.

¹⁵ “Kocoito inabin Iukeŋalak, lukiponikinete enapito inapen luka amerekekin, konye kotoma eraas ipeen luededeŋ.

¹⁶ Ijenunete kes kakeceraito. Edeŋete kereka ituŋa imusabibun kokito luka ikukwa, arai bo itinin kokodokodo?

¹⁷ Kwape kwaŋin ŋolikitoi loejok erai araito nuejok; konye do ekitoi loerono erai araito nueroko.

¹⁸ Mam epedori ekitoi loejok aira araito nueroko, karaida ekitoi loerono aira araito nuejok.

¹⁹ Ŋolikitoi lomam erai araito nuejok ejepario, kocakakinai akim.

²⁰ Kanuka ŋun ijenunete kes kakeceraito.

²¹ “Ŋinituŋanan yenikabala eoŋ ebe, ‘Ejakait, Ejakait,’ mere ŋes elomuni ajakanut naka akuj; dimarai yeniswamai nuekoto Papaka loejai toma akuj.

²² Katemarete luipu kapaaran kaŋin atiar, ‘Ejakait, Ejakait, mam kereka kipou kadwarata kokirorikon, kokirorikon da kereŋeasi ajokin, kokirorikon da keswamata aswamisio nukapedor nuipu?’

²³ Kasodi alimor mamakec ebe, ‘Mam lem kajeni yes nepecep da: konyoutu kama ajai, yes lukeswamak nukepali.’

²⁴ “Aso ŋin yeniirari akakiro nu kiswama kes, ituputoorio ketuŋanan lokacoa, lokeduki eketogo atiida:

²⁵ kotep akiru, kolelek akalele, kokuta ikwamin, koleata etogo ŋol; mam ibiroro: naarai kepesikinitai atiida.

²⁶ Ŋin da yeniirari akakiro nu, komam iswamai, ituputoorio ketuŋanan lobaŋ, lokeduki eketogo asiŋe:

²⁷ kotep akiru, kolelek akalele, kokuta ikwamin, koleata etogo ŋol; kibiror; akeibiror da korau naepol.”

²⁸ Kosodi kanen, kedau Yesu akiro ŋun, koumokis atukon jokan akeisisianakin,

²⁹ Naarai kisisianakini kwape etuŋanan loejai apedor, kwabo mere kwape ikewadikakakec.