Matayo 15 - Ebaibuli

¹ Kosodete kopotu Iparisayon ka ikewadikak mama ejai Yesu aponare koYerusalem, kotemasi atiar,

² “Kanukinyo ijalijalatar ikonikesisiak epone loka imakio? Naarai mam ilosete akecekanin naenyamiata.”

³ Koboŋok kotema kes atiar, “Kanukinyo ijalijalatar yesi aicorakinet naka Edeke kanuka eponekus?

⁴ Naarai abu Edeke kobala ebe, ‘Koyoŋitenene papakon ka totokon,’ ido ebe, ‘Ŋin yenimoromoroi papake arai totoke, abeit etwani.’

⁵ Konye yes ibalasi ebe, Arai elimokini ituŋanan papake arai totoke ebe, Lutikidum kamakaŋ ainakin Edeke, mam itepesenitai ayoŋit papake arai totoke.

⁶ Aso kanuka eponekus, itapalaut akirot naka Edeke.

⁷ Yes Iukesoswai! Araas nuebeito nuadwarit Isaia kanukus, ebe:

⁸ ‘Ketopoloorito ituŋa lu kaitukekec, Konye elwaka ikecetauon kama ajai;

⁹ Konye kamaete eoŋ atai, Isisianakinete aituutooreta nuka ituŋa bala erai aisisianakin nakabeit.’ ”

¹⁰ Konyarau ekodet kotema kes atiar, “Kiirasi kojenutu da:

¹¹ ŋin yenelomari kaituk mam emunaari ituŋanan, dimarai nuelomunete kaituk, ŋun emunaarete ituŋanan.”

¹² Kosodete kopotu ikekesisiak mama ejai, kotemasi ŋes atiar, “Ijeni kereka ijo ebe naeirariata Iparisayon akirot ŋin, apotu konyunyurikinos?”

¹³ Koboŋok kobala ebe, “Ŋinikiraa yenimam irait Papaka lokotoma akuj erutunio,

¹⁴ Kinyeis ŋul; eraas ikeŋarenok lumudukiok, Arai emuduki iŋarenikini emuduki, ibirokinos kere iarei toma aipany.”

¹⁵ Kosodi Koboŋok Petero kotema atiar, “Kitejenunai awaragan ŋin.”

¹⁶ Kotema atiar, “Eriŋa yes da emamei ajenun?

¹⁷ Mam ijenete ebe ŋinibore kere yenelomari kaituk edoli akoik, kosodi ikiŋaario?

¹⁸ Konye nuitorunete aituk elomunete kotau, ŋun kes emunaarete ituŋanan.

¹⁹ Naarai toma otau epote aomisio nukaronok, aiar, adoteu, aelo, akokolanut, asabanakin, amoromor,

²⁰ Ŋun kes emunaarete ituŋanan; konye ainyam eriŋa ilota akanin mam emunaari ituŋanan.”

²¹ Konyou Yesu kanen, kolot atutubeta nuka Turo ka Sidon.

²² Ido koany, kolom aberu Akanaanit koikorun kaŋul, kiworo ebe, “Kitimoi, wu Ejakait, ijo okoku loka Daudi; ikapese iticani noi ajokit.”

²³ Konye ŋes mam eboŋokino akirot, Kopotu ikekesisiak mama ejai kiŋaiŋaata ebe, “Kotwara ŋin; naarai iworotoi kokauwok.”

²⁴ Konye Koboŋok kobala ebe, “Mam kejukunio dimarai mama ejaas amerekekin nukeoliorete nuka ekek loka Isirael.”

²⁵ Konye kobu ŋin, koma ŋes, kobala ebe, “Ejakait, kiŋarakinai.”

²⁶ Koboŋok ebe, “Mam ejok alemun inyamat luka idwe, acakakin iŋokwo.”

²⁷ Konye kotema atiar, “Eebo, Ejakait; konye iŋokwo da enyamete ararasia nuedoununete komesa loka ijakakec.”

²⁸ Kosodi koboŋok Yesu kotema ŋes atiar, “Ijo ba toto, epol akoniiyuun; kojaut mamakon kwape ikotor.” Koŋaleu akepese ameun kosawa kaŋol.

²⁹ Konyou Yesu kaŋina kitor ariri kaŋolol naka Galilaya, kodoka oroŋat, kiboikin nen.

³⁰ Kopotu ikodeta luipu mamakeŋ, koinut luecodos, ka imudukiok, ka ibaŋiok, ka iŋwalasik, ka ice da luipu, kibwaikis akejeneke; kitaŋaleu kes,

³¹ Koumok ekodet, nakeanyuniata ibaŋiok ineras, iŋwalasik etenete, luecodos elosete, ka imudukiok da ekwenyete; kituroto Edeke loka Isirael.

³² Kosodi konyarau Yesu ikekesisiak kotema kes atiar, “Etim ekodet, naarai adaut apaarasia auni iboiete keoŋ, kwabo emamei ibore yenenyamete; mam akoto aitwar kes koriebi eteŋei, kinyeis aiilor korot.”

³³ Kotemasi ikekesisiak atiar, “Kidumuni kai inyamat luipu kamodiŋ aisimonikinia ekodet loetia ne?”

³⁴ Kotema Yesu kes atiar, “Ejaas yes imugatin imwaasi ai?” Kobalas ebe, “Ikanykaarei, ka agaria nuikidioko.”

³⁵ Kicorak ekodet aiboikin kwap,

³⁶ Kolem imugatin ikanykaarei ka agaria, kimal, kobilibil koinak ikekesisiak, kosodete ikesisiak koinakis ikodeta.

³⁷ Konyamata kere, kimonikinos; kotukonokis atutubeta nuabilibila nukesalete ibukito ikanykaarei ileleba.

³⁸ Lukenyamete keraas ikiliok ilukumin iwoŋon, kilema aŋor ka idwe,

³⁹ Kotwara ikodeta, kodoka ataker kolot atutubeta nuka Magadan.