Matayo 14 - Ebaibuli

¹ Kapaarasia kaŋun kiira ekabaka Kerode eemut loka Yesu;

² Kotema ikekejaanakinak atiar, “Erai ŋol Yokana Lokebatisan, ajaru kotoma okatwak; kanuka ŋun iswamai nukapedor ŋun kotomakeŋ.”

³ Naarai kikamunit Kerode Yokana koen, kibwaik aidaris, kanuka Kerodia aberu naka Pilip onaceke.

⁴ Naarai abu Yokana kolimok ŋes ebe, “Mam ibusakinit jo ajaut kaŋes.”

⁵ Kokoto aiar ŋes konye kokurianar ekodet, naarai aomito ebe kerai Yokana enabi.

⁶ Konye kedol apaaran nakaurio naka Kerode, kosom apese naka Kerodia kakonyen nuka ituŋa, kisiyalamik Kerode,

⁷ kanuka ŋun kisumunik kaiyaposit ebe einakini ŋes ibore kere yenilipi.

⁸ Kicoro totoke ŋes, kosodi kotema atiar, “Ae kane katuba akou naka Yokana Lokebatisan.”

⁹ Kokadak ekabaka; konye kanuka akeiyaposio ka lukemorete kaŋes kicorak ainakinio,

¹⁰ Kijuka kotubunoi akou naka Yokana kaidaris,

¹¹ koyaunai akekou katuba koinakinai apese, koyaŋa neejai totoke,

¹² Kopotu ikekesisiak koyaŋaasi akuan, kidaata; kosodete koloto kolimokis Yesu.

¹³ Kiira Yesu ŋun, konyou kanen kotoma ataker, kolot amodiŋ neejaikinor bon, Kiirasi ikodeta, kotupasi ŋes itorito kaneeonit anyoun koreria,

¹⁴ Kelom Yesu koany ekodet loepol; kitim kes, kitaŋaleu lukadekakakec.

¹⁵ Kitiboŋ akwap, kopotu ikekesisiak mama ejai, kotemasi ŋes atiar, “Aibois na erai amodiŋ, atuboto isawan; aso, kotwar ikodeta tetere elomanarete okialon agwel inyamat.”

¹⁶ Kotema Yesu atiar, “Mam ipudasi alosit; koinakis yesi kes lunyaman.”

¹⁷ Kotemasi ŋes atiar, “Emamei sio idiobore kane dimarai imugatin ikany ka lukecor iarei.”

¹⁸ Kotema atiar, “Koinunai.”

¹⁹ Kicorak ikodeta aiboikin anya; kolem imugatin lukany, ka lukecor luarei, kosesen akuj, kisirereŋ, kobilibil imugatin, koinak ikesisiak, koinakis ikesisiak da ikodeta.

²⁰ Konyama kere kimonikinos. Kotukonokinai atutubeta nuabilibila nuasalete iditai itomon ka luarei ileleba.

²¹ Lukenyamete emwaasi bala ikiliok ilukumin ikany, kilema aŋor ka idwe.

²² Atipet kitiŋaik ikekesisiak adokar ataker aiŋarenikin ŋes okekwa juwai, naarokor ŋesi etwari ikodeta.

²³ Kedau ŋesi aitwar ikodeta, kodoka oroŋat neejaikinor bon ailip. Kitiboŋ akwap, kojai ŋina bon.

²⁴ Konye kedaunit ataker aikwaŋar neelwana koitolima kibukete akailan; naarai kekutunit ekwam kakonyen,

²⁵ Kakwenyunet nakiwoŋonet naka akuar kobu Yesu mama ejaas, kicakacakai aŋolol,

²⁶ Konye nakeanyuniata ikesisiak ŋes icakacakai aŋolol, kiyaloŋoŋoto, kotemasi atiar, “Erai etoil” Kiworoto kanuka akurian.

²⁷ Atipet kiner Yesu kakes kotema atiar, “Kotitiŋioros! Eoŋ lo, sirikikuriakaros.”

²⁸ Koboŋok Petero kotema ŋes atiar, “Ejakait, arai erai jo ŋol, kicorakinai kabu mama ijai kokuju akipi.”

²⁹ Kotema atiar, “Bia,” Kodoku Petero kataker, kicakacakai akipi alosit mama ejai Yesu.

³⁰ Konye nakeanyunia ekwam, kokurianar, kogeu alumor, kiworo ebe, “Ejakait, kitajarai.”

³¹ Atipet korio Yesu akekan kitiŋ ŋes, kotema atiar, “Ijo loedit aiyuun, kanukinyo ibuonokinor?”

³² Kedokasi kesi ataker kopala ekwam.

³³ Komaata ŋes lukejaas toma ataker kotemasi atiar, “Abeit irai ijo Okoku Ioka Edeke.”

³⁴ Kedaut aikwaŋar juwai, kodoloto akwap naka Genesaret.

³⁵ Kejenut ituŋa luka aibois kaŋin, koramata luka akwap ŋin kere, koinut ŋes lukadekak kere.

³⁶ Kiŋaiŋaata ŋes acamakin kes atironor atwele naka anapitoke bon; koŋaleutu kere luketirorete.