Matayo 27 - Ebaibuli

¹ Napekiwala akwap, kinerut isasedotin lupeti ka imakio kere luka ituŋa asurokin Yesu aiar;

² koenata ŋes, koyaŋaasi, kijaikis Pilato lokerai ekayaiton.

³ Kosodi Yuda lokebilakini ŋes ebotet, keanyu ebe adaun atubokin aitelekar, kiitok, kinyakak isasedotin lupeti ka imakio atutubeta akaisauni nuka epuesa,

⁴ kobala ebe, “Abu kadiak, abilakin ebotet aokot numam akirot.” Konye kotemasi kesi atiar, “Anu nat kamakosi? Nukon bo ŋun.”

⁵ Kocakak atutubeta kwa nuka epuesa aibois nakalaunan, konyou; kolot komiedakin.

⁶ Kolemasi isasedotin lupeti atutubeta nuka epuesa, kobalas ebe, “Mam ibus aibwaikin kes aiŋadis, naarai eraas etiai loka aokot.”

⁷ Kinerut, kogweluniata emanikor loka ekajean, aidaanakin nen ikalotok.

⁸ Kanuka ŋun ŋes enyaritere emanikor ŋol, Emanikor loka Aokot, kiton lolo,

⁹ Kosodi kitodolikinoi akirot nakinerit Yeremia enabi ebe, “Apotu kolemasi atutubeta akaisauni nuka epuesa, etiai loka ŋol kalokitirianitai, lokitirianete ice kodwe luka Isirael:

¹⁰ kogweliata emanikor loka ekajean kwape kicorakinia Ejakait.”

¹¹ Kobwo Yesu kakonyen nuka ekayaiton; kiŋit ekayaiton ŋes ebe, “Irai kereka ijo ekabaka loka Iyudayan?” Kotema Yesu atiar, “Ijo ibala.”

¹² Nakiwosaata ŋes isasedotin lupeti ka imakio mam eboŋokino akirot.

¹³ Kosodi kotema Pilato ŋes atiar, “Mam kereka jo ipupi nuetia nen nuiwosaete kesi?”

¹⁴ Mam ŋes eboŋokino, karaida amodiokirot: koumok noi ekayaiton.

¹⁵ Ketapit ekayaiton kopucit aosianakin ekodet eenat ediopet lokekotonokinos,

¹⁶ Kejaas keenat loajenikina kapak kaŋin, lokenyaritai Baraba.

¹⁷ Naketukokinotor, kotema Pilato kes atiar, “Ikotosi kaosikis yes iŋai? Baraba arai bo Yesu loenyaritai Kristo?”

¹⁸ Naarai ajeni ŋesi ebe ainakis kanuka ekolo.

¹⁹ Nakiboikinor oicoloŋ loka aitub, kiyakik akeberu ŋes, kotema atiar, “Sirikiswamak ekadoliton ŋol adiokirot; naarai keticani nuipu kairujasit kakuar kana kanukeŋ.”

²⁰ Kosodete kisidikoto isasedotin lupeti ka imakio ikodeta tetere ilipete Baraba, ka amudiar Yesu.

²¹ Konye Koboŋok ekayaiton kotema kes atiar, “Ikotosi kaosikis yes iŋai ka luarei?” Kobalas ebe, “Baraba,”

²² Kotema Pilato kes atiar, “Aso do ekonakini ai Yesu loenyaritai Kristo?” Kobalas kere ebe, “Kibubukinoi.”

²³ Kobala ebe, “Kanukinyo? Naanyoin aronis nakiswamai?” Konye kiyatakisi kesi aiworo noi ebe, “Kibubukinoi,”

²⁴ Kosodi keanyu Pilato ebe mam nuepedori, konye iyata ecelet, kolem akipi, kilot akekanin kakonyen nuka ekodet, kobala ebe, “Emamei eoŋ akirot kotoma aokot nuka etuŋanan kalo loedolit: nukus bo ŋun.”

²⁵ Koboŋokis ituŋa kere ebe, “Kobeikisi akeokot sio, ka ikosidwe da.”

²⁶ Kosodi koosik kes Baraba: konye kedau aida Yesu, koinak tetere ibubukinio,

²⁷ Kosodete iserikalei luka ekayaiton koyaŋaasi Yesu toma opuraitorion, kotukonokin erioŋet kere mama ejai,

²⁸ Kolacasi ikenapen, kitanapa anapito nakareŋan,

²⁹ Kojeata aboko naka ikukwa, kitanapikis akouke, ka agada da kakanike nakoteten; kokukonokinos kakonyeneke, kokienatar, kobalas ebe, “Yoga, ijo Ekabaka loka Iyudayan!”

³⁰ Kimwaanakis aimul, kodemasi agada ŋin kinomonomiata akouke.

³¹ Kosodete kedautu akienar ŋes, kolacasi anapito ŋin, kitanapa ikenapen, koyaŋaasi aibubukin.

³² Napenyounete kore, kodumut etuŋanan Ekurenayot, ekekiror Simon: kitiŋaikis ŋol airioŋ emusalaba loka Yesu.

³³ Nakedolioto aibois naenyaritai Gologota, apolouke ebe, Aibois naka Abelekek naka Akou,

³⁴ koinakis aimat ebino loinyalakinitai epiu: kedau akiir, koŋer aimat.

