Mariko 7 - Ebaibuli

¹ Kotukokinos Iparisayon ka ice kokewadikak lukepote ko Yerusalem mamakeŋ,

² koanyutu ice kokesisiakake enyamete inyamat kakanin numam elaete, ŋes atemar ebe numam ilotaritai.

³ (Naarai mam Iparisayon ka Iyudayan kere enyamete dimikito ilosito noi akecekanin, kiketakina kopone loka imakio.

⁴ Bobo da keboŋut kagwelanaret, arai mam itesegaaros, mam enyamete: ejaas da akiro ace nuipu, nukeinakinitai kes aiketakinit, kwape aitesegar akolin, ka amoti, ka iboro da luka aisinin.)

⁵ Kiŋita Iparisayon ka ikewadikak ŋes ebe, “Kanukinyo emam ikonikesisiak elosioto kwape ejaar epone loka imakio, konye enyamete inyamat kakanin numam elaete?”

⁶ Kotema kes atiar, “Abu Isaia kodwar kojokan akirokus yes lukesoswai, kwape kiwadikatere ebe, ‘Ketopoloorito ituŋa lu kaitukekec, Konye elwaka ikecetauon kamakaŋ,

⁷ Konye kamaete eoŋ atitai, Isisianakinete aicorakineta nuka ituŋa bala aisisianakinikec.’

⁸ Inyeinete yesi aicorakinet naka Edeke, iketakina koinono loka ituŋa.”

⁹ Kotema kes atiar, “Iŋerete jokan aicorakinet naka Edeke, tetere iricito einonokus.

¹⁰ Naarai abala Musa ebe, ‘Koyoŋitenene papakon ka totokon’; ido ebe, ‘Yenemoromoroi papa arai toto, koarai’.

¹¹ Konye yes ibalas ebe, ‘Arai ketema ituŋanan papake arai totoke atiar, Nutikainak jo aiŋarakinia erai Koroban’, ŋes atemar ebe Einakinitai Edeke;

¹² mam bobo icamakinete ŋes aswam imodiobore kere kanuka papake arai totoke.

¹³ Itapalaunete akirot naka Edeke kanuka einonokus loikopete: ido iswamaete akiro nuipu nuikote nen.”

¹⁴ Konyarau bobo ekodet kere kotema atiar, “Kiirasi yesi kere, kojenutu da.

¹⁵ Emamei ibore yenejai kiŋa ketuŋanan, keloma tomakeŋ yenepedori amunaar ŋes, Konye nuelomunete kotoma otuŋanan kes ŋun nuemunaarete ŋes. [

¹⁶ Yenejaas aki nuka akiirar, kiira.]”

¹⁷ Nakelomaria togo kinyek ekodet, kiŋita ikekesisiak akiro nuka awaragan ŋin.

¹⁸ Kotema kes atiar, “Kiton yes da emamei ajenun? Mam ijenete ebe, ŋinibore yenejai kiŋa ketuŋanan, keloma tomakeŋ, mam epedori amunaar ŋes?

¹⁹ Naarai mam elomari otau dimarai akoik bon, kanen ikiŋaario.” Kanuka ener kwaŋin, abu kitalau inyamat kere.

²⁰ Kotema atiar, “Nuelomunete kotuŋanan, kes emunaunete ituŋanan.

²¹ Naarai toma otauon luka ituŋa elomunete aomisio nukaronok; adoteu, akokolanut, earit, aelonut,

²² airaŋaanut, ameŋeranut, aiŋal, abenyanut, akoŋu naerono, asabanakin, aiwoŋonut, abaŋaanut:

²³ elomunete akiro nu kere nueroko kotoma, kes da emunaarete ituŋanan,”

²⁴ Konyou kanen, kolot oikorun luka Turo ka Sidon. Koloma togo, komam ekot ituŋanan ajenun: konye mam abu kopedo aiŋop,

²⁵ Konye atipet kobu aberu, nakejai ikepese emoyo loerono, naabu kiira akiroke, kibirokin akejeke.

²⁶ Kerai aberu ŋin da Ayonanit, aketeker Suropoenike, kiŋaiŋa ŋes aireŋear ajokit kama kikepese,

²⁷ Kotema Yesu atiar, “Kinyek ber idwe kimonikinos: naarai mam ejok alemun inyamat luka idwe acakakin iŋokwo.”

²⁸ Konye Koboŋok kotema atiar, “Eebo, Ejakait: konye iŋokwo da luejaas kwap kemesa enyamete ararasia nuka idwe.”

²⁹ Kotema ŋes atiar, “Kanuka akirot kaŋin kolot; anyou ajokit kapesekon.”

³⁰ Kolot aberu orekec, kodum ikoku iperikinitoi oitada kedau ajokit anyoun.

³¹ Konyou Yesu bobo katutubeta nuka Turo, kitor kidiŋ Sidon kolot kiton aŋolol naka Galilaya, itorit atutubeta nuka Dekapoli.

³² Koinunai ekimiŋ loiŋejiŋeja; kiŋaiŋaata ŋes aidokokin akekan,

³³ Kogita ŋes bon awai kama ejai ekodet, kibwaik ikebokor akike, kimuik aimul kotiro akeŋajep;

³⁴ kosesen akuj, kiyeŋak, kotema ŋes atiar, “Epata,” apolouke ebe, “Kopukor.”

³⁵ Kopukoros akike, kolacar aŋajepeke, kiner kotenan.

³⁶ Kikwenya kes sirikelimokis idiotuŋanan; konye kwape kiyatanakinia aikwenyar, kwape kwaŋin eyatanakiniata aitisiarikin akiro.

³⁷ Koumokis noi adepar, kobalas ebe, “Eswama akiro kere ejok, Isipedori ikimiŋiok akiirar, ka lumam ineras da einer.”