³⁵ Kedautu aibubukin, kokorokorata akenapito, kailamilam eroet.

³⁶ Kiboikinos kidarata ŋes kaŋina.

³⁷ Kikaiakis kuju kakouke nueosatai ŋes nuewadikatai ebe, LO ŊES YESU EKABAKA LOKA IYUDAYAN.

³⁸ Kapak kaŋin kibubukinoi ikaŋatak iarei nepepe kaŋes, ediopet kakanike nakoteten, ka ediopet da kakanike nakokediany,

³⁹ Lukitorito nen koinyanakinete ŋes, kimuŋumuŋete da akecekwes,

⁴⁰ kobalas ebe, “Ijo lokaketan eyekalu, ka aiduk da kotoma apaarasia auni, kitajarun cani: arai irai ijo Okoku loka Edeke, kodoku komusalaba.”

⁴¹ Kikote nen da isasedotin lupeti kokienatar ŋes, nepepe ka ikewadikak ka imakio, kobalas ebe,

⁴² “Etajar ice; mam epedori aitajarun bon. Erai ŋesi Ekabaka loka Isirael; kodoku kwana komusalaba, kiyuuni do ŋes.

⁴³ Emunokina Edeke; mere cani kitajar ŋes kwana, arai ekoto ŋes; naarai abu kinera ebe, ‘Arai eoŋ Okoku loka Edeke.’ ”

⁴⁴ Ikaŋatak kwi da lukibubukinitoi nepepe kaŋes, korutonokis ŋes akiro kwapekwa.

⁴⁵ Ameun kosawa lokikanyetekape kojau amuton akwap kere kiton osawa Iokikanyetekaoŋon.

⁴⁶ Bala esawa Iokikanyetekaoŋon kodelo Yesu keporoto loepol, kobala ebe, “Eli, eli, lama sabakatani?” apolouke ebe, “Ekadeke, Ekadeke, kanukinyo kijalakinia eoŋ?”

⁴⁷ Ice kaŋul kalukebwoete kanen, kiirasi, kobalas ebe, “Enyarit ŋol Eliya.”

⁴⁸ Atipet koker ediopet kakesi, kolem acago, kileleb ebino loedwar ria, kibwaik toma agada, kitamat ŋes,

⁴⁹ Kobalas ice ebe, “Kinyek; kaanyutu arai cani ebuni Eliya aitajar ŋes.”

⁵⁰ Kodelo Yesu bobo keporoto loepol, kojal ekemoyo.

⁵¹ Ido koany, kocila aigalisit naka eyekalu kaarei, ameun kokuju kiton kwap; komaran akwap; kobwaŋabwaŋas amor;

⁵² koŋaanaros atesin; kitonyounoi awat nuipu nuka lukalaunak kalukolo keiotooros;

⁵³ kedau Yesu ajarun kolomut katesin, kolomasi ore lokalaunan, kitakanikinos luipu.

⁵⁴ Nakeanyuniata ekapolokiton ka ŋul da lukejaas kaŋes idarete Yesu, amaran naka akwap, ka akiro da nukiswamas, kokuriakaros noi, kobalas ebe, “Abeit kerai teni ŋol Okoku loka Edeke.”

⁵⁵ Kojaas da aŋor nuipu ŋina, nukesesenete kama elwanikina, nuketupito Yesu anyoun koGalilaya, ijaanakinete ŋes;

⁵⁶ kotomakec kejai Mariam Magadalene, ka Mariam toto naka Yakob ka Yosep, ka toto naka odwe luka Sebedayo.

⁵⁷ Kosodi napekitiboŋ, kobu ekabaran loka Arimataya, ekekiror Yosep, ŋes da elopet kerai ekesisian loka Yesu.

⁵⁸ Kolot ŋol mama ejai Pilato kilip akuan naka Yesu. Kosodi kicorak Pilato ŋes ainakinio.

⁵⁹ Kolem Yosep akuan, konunukik toma obaputa Ioelai,

⁶⁰ kibwaik toma atesike nakitetet, nakebokit ŋesi atiida; kikokorik amoru naepol agolokinio ekek loka ates, kolot.

⁶¹ Kejaas nen Mariam Magadalene ka Mariam ace, iboiete kotereikina ates,

⁶² Apaaran naatupakini, ŋes atemar ebe, akaulo kapaaran naka Aitemonokin, kotukokinos isasedotin lupeti ka Iparisayon mama ejai Pilato,

⁶³ kobalas ebe, “Ejakait, kiitunit isio ebe abala lem ekeŋalan ŋol naarokor ejari ebe, ‘Akaulo kapaarasia auni ajaruni.’

⁶⁴ Kanuka ŋun kicorak kidarai ates kojokan aitodol apaaran nakiwuniet, kinyeis ikekesisiak alosit akokwar ŋes, kosodete alimonokin ituŋa ebe, ‘Ajaru kotoma okatwak’ itelekari do aiŋal nakokau ya nasodit.”

⁶⁵ Kotema Pilato kes atiar, “Ejaas yes iserikalei lukedarak; koloto, kidarata kojokan kwape ipedoriata.”

⁶⁶ Koloto do kidarata ates kojokan, kipucakis amoru ka aibwaikin da iserikalei lukedarak.